SIATA, 25 Phiapi, 2023, Pachynoh - Atanoh my dawh 11:00 Am kha ta Siata khihsaw ta Cha-ypi ama hmâpa Langnechhe 2023 noh 2-na cha Siata Tlyliah liata ahmâ pazaopa châ ta, he liata Puhpa M. Laikaw, Hon’ble CEM, MADC cha Khichhai Laipa châpa ta noh-y ta programme a hmâkhei.

Programme he chhaih 2 lâta pachhaihpa châ ta, chhaih 1-na liata Puhpa Malsawm ta chhihtha ta, chhaih 2-na liata FC. Lalrinawma nata M. Lalremsangi zy ta pahnie awpa ta ama chhihtha.

Daihti pathaona liata ECM Chakhei biatuhpa Pro. Pastor Watson J. Byhnadao ta Kaolaosa 3:12-14 reipapuana hneipa ta pavaonsana a hnei.

Khaichhai Laipa nata Khichhai zachhihpa Puhpa M. Chiadung, Chairman, Town Committee zy ta biereina ama hnei hleikhô ta Puhpa T. Seido, EM i/c Sports & Youth Services etc. MADC, Puhpa Pheiki Solo, Art & Culture Promotion Officer, MADC zy ta biereina daihti ama hmâh.

Khihchhôh liata Schools nata NGOs zy hleikhô ta hrua-eihpa Chakhei-II MTP nata MTP Branch: Chhaolo zy ta Cultural item chi nano nanopazy ama palâsa.

Mara Artistes A. Chhualai, Jessica B. Khuhly, NT. Vabeido, T. Builaisui, Wilkinson B. Khuhly, Rovina Khaimeichho, Chhingpuii Azyu, K. Eunice zy ta hlasapa ta zawpi ama palôpahawh.

Atanoh liata Khichhai Laipa Puhpa M. Lailaw, Hon’ble CEM, MADC bierei tlâhpi viapazy:-

1.Siata zawpi nata Mararâh zawpi zy hnoh ta Langnechhe Samaw cha hlâ ei na ta, Kô kha chhôh eima hâpa Langnechhe Cha-ypi daihti miah tlôkheituhpa Khazohpa hnoh ta alynabie ei reih.

2.Atanoh liata Khichhai Laipa châ awpa ta nâ khokheituhla Organising Board nata a khih zawpi hnoh ta alynabie ei reih.

3.Langnechhe he Kô 1600 AD chhaichhyh tawhta hmâ pathaopa - chhâ a vaw y lymâ awpa liata eima chhy laih lymâ awpana peimawh kawpa a châ.

4.He noh liata pihnô puhpa, tusaw, sanawh nata chhôhkha zy ahmôthai leina a y pathlei khiah angiathaina raihri si la, eimâ tah thai leinazy vha ti ta phaoh, mei ta kâ tahpa hawhta palôh apatlâhna daihti cha-ypi a châ.

5.He khih, Mararâh nata khizaw kaoki liata a ypa Marasaw zydua, Chhôkha, viasa atah thai leinazy kôpachhâ, noh patla thlâh leipa ta, my khaipa ta palôhtlâh adyryh kawpa ta y awpa ta message eimâ paphao hmeiseih.

6.He liata aryhna noh practical ta eimâ hmâpa he Mararâh nata khizaw kaoki liata Marasaw zydua pôkha miakha ta eima siena noh vaw châ mawh sy.

7.Hlâno mahnô mahpaw tawhta taozie pha leipa nata hmopha leipazy cha siesai si la, eima Krizyhna nata akhypazy deikua pasô tah cheihchalo lymâ si la, he spirit nata practise he Marapa chhâ a vaw y lymâ awpa liata hmâh pazao lymâ achhuah suh u.

8.Molei angiathaina noh, Adyryhna noh, Okhathi Okhachha, Tusaw nata chhôhkha atah thai leina atah thaina noh vaw châsala, vaih nata tlâh nohâh y nawps ta apôhkha awpa ta eimâ pasyu.

9.Khitlâh chhihthana liata ryureina siapa, phapa nata pathaihpa y sa la, cha liata dâh nata phôh â bei chai awpa a châ. Eima râh liata Justice - adona laiseih sa la, eima râh hmiahao lai chaipa cha Paritheipa hmozy he a châ. Eima sawhkhâ ta a siekhei haipa New Maraland liata vision peimawh kawpa sâkha cha Mararâh he Drugs free land ta tao awpa a châ. He kyh liata Siata chhao hmah la lymâ awpa ta ei châ haw ei.

10.ECM ta târi 29.11.2023 he Abeipa lâ reihpha cheina hnei awpa tahpa châ ta, eima hmâ haipa Langnechhe nahta â chhuahpa miakha a châ; aly’pa a châ hmeiseih.  Atakô Langnechhe eimâ hmâna noh lia he ta Ngâchhihna he eima biepipa châ sala, lahpi/vahpa, pachutuhpa, Awnano chhituhpa, lyutaopazy, VC nata NGO leader-zy ta eima rai chyu liata ngâchhih kawpa ta hria chyu si la, Theilâ phapa sa papua achhuah suh u. 

11.MADC Sawhkhâna chhao ta Langnechhe Cha-ypi he â chupasia via ngâ kaw. He Cha-ypi noh liana he ta eima vaih nata tlâh liata eima taozie pha leipazy siesai noh ta hmâh si la, Ryureina phapa paduapathina no, he chi nata pho châta eimâ hlâna noh châ sala, Langnechhe 2023 he ta Byhnâ hluhpi vaw tlôkhei sala, eima râh nata Khizaw kaoki Marasaw zydua apôhkhana noh nata adyhryhna noh vaw châ sa la, Langnechhe 2023 he alypa nata thapha kaw ta ahmâ chyu awpa ta khokheina sâh chaipa ei cha hlâ chyu ei.

Atakô Langnechhe, noh 2 ta ahmâpa he khisaw zawpi pua pha kaw ei ta, khi nôpâzy chhao hruapa châ ei ta, MADC Art & Culture Department nata DDK, Aizawl ta Photo nata Video cover ei ta, a noh 2-na programme chhâ tawh he ta aryhna kyhchhi pati chhao Siata khihsaw zawpi nata khi hro lâ tawhta programme a vaw hlaopa zydua ta aly kawpa ta dôh chyupa a châ. 

Puhpa M. Laikaw he a lahpinô Pihnô HC. Napy nata a samoh nahzy ta zi ei ta, MADC nôpawpazy tawhta Puhpa T. Seido, EM i/c S&YS, Puhpa Beihu Nohro, Dy. Chief Whip, zy ta zi ei ta, Puhpa Pheiki Solo, A&CPO, MADC, Puhpa Beirokhu Beita, I & PO, Puhpa T. Vabeichotha, PA to CEM, Puhpa T. Pabua, Cameraman, Puhpa FC. Minela, Cameramam nata Artiste tawhta A. Chhualai, Chhingpuii Azyu, Jessica B. Khuhly zy ta ama zi. BJP District HQ, Siaha tawhta N. Beikhai, Vice President nata a lahpinô A. Jenny zy ta ama zi hra.