PRESS RELEASE

NO.58/2025

CHAPI, 14 Patô, 2025, Pakhynoh - Atanoh kha Puhpa M. Laikaw, Hon'ble CEM, MADC cha Siaha puasaipa ta Chheihlu nata Chapi tlypa ta sie ta, Tipa 'D' nata Mawhrei liata Thopi vaw palôhdy ei ta, Chheihlu nata Chapi khih liata public meeting hneipa liata biereina a hnei.

He khino liata CEM zachhihpa bierei tlâhpi viapazy:-

“Siku hawhti, khitlâh nô & paw, NGOs nata VC nahzy nata miah mokhâhtuhpa zydua hnoh ta alynabie reih na ta, reception rônah kawpa nata programme pha kawpa miah namâ chhuanoh vâta alynabie ei reih.”

“Nama thlahchhâkheina zawhzi ta MADC liata Sawhkhâna eima siekhei thei lymâ vâta alynabie ei reih.”

“Khitlâh hmah a sie via lymâ thei nawpa ta VC nahzy ta Awnano nata NGOs nahta hriaparaohna phapa hnei lymâ ei chi ta, atanoh miah nama mokhâhna liata nama hriaparaohna nata support khochhihpazy mokhaoh ta hmô pi ta, MADC sawhkhâna miah nama deichhyna liata alynabie ei reih.”

“12th Term MADC he ta sawhkhânâ phapa (good governance) siekhei tah, New Maraland Vision hneipa ta Administration Reforms Commission recomendation hawhta sawhkhâna siekhei lymâpa châ ta, Chakhei liata Circle Administration Office pahy bâ awpa châ ta, Chapi, Chakhei nata Siata MDC biazy ta rainao viapa ta eimâ mohôh thei ha bâ aw.”

“Chahawhta MADC ry liata raihriapazy pha nawpa ta Common Recruitment Board paduapa a châ - hriatuhpazy tovyuh â lochopa nata âdopa to lymâ aw ei ta, dâh nata phôh â bei chai aw. DA chhao hmialâ tahpa hawhta anoeihta Executive Approval byuh khao leipa ta Mizoram sawhkhâ ta a papôh raohpa ta papôh lymâ bâpa a châ. Promotion kyh liata pathluana hnei leipa châ ta, service kyh liata rairuna ahneipazy châta Service Redressal Committee paduapa châ ta, atahmâ he 50 hlei ama duasu pado hapa a châ.”

“Eima Missionary nahzy zawhzi ta Ryureina eihrâhpa eima hnei vâta sapa & thlahpa liata pôhkha sie a byuh - ECM office liata aparipangapa amâ tlôh leipa hawhta MADC office lia chhao he hawhta ama y lei nawpa ta pathaipahâna rai hria lymâpa a châ.”

“MADC he atahmâ cha kô 50 hlei a vaw tloh haw; tahmâ he eima MADC Opi he ta miah a tlôh khao vei - eima châthai hluhpi rai hrai nawpa pachâpa ta MADC Opi he pakawh â daih haw. Chavâta biehneina lai viapa eima peimawhpa a châ tahpa pahno pi ta, biehneina lai viapa hiapa ta eima buakhei haipa châ ta - râh rônah viapa hnabeiseihpa ta he vision lâpi he eimâ chhihpa a châ.”

“He policy sianô kawpa hneipa ta hmialâ sawchhâ nawhchhâ châta Marasaw zydua lâpi phapa hnabeiseihpa ta atanoh riethei eima tao hnolo awpa a châ.”

“12th Sawhkhâna asiehaipa liata Golden Jubilee Hall zy hnei pi ta, Lunglei Mara House pahy hapa châ ta, Delhi Mara Hostel zy Siaha New Colony liata Hall zy, Tipa liata Bazarshed nata su hro lâ liata hmahlana siekhai haipa a châ hra.”

“NEP ta â hnawpa hawhta School to liata a byuhna hawhta Teacher full post ta so lymâpa liata Siaha town nata su hro lâ pathlua pa-eihna y leipa ta palyu lymâpa a châ.”

“Eima chipho aboh nawpa ta achuna - Education liata theina zydua papua awpa a peimawh.”

“Siaha khichhôh liata âhmie-âhna lasi zy he district hro lâ tawhta ama vaw zuapa sai châ ta, keimo sasyh eimâ tivy thei nawpa ta MADC Agriculture Department ta hmah eima la lymâ hrapa kyh liata lyutao ku raohriapazy tiama papua awpa ta eimâ pasyu.”

Puhpa Beihu Nohro, Deputy Chief Whip nata Puhpa C. Lawbei, Ex-MDC & Vice President, BJP Siaha District zy ta Chapi public meeting liata biereina chyupa hnei ei ta, Puhpa Pawkhu T. Azyu, General Secretary, BJP Siaha District ta Chheihlu Public Meeting liata hmiapahnosana a hnei.

CEM zachhihpa he Puhpa C. Chehnei, Deputy Chairman, Puhpa Beihu Nohro, Deputy Chief Whip, Puhpa Albert TT. Sachu, MDC nata Puhpa B. Dawpho, MDC zy ta zi ei ta, officials lâ tawhta Puhpa Beirôkhu Beitâ, I & PO, Puhpa K. Laitha, AEO, Puhpa JS. Beizawzilai, Legal Consultant, MADC, Puhpa NK. Lalnunfela, PSO to CEM, Puhpa FC. Minela, Cameraman, Puhpa K. Nahemiah, Cameraman zy ta ama zi. 

BJP Siaha District tawhta Puhpa C. Lawbei, Ex-MDC & Vice President, Puhpa Pawkhu T. Azyu, General Secretary, Puhpa Thychha Chozah, Secretary, Puhpa K. Beipachharona, Vice President, BJYM nata Ls. Caroline Chhaihlo, Vice President, BJYM zy ta zi ei ta, Puhpa Jeffrey Khara, Moonlight Editor ta zi thei hra ta, Ls. J. Vahneiso (Mara Idol 2024 Top-5 nata Ls. Pricilla Nôtlia, (Mara Idol 2024 Top-7) Artiste-zy ta ama zi thei hra.

ISSSUED BY:-

Information & Publicity Department

Mara Autonomous District Council

Siaha.