PRESS RELEASE

NO.62/2025

CHAKHEI, 16 Patô, 2025, Chutynoh - Atamy dawh 7:30 AM kha ta Puhpa M. Laikaw, Hon’ble CEM, MADC ta Chakhei tawhta athaopa ta Siasi khih tly ta, Siasi khihsawzy ta dyna gate taopa ta, khitlâh zawpi nata Siku hawtizy ta arônah kawpa ta vaw ydy ei ta, pawpi ri chhao ta aly kawpa ta ama khih liata amâ vaw ly.

Khitlâh nôpawzy ta Puhpa K. Dawchhô, VC Vice President O tlyhmia liata Public Meeting vaw pachhuapanohpa ei ta, he daihti he Chairman Puhpa Benzamin Solo, President, MTP Branch: Siasi ta chhihtha ta, Machâ K. Ngia-u, ECM Siasi Local Secretary ta pavaosana a hnei. Puhpa Pawkhu T. Azyu, General Secretary, BJP Siaha District ta hmiapahnosana hnei ta, laihsa Pricilla Nôtlia nata laihsa J. Vahneisô zy ta hlasapa ta avypakhypa zawpizy palôhpahawh ei ta, Machâ C. Riabei ta khitlâh vyuhpa ta alynabie reina hnei ta, Machâ B. Raisa, ECM Siasi Local Chairman ta thlahchhâna hneipa ta Public Meeting programme he pachhâsapa a châ.

He daihti liata Puhpa C. Chehnei, Dy. Chairman ta biereina daihti hmâh tua ta, “Siasi he khih reiraohpa, Football lia chhao ta Mararâh liata Champion theipa amopâtlâh a châpa nama châ; he hawhta kao to liata hmahsie lymâ awpa akhokhei pi ta, Siasi hropa hnei ma pi, eima hnei chhôhpa Siasi khih he eima talent nochâ liata he khih nata râh châta hmâh si la, keimo hlâta riethei sipasa viapazy deichhy tah, Khazohpa ta miah â hnawna hawhta mo hropa châta byhnâ châ achhuah lymâ si la, Missionary tluapapuapa eima châ - Mara chi nata pho he zakhei leipa ta eima châna hawhta hriapazi awpa a peimawh” tahpa reih ta, hmialâ daihti chhaota lôraohpa nata amopâtlâh châ lymâ awpa ta pasyuna nata khokheina bie a reih.

“School hry liata athai thei lei viapazy ama y thei aw - he nahzy he ama nôpaw nawhzy ta ama pasô kawpa nata ama lôsôh ama châ; chavâta Teacher nahzy ta mopahnai leipa ta âraohâh kawpa ta mohôh khai tah, Siku O zy cha ama ngiaryhna su nata thaina sona amâ la hmeiseihna su a châ thei nawpa nata, school compound zy he ngiaryhna su nata classroom zy he ama thlalôhna su a châ awpa a châ.”

“Nôpawzy ta khipi lâta eima pasiesapa sôh eimâ hryuh pasainazie hawhta Siasi School liata eima pahryuh ngâ hra khiatala eima School zy he vaw a pha via aw. Eima Siku hawti nawhzy he hmialâ Mararâh hnabeiseihna eima hnei chhôhpa ama châ. NGO zy chhao ta apha leipa reipachhie leipa ta taopathina rai hria eimâ chhuah awpa a châ” tahpa a reih.

Puhpa M. Laikaw, Hon’ble CEM chata biereina daihti a hmâpa liata Siasi khihsawzy ama palyupalihna nata khokheina vâta alynabie reih ta, Siasi khih cha khih pathaihpa, khitlâh zachhihpa, khih ngiaryh chhihpa ta tao pazao lymâ awpa ta zawpi pasyu ta, ato zydua liata hmahsie nawpa ta Education he a peimawh tahpa a reih. “Moral character taopathi theituhpa Teacher zy ta student Talent hneipazy palaiseihsa awpa a peimawh kaw.  Sawhkhâ nata achuna syllabus ta â hnawpa hawhta Siaha liata amâ chupa nata Siasi liata amâ chupa â lyu thei nawpa ta atudent-zy ta pachuna phapa ama dao awpa a châ” tahpa a reih.

