PRESS RELEASE 

NO.36/2026

Siaha, târi 22 Pachawh, 2026 (Pakhynoh) - Atanoh dawh 11: 30 AM liana khata Board of School Education, MADC pachhuahpanoh pata Model Students Scholarship adaopazy hnohta lymâ (Cash Award) raina programme cha Golden Jubilee Hall, MADC liata hmâpa a châ.  Puhpa M. Laikaw, Hon'ble CEM, MADC nata Puhpa S. Laremthanga, Hon'ble Dy. CEM, MADC zy cha Chief Guest nata Guest of Honour châpa ta lymâ raina daihti ama hmâkhei.

He programme he Puhpa BM. Khaimeichho, Secretary, BSE, MADC ta chhihtha ta, Rev. RK.Chozah, i/c. NCPB ta Abeipa hnohta daiti pavaosana(devotion) a hnei.

Puhpa M.Laikaw, CEM ta biereina hneipa ta, " Chairman, devotion miah ahmâpatuhpa, MADC liata ei hrialâpazy, Officers nata Staffs, MSO chhihthatuhpazy, MJA Siaha Members, atanoh liata lymâ dao awpa ta he su avaw ngaipa Students, Teachers,  Students Nô nata Paw  nata he liata âvypa zydua ahmiatua ta MADC mohta Samaw ei cha hlâ ei. Eima Nôpaw hmiatuapa nahzy ta patua paluana pha kawpa hneina chôta MADC Model Students Scholarship award he vaw tao ei ta, atanoh he keima chhao programme  eikha ei hlaona a châ. Atanoh he alypa a châ hmeiseihpa ta pahno na ta, Chief Guest châ awpa ta na khokheituhpa; He Department atotuhpa EM, BSE liata Officers nata Staffs zy hnoh chhaota alynabie ei rei".

" Atanoh liata Students lymâ dao awpa ta âvypazy CL - IV, V , VI & VII tawhta athaipatluapa ta atlyhpa nama châpa he nama vâhnei hmeiseih. Lymâ châta Budget liata Rs, 600,000/- ( Lo charu) sopa châ ta, Students 100 hnohta pie awpa châ ta, mo pakhata Rs, 6,000/-(Sâh charu) ama dao aw".

"He scholarship dao thei awpa ta Students (CL IV - VI ) hlupi hry tawhta Student amopâ tlâh achâpa(Model Student), rei ângiahpa nata tiamapa nama châpa vâta atlyh pa nama châ. Students hry liata  vâhnei patluapa nama châ tahpa he namâ pahno awpa ta ahmiatua ta ei rei khoh. Atanoh he nama Nô nata Paw, nama Pachutuhpazy rei namâ ngiana, nama tiama nata ngâchhihna, nama nochâ hrozie ta he lymâ daothei awpa ta he su liata achâ vaw chhipa ei a châ, tahpa he namâ pahnokhai nah ta ei pangiasa. Atanoh liata bie ei châta khohpa ei cha; sâkhana liata, hmialâ namâ chu laih lymâ nawpa liata nata nie tluana nama hneina diaihti lia chhaota atanoh liata Model Student (amopâtlâ achuhaipa) ta atlyhpa nama châpa he thaina kyh liata achaipa, rai liata ngâchhihpa châ lymâ awpa nama châ tahpa he nama my awpa châ vei. Sânona liata cha, reingiana, hrozie nôchâ papha, pathaina nata atyu duana kyh liata amôpa tlâ châ awpa ta nama hro liata nama paleisa awpa a châ. Sâthôhna liata cha, Apakhy, Sunday School kia pathlie leipa ta, Khazohpa china nata Nô nata Paw reingiahna he nama pathlie awpa châ vei, tahpa he bie ei chata khohpa ei a châ. Atanoh liata model Students nahzy chi he eima Chi nata pho, ti nata râh pabohsa awpa nata chhôhkha nata khitlâh, Râh duasu cheihchalo awpa ta eimâ hnabeiseihpazy nama châ tahpa he khâ nama pahno ngâthlâh ha awpa a châ".

"Atanoh eima Sawhkhâna asie ngâpa chhao heta Education he priority khâchâ piepa ta Centre liata project pangiapa ta PMJVK tawhta atakö he School O sâ - 14 nata NEC tawhta sâ- 2 sa awpa a châ. Khizaw hmahsiena apha hra awpa ta School to liata smart class tao awpa ta atahmâ tah Sawhkhâna heta hmah ala ngâ hra"

" Nô nata Paw, Techers zy bie ei chata khohpa ei cha,; achuna liata hlaotlohna eima hnei theina awpa ta lômathu hawhta achâpa, Teachers, Nô nata Paw, Student he achâ. He miathôpa nah pi he khâchâ eima hriaparao awpa a châ. Atanoh he hmophaleipa, paritheipa, ngâchhih leina, khizaw technology hmasiehna; mobile phone nata hmohropazy heta eima ochhi chakhyhpa ta miah angiahnao ngâpa he hriaparaohna phapa hneipa ta eimâ dyuh awpa he abyuh hmeiseih ha. Khazohpa ta âtllyh papuapa Râh, Chi nata pho ta aduah papua lymâ ta, chhâ thiepa (Next Generation) a vaw y awpa châta Zawpi ta maophaohna hnei chyu pita, cha eima maophaohna cha hriaparaohna phapa hneina chôta hlao eima patloh awpa ta ei châ haw " tahpa ta CEM ta a biereipa a pachhâsa.

Puhpa S. Laremthanga, Dy. CEM chhaota biereina hneipa ta, " atanoh liata eima Râh, Awnanopa, Chhôhkha, NGOs nata Sawhkhâ chaota eima buakhei chaipa cha paritheipa he a châ. MADC liata ahriapazy hry liata paritheipa liata âsohsi theileipazy liata action la lymâ pata, home liata sopazy chhao ama y. Atanoh, Model Students Scholarship adaopazy hnohta bie ei chata khohpa ei cha, paritheipa ahniahni ta, nama tao awpa rai châ vei. Paritheipa heta sapa nata thlahpa paraopa ta, achhâna liata ta cha hrienasu (meitipo) atlôkhei tuhpa a châ. Nama Nô nata Paw, Pachutuhpazy hmiakô liata paritheipa taolei awpa ta bie namâ taih awpa a châ, cha chata nama lâpi cha chhihtha aw ei, Khazohpa Byhnâ chhao nama to hra aw". tahpa ta Dy. CEM ta Students zy a pasyu ei.

Pihnô V. Melichi, OS, BSE ta report a pie.Programme âhlaopazy Teresa Ngianô Hlychho, Mara Idol ta hla sapa ta a palópahawh ei. Bei Thlahchâna (Lord's Prayer) rei paraohna hneikhai tawhta daihti pachhâsapa a châ.

ISSUED BY:

Information & Publicity Department,

Mara Autonomous District Council,

Siaha.