PRESS RELEASE

NO.118/2024

SIAHA, 23 Phiapi, 2024, Pachynoh – Atanoh dawh 10:30 AM kha ta Government Middle School, Khopai, kô 50 tlohna – Golden Jubilee alyna programme ahmâpa châ ta, he liata Puhpa M. Laikaw, Hon’ble Chief Executive Member (CEM), Mara Autonomous District Council (MADC) cha Chief Guest châpa ta 1st Session programme a hmâkhei.

Puhpa M. Laikaw, Hon’ble CEM chata, Government Middle School, Khopai Golden Jubilee Gate pahyna a hnei khai tawhta biereina daihti hmâh ta, atanoh Golden Jubilee alyna programme a vaw hlao theipa zydua hnoh ta anaohna a hlâ chyu ei. Biereina pazao ta, “Khopai liata Middle School kô 50 a vaw tloh theipa he nôpaw hmiatuapazy hriapasana theilâpa a châ; ama theilâpa miah papuatuhpa Khazohpa hnoh ta alynabie ei reih. Ama hriapasana hro tawhta achu tah, keih ama chakâna noh ta hmâh si la. He school he Headmaster phapa chhihthana ry liata mohôhpa, Mararâh pôpalohpa liata School phapa a châ tahpa eima vaw pahno; aly’pa a châ hmeiseih.”

“Khitlâh, School mohôhtuhpazy nata Pachutuhpazy ta School pha nawpa ta eima vaw tao hnolopazy chhâ a vaw y awpa châta tao pazao lymâ si la, Chi nata pho adua nawpa nata aboh nawpa châta cha achuna-education he a peimawh kaw tahpa pahno si la. Marasawzy châthaipa y leipa ei si la, ti a o chakhyhpa hawhta eima châ aw.”

“Sapa nata thlahpa liata sasyh ryureina - independent kawpa ta eimâ dua theina chhâpa cha Khazohpa vâta a châ; eima Missionary nahzy hmâpa ta miah tluapapua ta, eima District Council â vaw dua thei nawpa ta memorandum a rohtuhpa cha eima missionary nah ama châ. He hawhpa alyna daihti liata School nata châ miah pachu tua tuhpa eima Missionary nahzy zana hlâ pi ta, palôh liata eimâ thei.”

“Achuna liata hmah eima sie via lymâ thei nawpa ta eima theina hawhta NEP (National Education Policy) dâh chaka leipa ta eima school hawhti nahzy â khokhâh kawpa ta eima mohôh lymâ thei nawpa ta hmahla eimâ chhuah lymâ awpa a châ.”

“Chhôhkha, Khitlâh nata Awnanopa châta hmâtlâh châ awpa ta Khopai liata Primary School sâ 2 nata Middle School sâ 1 zy tawhta amohôhna pha kawpa ry liata achupa ta Students, châthaipa hluhpi vaw pua awpa ta khokheina ei cha hlâ hmeiseih ei.”

“Khopai he, hmialâ daihti liata cha lâkao peimawh kawpa a châ nahta ei hnabeiseih. Atanoh chhao, khichhôh liata motor hluhpi a vaw pahâ ta, Laki-Akyab azaona lâthlôh zy chhao a vaw y ei ta, he khih he sôhpaliena lâthlôh pha kawpa liata â duah aw. Pazu pavaw, râhsa zy pabohsana ta, Khopai râh he ama ngia â ryhna a châ awpa hleikhô ta, cha hawhpa lâlai, sôhpaliena lâthlôh ta a cha pia awpa khih nama vaw châ awpa vâta khichhai châta ngiaryh chhihpa khih a vaw châ thei nawpa ta atanoh tawhta eimâ patohpatia thieh awpa chhao, khitlâh lâta bie eimâ ta khoh kaw.”

“Middle School mohôhna kyh liata kô 50 chhôh liata a pha leipazy siesai si la, a pha viapazy he khitlâh châta eimâ lana noh châta hmâh, he noh he hmâh si la, Pachutuhpazy lia ngâlâh a pahnieh leipa ta khitlâh nô & paw zy chhao ta eima deichhy veichâh via lymâ awpa ta bie a tah khoh pi ta, atanoh he khihtlâh nata eima râh châta eimâ hlâ pathiehna daihti châta hmâh awpa ta eima pasyu khoh kaw” tahpa ta khokheina bie nata pasyuna bie reih ta, atanoh Golden Jubilee Celebration he aly kawpa ta hmâh chyu awpa ta zawpi lâ khokheina bie a reih hra.

Programme he chhaih 2 lâta pachhaihpa châ ta, Government Middle School, Khopai tlyhmia liata a hmâ raihriepa a châ. Chairman Puhpa B. Vamo, Headmaster, Government Middle School: Khopai ta chhihtha ta, Machâ J. Khili, Headmaster (Rtd.) ta Devotion a hmâh.

Laki biatuhpa MDC Puhpa T. Seido, EM i/c S&YS ta Golden Jubilee Souvenir palâhâhna nata biereina chyupa daihti hmâh ta, Beihu Nôhro, Dy. Chief Whip, MADC nata Puhpa Beirôkhu Beitâ, I & PO, MADC zy ta biereina chyupa nata hmia pahnosana daihti ama hmâh hra. Biereina likawh liata hlasa thaipa Priskily Bohia nata FC. Nipari zy ta hlasana ama hnei. School hawti zy tawhta Cultural item nano nanopazy palâsana hneipa ta programme ama palôhpahawh. Puhpa B. Hneisa, Vice Chairman, SMC, M/S Khopai ta vote of thanks reina a hnei khai tawhta 1st Session programme he pachhâsapa a châ.

2nd Session liata MSO Gen. HQ tawhta Puhpa Elson Eliasa Notlia, President ta biereina hneipa ta achuhaipazy pasyuna bie pha kawpa reih ta, K. Ngocho (Class-VII student, Gallily Zawhly (Class-VII student), Ls. HS. Maiso, MTP member zy ta hlasana hnei ei ta, M/S students tawhta Special item nata Couple dance zy pamosana ama hnei. Khitlâh nôpawpa tawhta Puhpa HC. Beihmochhua, VCP Khopai ta biereina daihti a hmâh hra. Daihti chhâna liata Mc. HC. Laikho, Teacher (Rtd.) ta thlahchhâna hneipa ta Golden Jubilee Celebration programme he pachhâsapa a châ.

CEM zachhihpa he BJP District Headquarters, Siaha tawhta Puhpa NT. Thatlua, President, Minority Morcha ta za zi ta, officials tawhta Puhpa Beirôkhu Beitâ, I & PO, Puhpa K. Vahrua, AE, PWD, Puhpa T. Pabua, Cameraman, Puhpa K. Nehemiah, Cameraman, Puhpa FC. Minela, Cameraman nata Puhpa Lalnunfela NK, PSO to CEM zy ta ama zi thei hra.

MSO General Headquarters tawhta Elson Eliasah Notlia, President, T. John Tennyson, Vice President, Austina Kiby, Treasurer nata Francis Bohia,Secy. i/c Games & Sport zy ta he programme he amâ hlao thei hra.

Programme chhâ tawhta khitlâh nôpaw nata SMC zy ta Khopai khihsaw zydua châta ama pachhuapanohpa Golden Jubilee Celebration kyhchhi cha aly kawpa ta khitlâh zawpi ta dôh chyupa a châ.

ISSUED BY:

Information & Publicity Department

Mara Autonomous District Council

Siaha.