PRESS RELEASE

NO.62/2023

SIAHA, 23 Pamih, 2023, Pobienoh – Atanoh dawh 11:00 Am pa ta pathaopa ta Government Siaha College Seminar Hall, Siaha liata Mizoram Journalist Association (MJA) 49th General Conference hneipa liata Puhpa M. Laikaw, Hon’ble CEM, MADC cha Chief Guest châpa ta programme a hmâkhei.

Programme he Puhpa Lalremsiama, Vice President MJA General HQ ta chhihtha ta, Puhpa M. Baithai, President MJA Siaha ta alypangiana biereina hnei ta, Puhpa Joseph Lalnuntluanga, Secretary MJA General HQ ta hmiapahnosana hnei ta, Puhpa John Beizachhi Phuto, Laihsa Jessica B. Khuhly nata Laihsa B. Prisikily zy ta hlasapa ta zawpi ama palôpahawh.

Puhpa Lalrinmawia Sailo, General Secretary MJA General HQ ta MJA amâ chhihthana nata rai ama vaw hria chiehpa liata report âki chochâ kawpa ta pie ta, Puhpa Lalnunzira Chawngthu, Secretary, MJA General HQ ta MJA member a châ tyhpa, chhâzaw râh lâ asie hapazy thâtih chyupa reina nata taokheina chhihtha ta, athi hapazy pasaileina ryuchâ cha ama chhôhkhazy hnoh ta hlâna a hnei. 

Puhpa C. Lalrambuatsaiha, President, MJA General HQ ta MJA member thiehpazy lapangiana daihti hmâh ta, Puhpa K. Zothanpara, Secretary MJA General HQ ta alynabie reina a hnei khai tawhta 1st Session pachhâpa a châ.

Khichhai laipa Puhpa M. Laikaw, Hon’ble CEM chata biereina chyupa daihti hmâh ta, “Siaha District ta MJA General Conference eima patlôpa a ei kha nawpa châ ta, he hawhta daihti sôh kawpa liata khichhai laipa ei châ theipa he arônah tah na ta, ei ly hmeiseih. Ahmiatua liata ei rei khohpa cha Mizoram liata District Council sâ 3 hnei pi ta, Journalist zy ta District Council he khâpa ma a châ tahpa cha nama pahno kaw sai nahta hnabeiseih na ta, nama subject a châ lei vâ deikua miah study khei lei thei ei chi ta, MJA Members, Mizoram District hro hropazy tawhta avypakhypazy hnoh ta ei rei khohpa cha, keimo he Sixth Schedule (to the Constitution of India) ry liata ypa eima châ. Introduction to District Council, Mizoram tahpa lâ chhâh rei khoh na ta, 1st, 2nd, 3rd, 4th, 5th nata Sixth Scheduled y ta, Sixth he Article 751 nata 242 pahlyhpa ta taopa a châ. Athaipazy reipasiana liata cha Sixth Scheduled he Special Constitution a châ tahpa ama reih. Autonomy chhopasiana liata eima Mizoram hyutuh hmiatuapazy ta eima châna dopa ama pahno lei vâta District Council nata State likawh liata kheihawh rairuna ma eima hnei tyhpa a châ. Central Ministry lâ liata chhao reih tyh pi ta, Subject noeihpa ahneipa nata District Council liata Subject 10 – Revenue, Art & Culture etc. piepa eima châ.”

“Direct Funding tah heih pi ta, State tawhta ala pananona châ leipa ta, pamopâsa nawpa ta, State sawhkhâ ta miah a pamokhâhsapa “Entrustment of Power” miah ama piepa cha District Council ku liata pahniehpa ta State ta a withdraw ta, keimo he 100 liata 100 miah pamohôhsa lâlao sala cha Duplication nata Corruption he chyh via aw ta, hmah chhao eima sie via cheingei aw. Chahawhta siethei awpa ta Central Ministry lâ chhao eima tlôkhei haipa a châ. Parallel System pachhâsa awpa he apeimawhpa a châ. Central chhao ta a khona dâh châ hra ta, Central ta District Council miah a pie hapa tawhna he ta Full Empowerment miah pie lâlao awpa nata miah pa mohôhsa awpa ta eima hiah ngâhai” tahpa ta Journalist zy hmiakô liana heta biereina hnei ta, MJA General Conference avaw hlaopa zydua hmialâ ama sie lymâ nawpa liata khokheina hlâ ta, atanoh zâlâ liata âmo châta zâpati, CEM Bungalow liata a pachhuapanohpa liata ama zydua ta dôh chyu awpa ta hruana tao chaneipa ta biereina daihti he a pachhâsa.

ISSUED BY:-

Information & Publicity Department

Mara Autonomous District Council

Siaha.