PRESS RELEASE

NO.20/2025

SIAHA, 14 Hmypi, 2025, Chutynoh - Puhpa Puhpa M. Laikaw, Hon'ble Chief Executive Member, MADC ta 11-13 February, 2025 chhôhta a bia a tly.

Puhpa M. Laikaw, Hon'ble CEM chata, "2025 January thlâpâ liata ei bia tly’pa achhuah na ta, Awnano programme zy a y vâta January thla chhôh liata cha za tly hmâ leipa ei na ta, Khazohpa ta daihti rypaohpazy miah pie ta, February thlâpâ liata cha za tly thei ei na ta, tlâhboh kawpa ta hmiazy ahmô thei pi ta ei ly hmeiseih," a tah.

"District Council liata nôpawpazy khokheina nata deichhyna vâ nata Khazohpa ngiachhiena vâta nôpaw chaipa duasu CEM liata na soh ei ta, Cha hleikhô ta, Party President liata na soh ei ta, ei sia vâ tlyma, ei tloh kaw vâ tlyma, châ leipa ta, Khazohpa ta ei bia châ nata Mararâh châta eina paduapa hawhta pachâ na ta ei ly hmeiseih. He hawhpa Golden chance, CEM châpa, Central ruling party liata Party president châpa tahpa he a y thai khao nah ta chhao pangiasa chhih vei, Khazohpa ngiachhiena vâ deita a châ," tahpa ta CEM ta a reih.

CEM chata, "Abeipa Khazohpa lâta alynabie eima reih lymâ awpa he a peimawh ngaita kaw. Paritheipa khâ adyuh lymâ sih la, achuna he eima papeimawhsa chai awpa a châ. Achuna liata sôh nah thih pahryuhpa he hmo pha chaipa a châ," a tah.

"Awnanopa apôhkhana a vaw ypa he aly’pa châ hmeiseih ta, Marasawzy pi he Khazohpa byhnâ eima to lymâ nahta ei pangiasa. Biehneina laipa chhao hlaotlohna eima to nahta ei pangiasa. CT Scan chhao reileipa liata eima hnei aw. Aly’pa a châ hmeiseih," tahpa ta CEM ta a reih.

CEM chata, "Council liata paripangana chôta Office a kiahpa cha pathleih awpa ta chho pi ta, a pathleih khoh leipa cha ama rai eima pabâh lymâ aw. Adona (Justice) he eima papeimawhsa chai aw," a tah.

"Viarâh tawhta Ngasa nata âhnalasi chemical hmâpa ta Mararâh liata zuapa châ ta, eima nie tyhpa he pha lei kaw ta, eima hnatlâna pha thai vei. Tiama papua chyu sih la, keimo eima hriapapuapa cheingei nie ta, ativy awpa he peimawh ta, tiama papua chyu suh vy," tahpa ta CEM ta a reih.

CEM chata, "Ngiadih O tawhta Râhvâ O, Râhvâ O tawhta Concrete O tahpa palôh hneipa ta Khizaw hmahsiena he tiama papuapa ta hmia eima tôh lymâ hr’awpa a châ. Achuna he tiama sih la, hriapasana kyh liata tiama lyhlia sih la, châ achu khoh kaw ta admission la n’awpa hnei leipa cha na chho u la, ei theina rakha ta eimâ baokhâ lymâ aw," a tah.

"Palôhrie apatheisa ta negative kawpa ta azohna lâ sai saipa ta daihti hmâh leipa u la, thlalôh kawpa ta y u la, Khazohpa hmiapasah lymâna chôta thapawh kawpa ta tiama kawpa ta hmia nama tôh lymâ awpa he a peimawh hmeiseih. Thâchhie areihpa nata a eichhiapa he bâhsai sih la, atakô kô thiehpa he byhnâ eima to kô vaw châ lymâ sala tahpa ei khokheina sâh chaipa ei cha hlâ chyu ei," tahpa ta CEM ta a reih.

Puhpa L. Prisila, EM i/c PWD, etc MADC nata Puhpa Tiahlei Syuhlo, EM i/c EF&CC, etc MADC zy ta pasyunabie pha kawpa reina ama hnei hra.

Lôdaw, Bymari, Lômasu, Tôkalô, Lôpu khih zy ta niebaw pahâh kawpa CEM nata azituhpazy châta vaw pachhuahpanoh ei ta, aly kawpa nata pybie kawpa ta dôkhohpa a châ.

Pala, Miepu nata Khaikhy khih liazy ta thopi nata âhmie pahâh kawpa chhaota CEM nata azituhpazy vaw dy ei ta, aly kawpa nata palôtlâh kawpa ta dokhohpa a châ.

Puhpa K. Thaichhua (Duahlu Paw), Laki English Academy hneituhpa ta CEM nata azituhpazy Laki khih liata niepahmaohna taopa ta aly kawpa ta zâpati dô khohpa a châ.

Puhpa M. Laikaw, Hon'ble CEM, MADC he Pihnô A. Nelly, MDC and Vice President BJP Siaha District, Puhpa MC. Beichônôchai, Secretary, BJP Siaha District, Puhpa KT. Sema, Dy. DPC, Samagra Siaha District, Puhpa N. Abela, RO, Vahia, MADC, Puhpa N. Moho, ASO, MADC, Puhpa John Chozah, CEO, MADC, Puhpa Pawsa Lava, AITO, MADC, Puhpa K. Beichhua, JE (PWD), MADC, Puhpa Reily Kaphmingthanga, Head Surveyor, MADC, Puhpa Vabeipathai Hlychho (Patla), Surveyor, MADC, Puhpa Martin L. Hlychho, Cameraman, MADC, Ls. HC. Ngôsua, Mara Idol 2024 Top 10 nata Media lâ tawhta Puhpa M. Baithai, Editor, Chhim-Aw zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.