PRESS RELEASE

NO.111/2024

 

SIAHA, 18 Phiapi, 2024, Hriatuanoh – Atamy dawh 10:00AM khata Farmers' Training Centre, MADC Office Complex, Siaha liata Training on Office Procedure and Service Rules for LDC & UDC, MADC inauguration programme ahmâhpa châ ta, Puhpa M. Laikaw, Hon'ble CEM, MADC cha khichhai laipa (chief guest) châpa ta â hmâkhei ei.

 

Programme he Course Director Puhpa K. Vanlalliana, Executive Secretary, MADC ta chhihtha ta, Puhpa HC. Beikhai, Deputy Secretary, GAD & DP&AR, MADC ta Abeipa lâta pavaosana thlahchhâna a hnei.

 

Training he târi 18.11.2024 tawhta pathaopa châ ta, târi 22.11.2024 noh taih hneipa a châ aw.

 

Puhpa M. Laikaw, Hon'ble CEM, MADC chata, "He training he sôh nah thih rairuna vâta tao patoh thei leipa ta daihti vâro vaw pakhôsa pi ta, atanoh tawhta pathao theipa a vaw châpa he aly âchhih hmeiseih ta, achievement rônah kawpa nata ngiatlâh châ kawpa a châpa ta ei pahno" tahpa ta a reih.

 

"Tiama kawpa nata phahnaingiah kawpa ta training chhâna taih a hlao chyu awpa ta ei châ haw ei. Hriatuanoh he Mara atobina (Mara dress) ta office kiah awpa tahpa kha nama pachâ peimawh chyu awpa a châ. Kei chhao ei hoh ma, hoh vei ma eikhahmah Hriatuanoh ta Mara atobina atao leipa ta y beih va na. Atanoh training-na liata Mara dress akyh leipazy, biehneituhpazy lâ tawhta vaw ngia awpa ta," CEM ta a chho ei.

 

"Hâta eikha liata eikha Mara dress ta atobi awpa ta eima pachâ peimawh vei khiahta la, a pei kaw. If character is lost, everything is lost a tahpa hawhta, zachhih awpa heta, keimo he zachhih awpa ta eima y tua awpa a byuh," tahpa ta khichhai laipa ta a reih.

 

"MADC Golden Jubilee hmâh ha pi ta, New Maraland vision hneipa ta hmialâ eima sie lymâ awpa byuh ta, patuapaluana pha viapa hnei lymâ ta, thlahchhâna chôta keih eima châka lymâ awpa he a peimawh. He hlao patlohtuh awpa cha nâmo nama châ," tahpa ta CEM ta a reih.

 

"Punctuality he nama pachâ peimawh lymâ awpa byuh ta, ACR chhao paso pha lymâ pi ta, ahy ACR ma pha ta, ahy eih mah pha vei tahpazy he eima moh lymâ aw. Officers zy chhao training eima pahneisa lymâ aw. Discipline hnei pha leipa nata hyutuhpazy zana châh pahno leipa pha leipa ta, discipline hnei pha a chhuah lymâ ei chi ta, hyutuhpazy za lymâ namâ chhuah aw," tahpa ta khichhai laipa ta a reih.

 

"Training vaw patlô pi ta, dâh nah phôh hawhta sie pi ta, adona (justice) papeimawhsa chai pi ta, dâh nah phôh hawhta hmo eima tao lymâ aw. MADC Office liata hria tlôh ta, Party worker lyu thlâh hapa, sawhkhâna a rao ha aw, tahpa ta khiliah râhpâh liata reih ngâthlâh hapa nama hluh kaw.  Kha kha nama duty châ vei. Nama pathleih’pa a byuh. Nama rai liata tiama kawpa nata ngâchhih kawpa ta nama hria lymâ awpa a byuh," tahpa ta CEM ta a reih.

 

Puhpa K. Vanlalliana, Executive Secretary, MADC chhaota punctuality peimawhzie nata Office Hours chhôta Office lia reingiah kawpa ta y peimawhzie nata Office tawhta châ puapa pachâ peimawh lymâ awpa ta training a vaw hlaopa zydua hnohta a chho ei.

 

He training-na liata resource persons zy cha:

 

1. Puhpa Derick Salai Solo, Under Secretary, DP&AR, MADC.

2. Puhpa Laichau Khaimeichhô, Audit Officer, MADC.

3. Puhpa MC. Beihrohmo, Assistant Audit Officer, MADC.

4. Puhpa BL. Khuhly, Assistant Audit Officer, MADC zy ama châ.

 

He training he preparatory course for departmental examination châta pachhuahpanohpa a châ. 

He training course ta a cover-pazy cha :- Structure of the Govt. of India and function at various levels, File management, Security of official information and documents, Form and Procedure of communication, Drafting & Noting, Record management, Fundamental rules and supppementary rules, File numbering system, Office mangement, Attendance, Punctuality and Leave, etc zy a châ.

 

Training inauguration programme he Abeipa thlahchhâna (The Lord's Prayer) reihparaohpa ta daihti pachhâsapa a châ.

 

ISSUED BY:

Information & Publicity Department

Mara Autonomous District Council

Siaha.