PRESS RELEASE 

NO.28/2023

SIAHA, 8th Nawh, 2023 (Pakhynoh) - Atanoh zala dawh 1:30 Pm khata Puhpa M. Laikaw, CEM ta a Official Chamber liata ECM (H) Leader nazy, CCI(M) Leader nazy MTP (H) leader nazy nata MCHP (H) Leader nazy chhaota a pakyhna nata meeting peimaw kawpa ama hnei. 

Puhpa M. Laikaw, CEM chata a hruana papeimaw sata member â vypa zydua hnota a lyna bie reih ta, daihti pathao nawpata Rev T. Salaw, Moderator, ECM ta thlachhâna a hnei. 

Puhpa M. Laikaw, CEM chata biereihna hnei ta, 'Abeipa Khazohpa ta Mara sawzy he chi nata pho ta mania padua ta, ryureihna eihrâpa, District Council mia a piepa he aly a chhi ngaita kaw. 

Atahmata sawkhata eima chhua chaipa cha 'New Maraland' padua awpa he a châ. He New Maraland padua awpa heta Awnanopa nata NGO nazy nama deichhyna angia ngaita kaw pita, nama thlachhana lia chhao khâ eina thei thla awpa ei chita eicha haw ei. 

District Council paduapathie ta, Politics vata a pathluana y leipa aw ta, adona nata ngachhiena ta Mara râh he chhitha a chhua pita, Corruption ta su to hra aw vei. Mara râh zawpi nata MADC liata a hriapa, Staff nazy chhaota ama tovyu dopa ama to awpa châ ta, sawkhana pha pa (Good Governance) hnei awpa eima chhuah' a ta. 

Puhpa M. Laikaw, CEM chata reipazao ta, 

'Na khozie hawhta raih hria awpa he eichhua chaipa a châ' tahpa he Abeipa lata ei thlachhâna a châ. 

Eima Autonomy pabosa aw pita, Art & Culture Department palai ta, eima identity nata eima culture zy pabohsa awpa ta hmala eima chhua hra. Mara reih paleisa sa awpata MADC liata a hriatupa LDC tawhta Assistant taihta Mara reih ta File liata roh aw ei ta, a chôla zy ta English ta ama roh aw. 

Mara râh hma pasiesa ta, raih phapa eima hria thei nawpata Awnanohpa zy, NGO zy nata Thati lapakhytuhpazy hriaparaona phapa hnei awpata eicha hrua ei" a ta. 

He atyupahmaona (meeting) liana heta he hawna heta bie pathlupa a châ. 

1. HIV/AIDS nata Paritheipa (Drug) adyuh awpata MTP (H) chhithana ryh liata Joint Action Committee paduapa châ ta, he hawna heta member ama rao. 

MTP (H) vyuhpa ta - O.B na zydua. 

MADC vyuhpa ta - 

(1) CEM

(2) EM i/c Social Welfare etc, 

(3) Executive Secretary

MCHP (H) vyuhpa ta - President & General Secretary

MSO (H) vyuhpa ta - President & General Secretary

ECM vyuhpa ta - Moderator

CCI (M) vyuhpa ta - Assembly Chairman

2. Trading by Non Tribal nata Sublet Trade chôcha liata MTP (H) ta drafting vaw tao aw ei ta, CEM, EM i/c Rev etc. MSO (H) zy chhaota mo pazie heih awpata paryhsapa a châ. 

He meeting liana heta Puhpa K. Chhihrau, Executive Secretary, Rev T. Salaw, Moderator ECM, Rev Z. Hrohmô, Executive Secretary I/c Education, CCI (M), Puhpa R. Chôsa Hlychho, Assembly Chairman, CCI (M), Puhpa Pakhaw Chozah, President, MTP (H), Puhpa Pahmô Hlychho,  V/President, MTP (H), Puhpa Israel Chozah, Gen. Secretary, MTP (H), Puhpa N. Solomon Beihlotha, Asst. Gen. Secretary, MTP (H), Pihnô P. Chaki, President, MCHP (H), Pihnô B. Ngiasô, Gen. Secretary, MCHP (H) zy amâ hlao.

ISSUED BY -

Information & Publicity Department

Mara Autonomous District Council, Siaha.