PRESS RELEASE

NO.32/2023

SIAHA, 11 Hmypi, 2023, Pachynoh - Târi 10 & 11 Hmypi, 2023 chhôh ta Official tour programme taopa ta Puhpa M. Laikaw, Hon’ble CEM, MADC ta a bia liata khih sâkha - Lôdaw cha târi 10.2.2023, Chutynoh liata angiapa ta he zâ he Lôdaw liata â rie. He he MADC 12th Term sawhkhâna thiehpa liata CEM a vaw châ tawhta Lôdaw a tly hmiatuapa châ ta, a bia ei 2 a tlyna a châ.

Lôdaw khihsawzy ta ano alykheina châta programme pha kawpa vaw pachhuahpanohpa ta arônah kawpa ta pawpiri chhao ta vaw dy ei ta, welcome reception daihti pha kawpa ahmâpa ta alykheina ryuchâ zy ama hlâ. Alykheina programme chhâ tawhta alykheina kyhchhi zâpati cha khitlâh ta dôh chyupa châ ta, azo lâ ta public meeting hneipa ta aly kawpa ta daihti ahmâpa a châ.

Atanoh târi 11.2.2023, Pachynoh liata Lôdaw tawhta Siaha pangaipa ta avaw thaopa ta dawh 11:00 Am pa ta Palâ khih a vaw ngia ta, Palâ khihsawzy ta dyna gate nata pawpiri chhao ta vaw dy ei ta, alykheina Ryuchâzy ama hlâ hleikhô ta MTP Dance (MSO), Rakhâtla (MCHP) nata Sawlâkia (MTP) - pho lâzy pamosapa ta programme pha kawpa vaw pachhuahpanoh ei ta, alykheina kyhchhi zâpati chhao amâ chhuanohpa hra. 

Atahmâ khitlyna liata a bierei tlâhpi viapazy:-

“Khitlâh nopaw, zawpi khihsawzy nata siku hawti zy ta nohâh nataopa ta khokheina pawpi & hmosai piepa ryuchâzy hleikhô ta dyna gate rônah ngaitapa na taopa ei chi ta, biereina daihti phapazy eina pie vâ ei chi ta palôh hmeiseihpa alynabie ei reih.”

“Noh nata daihti pha kawpa nâ pie tuhpa Khazohpa hnoh ta alynabie ei reih; 12th term MADC Election liata khokheina nâpatosa tuhpa bia zawpizy hnoh ta alynabie reih na ta, CEM châna dyuchhai rônah ngaitapa nâpatosatuhpa eima Khazohpa nata râh ei chakaolâhpa zydua hnoh ta alynabie ei reih.”

“Bia tlypa ta alynabie reina daihti thlai avaw y patoh thei lei vâta nata rypaohna thlai a y patoh thei lei vâta pachâthaina ei châ haw ei.”

“Khazohpa khozie hawhta adona, siana, pathaihna nata areisina ta Khazohpa angiarih si la, Marasawzy pi Khazohpa ta miah a chaluah lymâ aw.”

“Atahmâ sawhkhâna thiehpa liata New Maraland, zawpi sawhkhâna, good governance padua aw pi ta, phuh alana nata apathlua-pa-eihna y lei; âraohâh kawpa ta raihria aw pi ta, nôkha pawkha saw hawhta kyh apachâ raihrie, chhâ avaw y lymâ awpa châta lôbô bô eimâ chhuah.”

“Awnano & NGO zy hriaparaohna chô ta Drugs, HIV/AIDS nata Pari theipa zy adyuh aw pi ta, Trading License hmâhpado leipazy eima mohpasia aw; zawpi nata sawhkhâ raihriapazy ta ama tovyuh dopa ama tona sawhkhâna padua aw pi ta, biehneina lai viapa chhao eima tei pazao lymâ aw. Chi hro pho hropazy chi/za tlâh châ awpa ta he sawhkhâna he siekhei eimâ chhuah.”

“Eima Missionary nah vâta MADC eima hneipa hawhta Khazohpa khinarâh apakawhsa tuhpa châ achhuah si la, ahy rai suhrawh sukha he eima piepado cheingei awpa a châ.”

“Marasawzy keimo kho ta aduapapua achhuah chyu si la, management thai achhuah chyu suh u. Sawhkhâ rai hriapa ativy leipa eima y awpa châ vei; Loan lana kyh liata asohsi si la, hlao advance ta la tyhpa bâsai si la, Moral reformation - pathipalôh ataopathina hnei achhuah chyu suh u.”

“Ryu sôh kawpa Saw nawhzy achuna - Education liata tiama papua via lymâ si la, osa lyutaona kyh liata ei viasa - ei heih level nahzy taotheipa ei tao thei hrana tahpa palôh phaona chô ta arâpasuana pathaihpa liata arâpasua ei suh u.”

“Biehneina, Ryureina nata Râh zy cha Khazohpa eih a châ hapa vâta eima Khazohpa nahta hrialâh awpa achhuah chyu si la, Khazohpa khozie hawhta ti nata râh ei chakao thei nawpa ta thlahchhâ na bao lymâ u la, abyuhna nata â ngiahna liata na pasopakâ lymâ awpa ta ei châ haw hmeiseih ei.”

CEM zachhihpa he Lôdaw liata School O tly pâ ta, School liata ama rairunazy nata ama peimawhpazy ama tlôkhei pâ hra. Chahleikhô ta Maisa liata Primary School O cha Lâpi pakawh awpa vâta pasie byuhpa kyh liata khitlâh nôpawzy ta School O thiehpa sa nawpa su ama khopazy reikhei ei ta, a pôhpa tlaih ta ama khopa suzy mokhei ta, Laty biatuhpa MDC nata Land Revenue & Settlement Department zy asaohiahna chô ta biechhâna tao awpa tahpa a châ.

Puhpa M. Laikaw, Hon’ble CEM he a lahpinô Pihnô HC. Napy nata a viasazy ta zi ei ta, officials tawhta Puhpa TT. Kholaw, RTO, Puhpa BeiRôkhu Beitâ, I&PO, Puhpa R. Beilochai Khithie, Inspector of Statistics, Puhpa T. Pabua, Cameraman zy ta zi ei ta, BJP District HQ, Siaha tawhta Pihnô A. Nelly, Vice President, Satlia MC. Beichonôchai, Secretary (GAD), Puhpa CH. Chhunga, Convener, IT & Media Cell nata ama hrialâhpazy ta zi ei ta, Huasua Net tawhta Puhpa Aron Chhachhai nata a hrialâhpa zy ta zi ei ta, Senior Artistes Puhpa John Beizachhi Phuto nata Laihsa Chhingpuii Azyu zy ta hlasapa ta ama chakaochahlâh hra. 

ISSUED BY:

Information & Publicity Department

Mara Autonomous District Council

Siaha.