PRESS RELEASE 

NO.47/2026

Siaha, târi 6 Chhiepa, 2026 ( Pachyhnoh) - Atanoh dawh 12 : 30 PM liana khata Puhpa M. Laikaw, Hon'ble CEM, MADC cha Chief Guest châpa ta Serkawr Multipurpose Primary Agriculture Credit Society Ltd Saikao (MPACS) Office châ Saikao Khih liata a pahy.

He MPACS Office Saikao liata Pahyna programme he MTP Sub Hqrs.,: Saikao Office su liata hmâpa châta; Satlia Herbert B Mathipi ta daihti chhihtha ta, Revd. JR Sanga, Saikao ta Abeipa hnohta daihti pavaosana a hnei.

Chief Guest Puhpa M Laikaw, CEM MADC ta MPACS Saikao pahyna a hnei khai tawhta Laihsa B Vapawdi, Board of Director, Mizoram Cooperative Apex Bank hmahlana ta Saikao liata MPACS Office pahy theipa a vaw châpa ly âchhih zie reipa ta biereina hneipazipa ta "Centre Sawhkhâ ta Râh zawpizy khihsa rairuna tawhta thao papua ta Grassroots Level tawhta economy duasu phapa liata eima duah theina awpa hmahlana liata policy sianô kawpa hneipa ta Cooperative Society tha patlô ta, hmah pasiesa awpa he a pachâ peimawh ngaitapa a châ. 10th Term MADC liana khata Mawrâ tawhta Cooperation Department he Council liata hlâpa vaw châ ta, he nona heta hmô sianô leipazy a ypa vâta he Department he vâro tlai raihria thei leipa ta a sie. Atanoh lia deikua cha, 12th Term MADC ta eima theina papuapa ta hmahla pi ta; ti â o pa ahnawh hneileipa hawta châ khaoleipa ta Centre, State nahta azaona phapa hneipa ta hmahsiena lâ apangai lymâ ha."

"MPACS he Siaha, Siata nata Nohaotlâh liata pahypa vaw châ hata, atanoh liata a sâpalihna awpa ta Saikao liata pahypa a vaw châpa he alypah a châ hmeiseih. Apex Bank nata azaona hneipa ta a rakhapa liata Banking system chhao he liata siekhei thei awpa a vaw châ ha aw. Eima Râh liata eimâ phahla kawpa cha Financial management eima pachâ peimawh leipa he a châ. Sôh lapangia hluhpa ta tlâ hmâ hluh, lapangia chyhviapa ta tlâ hmâ chyhvia tahpa ta eima y thlâhpa he eima palôh  a taopathi tah saving he eima pachâ peimawh awpa he angia ngaita bâ. Atanoh ta saving eima taopa he mylâ hânoh châ ta keimo nata eima pathlazy châ ta ryu eima pachô tahna a châ. Atanoh liata India Sawhkhâ ta economy liata hmah eima sie theina awpa a hmahlana miakha, he MPACS he vaw pachâ peimawh ula, Zero balance ta Account pahypa ta, nama sahroh, chicheipa zuanazy tlâ hmâkhai thlâh leipa ta nama Account liata vaw pachô lymâ aw ei chi ta, ahneiviapzy chhaota apôhna ypa ta vaw soh hr'aw ei chi ta, he he ta eima economy literacy rate chhao a pasâh aw. He MPACS he Saikao Khisaw nata Awnanopa chhaota hmâ phahnai khei cheingei awpa ta châ haw ei na ta khokheina ei cha hlâ ei", tahpa ta CEM ta a rei.

Laihsa B Vapawdi ta MPACS report tlâhpipa piena hneipa ta:-

1) He eima Primary Society he Nôpaw  hmiatuapazy ta Serkawr Consumer Cooperative Society Ltd., tahpa ta 1/10/1991 liata ama Registered pa a châ.

2) November 2025 liata Serkawr Multipurpose   Primary Agriculture Credit Society tahpa ta thlapa a châ.

3) Serkawr MPACS liata châna apatupazy:-

(a) Chairman: Satlia Herbert B Mathipi 

(b) Secretary: Laihsa B Vapawdi 

(c) Treasurer: Pihnô B Reisidi

(d) Share holders: Manôh 30

(4) Mizoram Gov't ry liata eima y no ta, 7th schedule liata Serkawr tahpa ta Registered hapa kha âthla thei khaoleipa vâta Serkawr MPACS Saikao tahpa ta eima thla.

(5) Trained hriatuhpa pano ama y aw:

 (i) Satlia Davison Sawthly

 (ii)Laihsa Janecray Hnahly

(6) Common Service Centre a châna hawhta tao thei awpazy:- Pan card, Leaner Driving licence,                                          

Residencial nata Tribal Certificate, Credit business, Deposit nata Withdraw, Mini ATM & Micro ATM, Hmahlana a sie ngâpa liata "Non-burn" Storage of Petrol & Diesel, Van Dhan Mission ry liata Chilli Processing Unit, hezy hleikhopa heta hmahlana hropazy chhao a y hra.   

Puhpa C. Chehnei, Deputy Chairman, MADC, Puhpa Beirahmo Syhly, EM i/c , Cooperation, MADC, Pihnô N. Maki, DRCS, MADC, Puhpa B Luaha, Ex.MDC nata C.Beipasasa, VCP Saikao zy chhao biereina nata pasyuna pha kawpa ama hnei hra.

Teresa Ngiano Hlychho ta hlasapa ta Zawpi programme âhlaopazy a palôh pahawh.

Puhpa JB Eric Lalmuanpuia ta vote of thanks reina a hneikhai tawhta Bei Thlahchhâna reipa ta daihti pachhâpa a châ.

CEM he ahrialâhpa thokha, Officials nah , BJP Party Nôpaw nah nata Editor Chhim Aw zy ta ama zi.

ISSUED BY:

Information & Publicity Department,

Mara Autonomous District Council,

Siaha.