PRESS RELEASE

NO.95/2024

SIAHA, 22 Phiata, 2024, Hriaheinoh - Atanoh dawh 11:00 PM khata MADC Golden Jubilee Hall, Siaha liata Education Department P/S & M/S nata Local Administration Department, MADC pachhuahpanohpa Educational Motivation Cum Cleanliness Awareness Campaign Programme ahmâhpa châ ta, Puhpa M. Laikaw, Hon'ble Chief Executive Member, MADC cha khichhai laipa (chief guest) châpa ta â hmâkhei ei.

Programme he Puhpa TT. Kholaw, Sr. EO (P/S) ta chhihtha ta, Rev. Thylua Hlychho, President, Clean Siaha ta Abeipa lâta pavaosana devotion daihti â hmâh.

Jessica Ngody Hlychho nata S. Siamkungi zy ta  pahnie kawpa ta hlasapa ta zawpi ama palôhpahawh.

Puhpa M. Laikaw, Hon'ble CEM, MADC chata, atanoh Siaha Town chhôh liata VCPs, Middle Schools nata Primary Schools liata Pachutuhpazy he programme papeimawhpasa ta namâ vaw hlao thei vâta, nama chô lâ liata alynabie a hlâ ei.

"Khazohpa ta chi chyh kawpa châ hra ei sih la, Mongyuh râh tawhta Missionary miah kaw tuapa ta, Achuna (Education) leipa ta hmahsiena y thai vei tahpa ama pahno vâta eima Missionary nahta A,Aw, B miah taopa ei ta, Mawnah hlâta Biehrai (Bible) hnei tua pi ta, eima vâhnei hmeiseih," tahpa ta CEM ta a reih.

"Ei viasa pakha cha German lâ khitlyh ta, ei kha cha German liata a viasazy nahta râh lâ sie ei ta, lâchao achaty ei ta, lâchao ama nie khai nahta lâchao chatyna polythene, etc niena kha râhmâh lia thy ta, a viasa German zy ta a lâchao niena râhmâh liata a thypa cha a huah ei ta, ama lâchao byh liata khô ei ta, o ama tlô nahta dustbin liata ama thy e, nature he manmade hmo ta eima papua palei’pa châ vei tahpa ta ama chho. Kô 40 a khô hapa liata râh hmahsiepa liata  cha, cha hawhta ama vaw y ha," tahpa ta khichhai laipa ta a reih.

"Eima za pih tawhta thlâkhaoh eimâ ngia taih heta achuna he chhâ thai leipa ta, râh hmahsiena liata peimawh chaipa cha achuna (education) châ ta, nâmo pachutuhpazy ei chi he nama maophaohna â sâh ngâsâ tahpa he a thiehpa ta nama pahno heih awpa ta ei reih. Atahmâ ta nama pachu ngâ kawpa hawtizy kha eima râh chhituh awpa, Officers, Dawhty, etc ama châ tahpa pahno thlâh hana chôta, tiama kawpa ta nama pachu awpa a byuh," tahpa ta CEM ta a reih.

"Pachutuhpa nama châpa he aly kaw t’u, namo pachutuhpa ta Officer, Pastor, Dawhty, etc pakhazie ma nama papua haw, tiama kawpa nata ngâchhihna chôta nama siku hawtizy nama pachu lymâ awpa a byuh," tahpa ta khichhai laipa ta a reih.

"Khitlâh liata chyhsa hmâtlâh châ awpa ta chyhsa Awnano liata hmâtlâh châ awpa zy, Officer kaw châ awpa zy, lawyer, dawhty, etc a kaw châ awpa he nâmo pachutuhpa ku lia ama y tahpa he a thiehpa ta nama pahno awpa ei khoh," tahpa ta CEM ta a reih.

"Pathaihna eima pachâ peimawh via lymâ awpa byuh ta, eima zydua ta pathaihna kyh liata hriaparaohna phapa a y awpa he a za peimawh ngaita kaw. Khiliah liata hmozy eima thy chakhyh awpa châ vei. School lia heta nâmo pachutuhpazy ta nama siku hawtizy hnohta pathaihna peimawhzie he nama reih hluh via lymâ awpa a byuh," tahpa ta khichhai laipa ta a reih.

"Nama school chyu liata administration a pha kaw awpa a byuh. Siaha Town chhôh liata school pathaih chaipa châ a vaw chhuah chyu ula, a pathaih chaipa lymâ eima pie aw," tahpa ta CEM ta a reih.

Puhpa MH. Tiabi, EM i/c Edn (MS), MADC cha Guest of Honour châpa ta â hmâkhei ei ta, pathaihna peimawhzie pasyunabie pha kawpa reina a hnei hra.

Puhpa K. Beingiachhie, EO (M/S), MADC ta pasyunabie pha kawpa reina a hnei hra.

Pihnô S. Lalmuanpuii, Sr. LAO, MADC ta School Environment nata Indoor Air Quality pathaih peimawhzie PowerPoint Presentation hmâpa ta chhopasiana hnei ta, Siku hawtizy ta Mineral Water Bottle ruapa hmâh chaneipa ta School lâ ti do awpa amâ chei tyhpa a pha leizie a reih.

Voluntary Clealiness worker P. Sochha chhaota pathaihna peimawhzie pasyunabie pha kawpa reina a hnei hra.

Puhpa Joshua Chozah, US, LAD, MADC ta vote of thanks reina a hnei khai tawhta Abeipa thlahchhâna (The Lord's Prayer) reihparaohpa ta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.