PRESS RELEASE 

NO. 67/2026

Siaha, târi 18th Thlazoh, 2026 (Hriaheinoh) - Atanoh dawh 10 : 30 AM khata Puhpa M. Laikaw, Hon'ble CEM, MADC cha Students' Union(SU), Gov't Saiha College(GSC), Siaha ta apachhuahpanohpa  Freshers' Social nata Graduates' Felicitation Programme liata Khichhai Laipa (Chief Guest) châpa ta a hmâkhei.

Programme he Session ei 2 lâta pachhaihpa châta, 1st session he Zisahria Zawro, Vice President, SU, SGC ta chhihtha ta, KC. Beibaokhei, President , EU, GSC, Siaha ta Abeipa hnohta daihti pavaosana a hnei. Prof.Abdul Hannan Bharbhuiya, Principal, GSC, Siah ta Greetings piena daihti  hmâhpa ta, College ta programmes a taopa liata Chief Guest awpa ta Puhpa M..Laikaw ama hrua daihti maihta pa-ei leipa ta ama hruana hlao a patloh tyhpa heta CEM ta Achuna apa peimawhsa zie â lâ, a tah. Kô kha kô no tawhta Final result liata ama tla pahnai laihna zie reipa ta Students zy tiama papua via awpa nata attendance pachâ peimah awpa abyuh zie a reih. He hleikho ta India râh liata cha Degree Cirtificate he rai liata angia awpa ta entry pass hawhta achâpa vâta pass pha awpa abyuh zie chhao reina ahnei hra. 

Puhpa M. Laikaw, CEM, MADC ta 'The 39th Annual College Magazine' palâhâhna a hneikhai tawhta biereina hneipazi pata, "Atanoh Freshers' Social Meet programme liata khokheina na patosa ei chi ta, Khichhai Laipa ta hruapa ei châpa he ei ly hmeiseih," a tah.

"Siaha College he Siaha District liata College eima hneichhôhpa châ ta, hnabeiseih kawpa ta eima cha sai ngâthlâh ha ei. Thapawh kawpa ta Principal nata a hrialâhpa pachutuhpa nata Office liata hriapa zydua eima thlahchhâna liata châ thei ngâthlâh pi ta, he su tawh heta khati ta ma Mararâh châta chyhsa hmâtlâh châpa chhihthatuhpa ama kaw pua aw tahpa ta hnabeiseih kawpa ta cha hâ ngâthlâh pi ta, he College he training na su pha kawpa hawhta eima sai ngâthlâh ha tyh."

"Principal, Pachutuhpa zydua, he liata hriapa zydua nata achuhaipa zydua nama tiamana nata hriapasana zydua chô liata MADC liata CEM ei châna hawhta nama zydua chô liata alynabie ei cha hlâ chyu ei. He College châ heta khatino rai ta ei pahy ngâthlâh ha." 

"Atanoh programme he a special kawpa ta ei pahno, Freshers' Social Meet dei châ leipa ta Graduate thiehpazy alykheina châ pâ ta programme pha kawpa a châ. Atanoh ta new comers zy ei chi he step sâpalih nama kaw patlô tawhta he su vaw pangai theipa châ ei chi ta, he su liata degree ngâlâh la n’awpa châta nama palôh y leipa sala,  thaina, râh châta chyhsa hmâtlâh châpa namâ chhuah chyu awpa a châ."

"He su he nama talent papôhsana su vaw châ sala, daihti namâ hmâh thai kaw awpa he a peimawh ngaita kaw. Future pha kawpa hnei ei chi ta, ngâtlâh, apahniehtlâhpa châ namâ chhuah chyu awpa a châ. Ei viasapaw pakha heta taopathi thaipa châ sala, châ achu pathi ta, tiama kawpa nata a pha kawpa ta achu pathi heih awpa ei khoh kawna tahpa ta a reih."

"A daihti ta lia heta tiama papua ta, a pha kawpa ta châ achupa he pha chai ta, angiapachhina chhao y vei. College kiah pha he nama pachâ peimawh kaw awpa a byuh. Kei chhao châ ei chu nota absent beih va na, tlâhleina vâta leipa ta la."

"'Simple living high thinking' tahpa bie he my beih leipa u la, achu hai no la, simple kawpa ta atobi ta, tiama kawpa nata palôh hnei kawna chôta achu ta, high thinking deikua namâ hnei lymâ awpa a byuh."

"Palôh hnei kawpa nata tiama kawpa ta achu lymâ u la, Politician phapa, Awnanopa chhituh phapa, chyhsa hmâtlâh châpa châ namâ chhuah chyu aw," tahpa ta CEM ta pasyuna bie pha kawpa a reih.

Miss VL Hruaisangi, Asstn. Professor ta Graduates' Felicitation daihti hmâhta, Final result liata College tawhta ataopha chaipa Students, he ary liata palâsapazy he Award adaopazy ama châ:-

1. AFTAB PROFICIENCY AWARD (All Subjects) - Baros Chhatha Chozah s/o Beikhochhi Chozah

2. JOSEPH L CHINZAH(L) MEMORIAL AWARD (Mizo Subject) - Dony Lalruatpuia s/o C. Josua

3. M.LAIPHA (L) MEMORIAL AWARD (Political Science Subject) - HC. Beirathie s/o HC. Lekhai

4. Department of History Award - Baros Chhatha Chozah s/o Beikhochhi Chozah

5. Department of Education Award - NT. Mendy Varasorili D/O Thangvela

6. Department of English Award - Johan Laltlanhlua s/o Rohlupuia

7.  Department of Sociology - C. Totling s/o C. Beirangia.

He Programme liana heta Guest of Honour Puhpa Vanlaltlanchhunga, Ex.Associate Professor nata Puhpa Judson KT Zephatha, President, MSO, Hqrs., zy ta Students zy hnohta pasyuna bie pha kawpa ama reih hra.

GSC Artists zy ta College Theme Song sana hnei ei ta, K.Bonifence, General Secretary, SU, SGC ta Secretary Report a pie. Hraisua Cultural Club, GSC, Siaha ta Khocheinô Lâ nata Awkhypa lâ lâna ama hnei hrâ. J. Lalnunsanga, Secretary i/c, Indoor Games, SU GSC, Siaha ta vote of reina a hneikhai tawhta Ist session pachhâpa a châ.

ISSUED BY :

Information & Publicity Department,

Mara Autonomous District Council,

Siaha.