PRESS RELEASE

NO.09/2023

SIAHA, 17 Nawh, 2023, Hriaheinoh - Atanoh dawh 2:30 Pm pa ta Machâ Pakha Hlychho, ECM Elda, Amôbyuh Awnano Hyutuhpa nata chhôhkhazy ta ama pahrâna Opi, Amôbyuh ‘B’ liata ama tusaw Puhpa M. Laikaw, Hon’ble CEM, MADC cha alykheina hneipa ta Abeipa lâ alynabie reina nata thlahchhâ kheina hneipa a châ.

Thlahchhâna programme he ECM Amôbyuh biatuhpa Pro. Pastor FC. Pawmoti ta Chairman châpa ta chhihtha ta, Biehrai Pathaihpa Rawma Mozy 8:28 reina nata pavaosana thlahchhâna a hnei.

He khai tawhta Puhpa M. Laikaw, Hon’ble CEM cha biereina hnei awpa ta hruapa a châ.

Puhpa M. Laikaw chata atanoh daihti phapa nata hmorônahpa tao tuhpa Khazohpa hnoh ta alynabie reih ta, a puhpa ta Awnano nata khih nôpaw châna palâsapa ta he hawhta thlahchhâna daihti a pachhuahpanohpa cha â ly zie reih ta, atanoh liata azâ deichhy tuhpa EMs, Elected office holders & Officer thokhazy nata Party lâta nôpawpazy azâ zipazy hnoh ta alynabie reih ta, Siaha liata Opa lyuhri nata Tipa nata khi hro lâ tawhta chhôhkha avy theipazy hnohta alynabie a reih.

He a biereina liata Mararâh Ryureina sâh chaipa MADC Opi liata Khazohpa ta ryuhreih hra awpa ta chhaichhi a hmâpa ano nata a hrialâhpazy Sawhkhâna ta padua amâ chhuahpa Maraland thiehpa châta nata Ryureina phapa, adopa nata siapa ta sawhkhâna ama siekhei thei nawpa ta thlahchhâkhei awpa ta ahawna a tao.

Eima Missionary nahzy zawhzi ta MADC eima hneipa hawhta Awnanopazy chakuchavei awpa he apeimawh ngaita. Kô 50 MADC a sie hapa liata aphapa nata apha leipa hluhpi a y thei aw - Ryureina dawkâh he Khazohpa eih achâma hawhta ahneituhpa khozie hawhta raihria/ryureih eimâ chhuah lymâ aw. Moto zydua ngiatlâh araohpa ta mohôh; phuh lana y leipa sa la, Khazohpa palôh patlâh si la, chi hro pho hropazy ta Marapa chi he ama mo pasâh lymâ thei aw.

Puhpa M. Laikaw, CEM zachhihpa chata atanoh programme he Mararâh chhihthana kyh liata Abeipa ta byhnâ a pie cheingei aw tahpa ei thlahchhâna a châ tahpa reih ta, atanoh liata biatuh pastor nata khitlâh nôpaw avy theipa zydua hnohta alynabie reih hra.

Mrs. Pakha Hlychho ta chhôhkha vyuhpa ta alynabie reina hnei ta. Chhôhkha lâ thina eimâ tyh khô lâ ta Mararâh liata nôpaw chaipa duahmo liata â vaw duapa he aly kaw pi ta, alykheina hnei awpa eimâ chhuahpa hlao a tloh thei vâta eimâ lynazy â ki hmeiseih; râh ryureihtuhpazy Abeipa liata apahnieh u la, adona, ngâchhihna chô ta - ahy pathluana hnei leipa ta ryureih awpa ta khokheina ei cha hlâ ei tahpa a reih.

Daihti chhâna lâ liata zawpi thlahchhâna hneipa châ ta, CEM châta Adona hneina chô ta rai a hria thei nawpa nata Rietheipazy viasa a châ thei nawpa ta thlahchhâkheina topic chhao taopa a châ hra.

Machâ Pakha Hlychho nata chhôkhazy ta alykheina kyhchhi zâpati amâ chhuanohpa cha aly kawpa ta dôh chyupa a châ.

ISSUED BY:

Information & Publicity Department

Mara Autonomous District Council

Siaha.