PRESS RELEASE

NO.110/2024

SIAHA, 13 Phiapi, 2024, Pakhynoh – Atanoh dawh 2:00 PM kha ta CEM Conference Hall, MADC Complex liata Maraland Video and Photographers’ Society (MVAPS) pachhuapanohpa ‘Handover Ceremony of Funeral Photos & Video of Rev. MLA Mark Lapi (Pihnô Vaili), the last Missionary of Maraland’ programme a hmâpa châ ta, he daihti liata Puhpa M. Laikaw, Hon’ble CEM, MADC cha biereina hnei awpa ta hruapa a châna hawhta â hlao.

Programme he Puhpa FC. Minela, President, MVAPS ta chhihtha ta, Rev. K. Laichhua Azyu, Moderator, ECM Assembly ta devotion a hmâh. He khai tawhta MVAPS zy ta Photo sâhkha (1000) hlei nata Video, dawh charu (6) hlei a pahsipa zy hleikhô ta Photo Frame chhaopazy cha CEM, MADC, ECM Assembly nata Pihnô Vaili (L) chhôhkhazy hnoh ta ama hlâ.

Biereina chyupa hnei awpa ta hruapa liata CEM zachhihpa Puhpa M. Laikaw chata MVAPS zy ta he hawhta chhâ a vaw y lymâ awpa taih chhao ta ama vaw hmô thei awpa document pitlohpa ama vaw patohpatiapa vâta alynabie reih ta, Khazohpa ta chhihtha ei sala, hmialâ daihti lia chhaota he hlâta pha viapazy chhao tao thei awpa ta pasyuna nata khokheina a hlâ ei.

CEM chata biereina hnei pazao ta, “Atanoh târi 13.11.2024 he Pihnô Vaili, eima Missionary hnô chaipa â pahâ tawhta kô 1 a vaw tlohna no châ ta, he noh he Marapazy ta eima my lei awpa a pha kaw. Eima Missionary hnôh chaipa nah nôvah ta New Colony Achhyna O liata apôhkha awpa ta keih ama vaw chakâna zy kha my leipa ta Marasaw zy pi ta sapa nata thlahpa liata a pôhkha kawpa ta eima sie lymâ awpa he kho â chhih hmeiseih.”

“Eima Khazohpa ta eima Missionary nahzy hmâpa ta chi nata pho ta miah a tlyh papua hleikhô ta sapa nata thlahpa liata ryureina eihrâhpazy miah pie ta, cha dei châ leipa ta eima Missionary nahzy ama thisaih a lei lei nawpa ta Marapasaw zy cheingei miah patipatyhpa ta ama thisaih cha Mararâh liata miah a châh pâ lymâpa he a rônah hmeiseih. Eima Missionary nah hniehnô, ama saw nata nawh nahzy he Marapazy ta pasôna châh pahno si la, alyna châh pahno lymâ ei suh u.”

“Atanoh liata, Marapazy châ ta ryu tlohpa, chhâ a vaw y lymâ awpa liata hmô thei awpa hmo peimawhpa – chipho châta lôbô a tlohpa liata ahlaohli ta, a buakheituhpa liata ei vaw hlao thei hrapa he vâhnei a tah na ta, a rônah ei tah kaw” tah ta, atanoh Photo & Video paso awpa ta a vaw ypa a buakheituhpa MVAPS zy hnoh ta alynabie a hlâ chanei.

He programme liata MADC liata nôpawpazy hleikhô ta hrua-eihpa officer-zy ahlao ei ta, Laihsa Evelyn Chozah, DDK stringer, Siaha chhao â hlao thei hra.

He nothlahpa nata video zy, MVAPS zy phahnai ngiahna ta ama taopa he, MADC Art & Culture Department ta ama mohôhpa Museum lia chhao so pâ awpa ta hlâ pâpa a châ.

ISSUED BY:

Information & Publicity Department

Mara Autonomous District Council

Siaha.