PRESS RELEASE

NO.59/2025

CHAPI, 15 Patô, 2025, Pobienoh - Atamy dawh 7:00 AM kha ta Puhpa M. Laikaw, Hon’ble CEM, MADC ta Chapi khih liata Hermon Primary School, Chapi-II  Building thiehpa a pahy. He Building thiehpa he Chapi-II VC ôna chhôh liata ypa châ ta, khitlâh ta sôh thyupakhypa ta ama sapa a châ.

He daihti liata Puhpa M. Laikaw, Hon’ble CEM chata biereina chyupa daihti hmâh ta, Teacher-zy hnoh ta pasyuna bie reih ta, “Teacher-zy ta Studentazy châ pathaisa awpa ngalâh dei châ leipa ta, ama pachâna-moral pado-parao theina taihta maohphaohna nama hnei; Private school a châ no ta tiama kaw, sawhkhâ school a vaw châ nahta ama rai lia diathlâ heih tahpa school a hluh tu haw. Nâmo cha chahawhpa nama vaw châ awpa cha pasaih vei na.  Teacher paritheipa a taopa ama ypa he pha vei, paritheipa ataopazy chô liata action la lymâ awpa a châ.”

“Teacher zy ta ama pachu awpa chapter zydua ama pachu patlô cheingei awpa a châ, he kyh liata MSO nahzy chhao mokhei awpa apha kaw aw.”

“Financial literacy lia eima ahnai kaw tah thei awpa ta sôh hmâ dâh chhao eima thai lei vâta teacher zy ama hlao adaih leipa ama hluh kaw. Financial management eima thai lei vâta hlao advance zy hiah tyh pi ta, he he hmo phapa châ leipa ta, ataopathi ha ei suh u” tahpa reih ta, School hawtizy Khazohpa chizana pahneisa awpa ta devotion zy adaihtita lia hnei tyh awpa ta pasyu ei ta; achuna he pachâ peimawhpa ta hawtizy pi patlohsa awpa ta ahawna nata pasyuna bie chhao ta khokheina bie a hlâ ei.

He khai tawhta New Chapi Middle School chhao tly ta, School hawtizy hnoh ta pasyuna bie pha kawpa a reih.

Dawh 9:30 AM pa ta Mawhrei khih avaw ngiapa ta Community Hall liata public meeting hnei ta, Mawhrei khihsaw nata School hawhti zy ta dyna gate taopa ta a rônah kawpa ta ama vaw dy. 

He daihti liata CEM zachhihpa chata biereina chyupa daihti hmâh ta, “Saw nahzy achuna liata ama diathlâ lei nawpa ta pasyu awpa a châ; education leipa ta râh hmahsie hmeiseih thei vei; achuna liata arâpasua tah, sôh chhao hmâh via lymâ awpa a peimawh; Education he chi nata pho aboh nawpa a châ” tahpa a reih.

“Eima ti nata râh he ta khâpa ma a sa papua thei aw tahpa pachâ suh u. Kuphei adua awpa he Marasawzy eimâ tivy nawpa a châ.”

“Sôh hmâ dâh eima thai lei vâta hlao hluhpi hneipazy nata sôh hluhpi la pangiapazy pi ta adôkhaw thai ma pi - economy eima thai awpa a châ.”

“Khihsa riethei nata dyhchhiepa tawhta chhôhkha lia tao awpa eima hnei ma tahpa amohpakia suh u - eima riethei tu khiah ngiapâna lia chhao hmahsie a ru kaw aw” tahpa reih ta, “Chapi, Chakhei nata Siata MDC bia ôna chhôh liata MADC raihria mohôhtuh awpa ta Circle Adminstrative Office, Chakhei liata sopa ta hmahsiena lâthlôh achhih eimâ chhuah” tahpa a reih.

CEM biereina a hnei khai tawhta Puhpa Beihu Nôhro, Dy. Chief Whip zy ta biereina daihti hmâh hra ta, Laihsa Pricilla Nôtlia nata Laihsa J. Vahneisô zy ta hlasapa ta zawpi ama palôhpahawh.

Puhpa Pawkhu T. Azyu, General Secretary, BJP Siaha District ta Chheihlu Public Meeting liata hmiapahnosana a hnei.

CEM zachhihpa he Mawhrei khitlâh nôpawpazy ta mypati avaw chhuanohpa ei ta, aly kawpa ta dôh chyupa a châ.

CEM zachhihpa he Puhpa C. Chehnei, Deputy Chairman, Puhpa Beihu Nohro, Deputy Chief Whip, Puhpa Albert TT. Sachu, MDC nata Puhpa B. Dawpho, MDC zy ta zi ei ta, officials lâ tawhta Puhpa Beirôkhu Beitâ, I & PO, Puhpa K. Laitha, AEO, Puhpa JS. Beizawzilai, Legal Consultant, MADC, Puhpa NK. Lalnunfela, PSO to CEM, Puhpa FC. Minela, Cameraman, Puhpa K. Nahemiah, Cameraman zy ta ama zi. 

BJP Siaha District tawhta Puhpa C. Lawbei, Ex-MDC & Vice President, Puhpa Pawkhu T. Azyu, General Secretary, Puhpa Thychha Chozah, Secretary, Puhpa K. Beipachharona, Vice President, BJYM nata Ls. Caroline Chhaihlo, Vice President, BJYM zy ta zi ei ta, Puhpa Jeffrey Khara, Moonlight Editor ta zi thei hra ta, Ls. J. Vahneiso (Mara Idol 2024 Top-5 nata Ls. Pricilla Nôtlia, (Mara Idol 2024 Top-7) Artiste-zy ta ama zi thei hra.

ISSUED BY:-

Information & Publicity Department

Mara Autonomous District Council

Siaha.