PRESS RELEASE
NO.136/2023
SIAHA, 26 Thlarâh, 2023, Hriaheinoh – Ary liata palâsapa he atakô 2023 Thâtihpha Tlô Noh liata Puhpa M. Laikaw, Hon’ble Chief Executive Member (CEM), Mara Autonomous District Council (MADC) tawhta Mara zawpizy hnoh ta anaohna a châ.
“Mararâh liata Khazohpa khinarâh thâtihpha eima vaw daopa “Thâtihpha Tlô Noh” cha Khazohpa ngiachhiena vâta atakô chhao vaw tlô thei heih pi ta, aly’pa a châ hmeiseih. He noh liata Mararâh liata apahrâpa zydua nata khizaw kaoki liata apahrâpa Marasaw zydua, eima Beipa Zisu Krista moh ta “Thâtihpha Tlô Noh” anaohna ei cha hlâ chyu ei.”
“Marapazy sapa liata ryureina eihrâhpa eima hnei thei nawpa nata thlahpa liata pachhapa ta eima y thei nawpa nata eima laiseih thei nawpa ta Khazohpa ta RA. Lorrain nah nôvah hmâpa ta Mararâh cha vaw pakhaih haw ta, Sapa Ryureina (MADC) nata Awnano Achhihthana eihrâhpa zy vaw hnei pi ta, aly’pa a châ hmeiseih.”
“Eima Missionary nahzy he Krista kyhpachâna vâ tlai chata riethei rairuna papeisa leipa ta noh tla beilei khih rônahpa London cha siesaipa ta Mararâh liata thâtihpha miah ama chho hleikhô ta, miah ypâ ei ta, khih miah salâh ei ta, ama luh taihta eima Mararâh nawh kawpa liata amâ pabu.”
“Chahawhta ama saw-samohzy chhao atanoh taihta eima hnoh ta miah pahrâlâhpa ta, khih miah salâh ei ta, keimo chhâ liata eima mo ta eima hmô theipa eima Missionary pathla Pihnô Vaili nata â kaolâhpa Revd. L. Mark zy zana hlâ ei na ta, Marasaw zydua vyuhpa ta alynabie ei hlâ hmeiseih ei.”
“Eima Missionary nahzy ta Krista kyh ama pachâna cha pakah dei châ leipa ta hmotaopa ta palâsa ei ta, eima pha nawpa nata ngiapâna liata laiseih ta, sapa khihsana liata eimâ sosâh lymâ thei nawpa ta eima kiapâh liata miah amâ tyudualâhpa zydua he arônah tah na ta, eima Missionary nahzy he Marasawzy pi ta pasô si la, ama thâpha reih si la, palyupalih ei suh u. Mararâh châta ama hmopha taona he my leipa ei si la, sawtliapazy hnoh ta chho lymâ si la, ama tao chhâchabâhpazy chhao tao lymâ achhuah si la, eima theina kao nochâ liata Krista chakaona rai he hria achhuah chyu suh u.”
“Atakô 2023 Thâtihpha Tlô Noh he ta, sapa nata thlahpa liata byhnâ vaw tlôkhei sala, he noh ziehpa ahmâh tuhpa zydua ta, Abeipa Khazohpa liata alypa nata thapha kawpa ta, he noh he vaw hmâh chyu awpa ta khokheina ei cha hlâ ei.”
ISSUED BY:
Information & Publicity Department
Mara Autonomous District Council
Siaha.
