Khazohpa ngiachhiena topa ta, atakô 2023 Mara Thyutlia Py (MTP) aduana noh ei 69-na eima kaw tlôpa he aly â chhih ei ta hmeiseih. Mara Thyutlia Py su nano nanopa liata ypa zydua anaohna zana SAMAW ei cha hlâ ei.
Eima nôpaw hmiatuapazy atanoh eima hry liata y khao hra vei ei sala, chi nata pho kyhpachâ ta riethei rairunazy pachâ leipa ta, ama hmotao phapa theilâpa Py khochhi kawpa MTP maniah paduapa ei ta, atanoh taihta thyutliapazy pi ta, eima zi ngâpa he a rônah ei tah hmeiseih.
Mara Thyutlia Py chakaona rai he Marapasawzy châ pi ta cha chakaona rai rônah ngâsâ pa a châzie eima pahnokhai aw. Dyhchhie dyhpha pahrua leipa, nôhmei hâra pahrua leipa, hâti machâ alai achyh pahruana hneileipa ta, chhienoh/phanoh liata deichhyna chabatuhpazy ama châpa he za âchhi ngaita kaw. Marapasaw eima veiseih palôhâhnapa he rie a râsai leipa ta, bao angiapazy châta byhnâ châ via lymâ suh vy.
Mara Thyutlia Py Chhituhpa - General Headquarters, Sub Headquarters nata Branch liata chakaona raihriatuhpa zydua a thôhna hneileipa ta, chi nata pho châta nama tha nata zâh thaina nata sona, hneina zydua ta nama chakaona kyh liata châpalaikhei ei na ta, nama sie lymâ nawpa liata thazei leipa ta hmialâ tôh via lymâ awpa ta khokheina sâh chaipa ei cha hlâ ei.
Mara Thyutlia Py aduana noh ei 69-na alypa nata thapha kawpa ta ahmâ chyu awpa ta khokheina ei cha hlâ ei.
MARA THYUTLIA PY TLÂH PAREI MAWH SY.
Sd/- M. Laikaw
Chief Executive Member
Mara Autonomous District Council
Siaha.
Published by:
Information & Publicity Department
Mara Autonomous District Council
Siaha.
(9.10.2023).
