PRESS RELEASE

NO.98/2024

SIAHA, 29 Phiata, 2024, Hriaheinoh - Atanoh dawh 1:00 PM khata Mizoram Rural Bank Siaha Branch New Building, New Siaha, Remi Bakery chô liata ypa pahypa châ ta, he inaugural programme lia heta Puhpa M. Laikaw, Hon'ble Chief Executive Member, MADC cha khichhai laipa (chief guest) châpa ta â hmâkhei ei.

Puhpa Lallawmzuala Colney, GM, Network-II ta programme chhihtha ta, Rev. Chhuakhu Khithie ta devotion daihti â hmâh.

Puhpa M. Laikaw, Hon'ble CEM, MADC chata, "Atanoh MRB Siaha Branch New Building pahy awpa liata khichhai laipa châ awpa ta na khokheituhpa zydua hnohta alynabie ei reih," tahpa ta a reih.

"Siaha liata Bank vaw y hôlô ta, Office liata na chareipazy hiahri tyh ei na ta, 'Siaha Bank liata zawpi (customer) welcome pha chaipa he khâpa Bank maw châ aw' tahpa ta hiahrina tao tyh na ta, MRB tahpa ta nâ chhy tyh ei ta, nama chô liata a ly kaw na ta alynabie ei châ hlâ ei," tahpa ta khichhai laipa ta a reih.

"Bank ta loan zy nama pie vâta o a sa theipa châ pi ta, al’ypa a châ hmeiseih. Mararâh thotlâh lâ tawhta a vy ta nama Bank cha vaw pangai ta, châ vaw daohpa hluhpizy he Mawreih a thai leipa nata, Bank yzie pahno leipa hluhpi y aw ei ta, cha hawhpazy chô liata daothei kawpa ta nama vaw welcome tyh awpa nata, nama baokhâ tyh awpa ta ei châ haw ei," tahpa ta CEM ta a reih.

"Mararâh thotlâh lâ tawhta cha vaw pangaipazy he daihti hnei chyh kawpa nata apara kawpa ta châ vaw daohpa hluhpi y aw ei ta, chavâta lunch break he eikha ta â raohpa ta lunch break khoh khai thlâh leipa ta lunch break he a thla ta a thla thei lymâ ula, a pha kaw aw," tahpa ta CEM ta Bank liata hriapazy hnohta ahawna a tao.

"Kô 5, kô 10 a khô hapa lia khata Bank liata loan lana kyh liata bribe a y tyh tahpa thei tyh pi ta, a pei ngâsâ. He hawhpa lana kyh liata bribe a y tyhpa he a y khao lei n’awpa ta thata hmah vaw la u la, a pha aw," tahpa ta khichhai laipa ta ahawna a tao.

"Keimo chhao eima raihriana liata dâh na phôh palaisa chai ta, adona (justice) pachâ peimawh chai awpa he eima hmahlana châ ta, ryureina kyh liata adona papeimawhsa ta corruption he adyuh lymâ awpa eimâ chhuah," tahpa ta CEM ta a reih.

"Office ei tlô pataw nahta Abeipa lâta thlahchhâna hnei tua tyh na ta, Abeipa ei dawkâh lia heta nâ a vaw bei chai la, na khoh dâh hawhta rai hria awpa ta na bao mah y, â do kawpa ta rai ei hria thei n’awpa ta bao ei ngiahna maih kaw liata na bao mah y, tahpa ta thlah ei chhâ tyh," tahpa ta CEM ta a reih.

"Nâmo MRB liata hriapazy Bank nama vaw tlô pataw nahta Abeipa lâta pavaosana thlahchhâna hmiapasah ta rai nama hria lymâ khiahta la Abeipa ta bao namâ ngiahna maih liata cha bao lymâ ei ta, nama raihriana vaw pha lymâ ta customer chhao hnei pha lymâ ei chi ta, hlaotlohna chhao nama to lymâ aw," tahpa ta khichhai laipa ta a reih.

Puhpa M. Misael, PD, DRDO, Siaha ta pasyunabie pha kawpa reina a hnei hra.

K. Zodinpuii ta hlasapa ta zawpi a palôhpahawh.

Puhpa M. Laikaw, Hon'ble CEM, MADC he Official lâ tawhta Puhpa John M. Beilaisei, PS to CEM, Puhpa Pawsa Lava, AITO, MADC, Puhpa T. Pabua, Cameraman nata Puhpa K. Nehemia, Cameraman zy ta ama chakaochahlâh.

Puhpa Isaac Lalfamkima Sailo, Chief Manager, MRB Siaha ta vote of thanks reina a hnei khai tawhta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.