TOKALO, 30 Phiapi, 2023, Pobienoh - Atanoh dawh 1:00 Pm kha ta Puhpa M. Laikaw, Hon’ble CEM, MADC ta Pala Tipo ti alohpapuapa tawhta E & F Department, MADC ta Mini Hydro ama taopapuapa cha hmâ thei awpa ta a pahy.

Pahyna programme he Puhpa Thaly T. Azyu, CF ta chhihtha ta, Rev. Joseph Koma Chozah, ECM Phura Biatuhpa ta Malureina 33:53-54 nata Hlazy 22:28 zy reipapuana nata reipakawhna a hnei. 

Puhpa Thaly T. Azyu, CF ta Technical Report pie ta, he Mini Hydro he 100 kilowatts piepapua theipa, light bulbs 10,000 rachhôh apakhaih thei awpa a châ tahpa report ta, a taona liata ₹.51.00 Lakhs pachhâpa ta tao patlôpa a châ tahpa a reih. 

Pala MTP Junior zy ta Hlapy ta hlasana hnei ei ta,  Puhpa John Beizachhi Phuto, Laihsa FC. Nipari nata Laihsa Cathy Solo zy ta mopakha hlasana ama hnei.

MADC nôpawpazy tawhta Puhpa N. Viakhu, Chairman nata Puhpa K. Hrahmo, EM i/c Land Revenue & Settlement Department zy ta biereina chyupa daihti hmâh ei ta, Puhpa Tiahlei Syuhlo, EM i/c E & F Department ta Vote of Thanks reina daihti a hmâh. 

Puhpa M. Laikaw, Hon’ble CEM chata biereina daihti chyupa hnei ta, noh nata daihti phapa miah pie tuhpa Khazohpa hnohta alynabie a reih. 

Atanoh programme he noh ngiatlâhpa châ ta, sawhkhâna thiehpa â vaw dua tawhta MADC NIELIT Study Centre pahypa châ ta, atanoh liata a ei no nawpa ta MADC cheingei ta a taopapuapa Mini Hydro cha ano CEM a châ daihti liata pahypa a châ vâta â lyzie reih ta, MADC Golden Jubilee Building sa ngâhaipa chhao thlai ta pahy thei awpa a châ tahpa a reih.

Atanoh liata programme ahlao awpa ta MADC nôpawpazy, MADC officials, Phura Police 2nd O/c Puhpa Mahmuna nata Pala Tipo chheipâh khihzy tawhta a vaw hlao theipazy nata Pala MTP Junior Hlapy manôh zy hnoh ta anaohna nata alynabie a reih.

MADC E & F Department zy hriapasana vâta 100 kilowatts tlai piepapua theipa Mini Hydro pahypa a châpa he aly â chhihzie reih ta, Marasaw technician eima hneipa nata Mini Hydro a buakhei chaituhpa Puhpa K. Laiva hnoh ta alynabie a reih. 

Mararâh liata tly tlâh a châpa Mawma tlâh zy, Pala Tipo zy he, he tawhta visitor zy a vaa pôh lymâ aw ei ta, Pala Tipo chheipâh liata apahrâpazy ta azipa palôh phaona chô ta Ramsar site ta phuah hapa Pala Tipo pabohsana rai nata Mini Hydro mohôhna kyh liata khihsaw zawpi ta E & F Department hmahlana liata hriaparaoh pha awpa nata thapatlôtuhpa châ lymâ awpa ta ahawna a tao.

Chahleikhô ta MADC sawhkhâna ta a papeimawhsa kawpa cha Pari theipa nata Drugs adyuh awpa he châ ta, Maraland he Drugs-Free land ta tao awpa ta ama khona kyh liata Awnano, VC nata MTP zy cha hrialâh phapa châ pazao lymâ awpa ta ahawna nata pahruana a tao. 

Sawhkhâ ta hmahsiena a vaw tlôkheipazy liata a râh zawpi ta palôh pasoh kawpa hmâh ei si la, palôh eima hnei vei khiatala chi hropazy ry liata eima y pathlei aw; byhnâ eima topazy he a hmâ dâh thai tah, atanoh liata Mini Hydro eima pahypa he a lai tly ma a chyh tly ma, a sôna pahnopa ta Abeipa liata alynabie reih si la, hmialâ daihti liata hmopha viapa tao thei lymâ awpa ta Abeipa Khazohpa liata thlahchhâna chô ta, atanoh he eima ti nata râh châta eima chakaona chyu liata ahlâpathiehna noh châta hmâh chyu sih la tahpa he bie eimâ ta khohpa a châ tahpa ta pasyuna bie pha kawpa a reih.

Puhpa M. Laikaw, Hon’ble CEM he MADC nôpawpazy tawhta   Puhpa N. Viakhu, Chairman, Puhpa K. Hrahmo, EM i/c LR&S nata a lahpinô Pihnô B. Ngiaso, Puhpa MH. Tiabi, EM i/c Edu (MS) nata a lahpinô P. Nancy, Puhpa L. Prisila, EM i/c PWD, Puhpa Tiahlei Syuhlô, EM i/c E & F, Puhpa J. Vabeikiasa, EM i/c Agri., Puhpa N. Beihu, Dy, Chief Whip nata a lahpinô Zahawmi, Puhpa M. Chiadung, Chairman, Town Committee nata a lahpinó K. Sangi zy ta zi ei ta, BJP District HQ tawhta Puhpa N. Beikhai, Vice President nata HC. Hmingtinthanga, Executive Member zy ta ama zi.

MADC Officials tawhta Puhpa Beirokhu Beita, I & PO, Puhpa FC. Minela, Cameraman, Puhpa T. Pabua, Cameraman zy ta zi ei ta, MJA tawhta President Puhpa M. Baithai, Editor, Chhim Aw, Puhpa Lalramnghaka Chinzah, Editor, Kawleng zy ta ama zi thei hra.