“Mara Opi MADC palai awpa ta 12th Term MADC ta hmahlana a siekhei lymâ. He sawhkhâna liata Good governance, sawhkhâna phapa siekheipa ta New Maraland padua awpa kyh liata Pathluana y leipa aw ta, ryureina dopa siekhei eimâ chhuah. Sawhkhâ rai hriapazy ama tovyuh awpa ama to lymâ aw. He kyh liata Awnano, Sawhkhâ nata NGO zy apha kawpa ta eima hriaparaoh lymâ thei nawpa ta hmah eima la chyu awp a châ.’”

“Ti nata râh chyhsa phapa châ awpa ta eima râhmâhpazy pabohsa ta, a râh leilôzy a pha kawpa ta mohôh awpa he a râh leilô hneituhpazy maophaohna a châ.”

“Marasawzy pi he sôh management kyh liata eima diathlâ kaw; eimâ chu via lymâ awpa a châ.”

“Khih chaki liata y hra si la, pathipalôhru - moral he peimawh ta, mo hropa ama theipa maih eima thei hra awpa a châ.”

“O hmo lyu hmo kyh nata Land tax vâta Tipa Siaha tlô byuh khao leipa ta atahmâ he Chakhei liata Circle Administrative Office pahy haoa a châ; he he zawpi châta rainao viapa ta MADC adoh thei nawpa pachâpa ta ARC recommendation hawhta taopa a châ.”

“Siasi he khih ngiaryh chhihpa vaw châ via lymâ sa la, khi hropazy châta byhnâ vaw châ sala, a khihsawzy ta sapa nata thlahpa liata byhnâ to awpa ta khokheina ei cha hlâ ei” tahpa ta pasyuna bie nata khokheina bie pha kawpa a reih.

CEM he ta Siasi liata School ypa -  Govt. Siasi Primary School, Govt. Siasi Middle School nata Siasi Primary School-II (Private) zy tlypa ta ama duahmo mopasiana a hnei khai hra.

Atamy Chakhei tawhta Siasi pangaipa ta a siena lâpi liata Puhpa CZ. Sachhua, Headmaster i/c nata Staff zy ahawna hawhta Govt. Middle School, Chakhei tly pâ ta, ama rairunazy tlôkheipa cha a theina hawhta vaw mokhei awpa ta a chho ei.

CEM zachhihpa he noh thôh (3) chhôh tlai Chapi nata Chakhei MDC bia tlypa ta atanoh he a chhâ nawpa ta Siasi chhao a palâ kawpa ta a tly thei. Siasi khitlâh ta Viahchao nata Vao thiepa ta tihâh vaw sapa ei ta, Puhpa M. Laikaw, Hon’ble CEM ta alynabie a reih.

CEM zachhihpa he Puhpa C. Chehnei, Deputy Chairman, Puhpa Beihu Nohro, Deputy Chief Whip, Puhpa Albert TT. Sachu, MDC nata Puhpa B. Dawpho, MDC zy ta zi ei ta, officials lâ tawhta Puhpa Beirôkhu Beitâ, I & PO, Puhpa K. Laitha, AEO, Puhpa JS. Beizawzilai, Legal Consultant, MADC, Puhpa NK. Lalnunfela, PSO to CEM, Puhpa FC. Minela, Cameraman, Puhpa K. Nahemiah, Cameraman zy ta ama zi. 

BJP Siaha District tawhta Puhpa C. Lawbei, Ex-MDC & Vice President, Puhpa Pawkhu T. Azyu, General Secretary, Puhpa Thychha Chozah, Secretary, Puhpa K. Beipachharona, Vice President, BJYM nata Ls. Caroline Chhaihlo, Vice President, BJYM, Mawhrei tawhta Puhpa K. Nawchho zy chhao ta zi ei ta, Puhpa Jeffrey Khara, Moonlight Editor ta zi thei hra ta, Ls. J. Vahneiso (Mara Idol 2024 Top-5 nata Ls. Pricilla Nôtlia, (Mara Idol 2024 Top-7) Artiste-zy ta ama zi thei hra.

ISSUED BY:-

Information & Publicity Department

Mara Autonomous District Council

Siaha.