PRESS RELEASE

NO.8/2024

AIZAWL, 30 Nawh, 2024, Hriaheinoh - Atanoh kha Puhpa M. Laikaw, Hon’ble CEM, MADC nata a hrialâhpa Puhpa K. Chhuabei, EM i/c LAD etc., Puhpa T. Seido, EM i/c Sports & Youth Department etc. zy ta Aizawl liata Governor of Mizoram, Ministers nata Sawhkhâ chyhsa peimawhpazy amâ hmô.

Puhpa Hari Babu Kambhampati, Governor of Mizoram amâ hmôpa liata MDC Salary Bill cha thlai apypa a châ thei nawpa ta ahaw ei ta, MADC ry liata Judicial Officer thiehpa pa 2 la nawpa ama hiapa cha District Council & Minority Affairs Department lâ tawhta file process awpa ta a vaw chho ei.

Minister Puhpa C. Lalsawivunga, District Council & Minority Affairs (DC&MA) Department atotuhpa ahmôpa châ ta, MADC ta Rules, Acts nata Bills hluhpi, Governor approval la awpa ta pasiesapa pending sai ta y thlâhpa cha hmah lakhei awpa ta ahawpa châ ta, rai la thei nawpa MADC Recruitment – Contractual Appointment Rules chhao thlai pasiesa awpa ta amâ haw. Puhpa C. Lalsawvunga, Minister chata râh châta eima hriakhoh lymâ aw tahpa ta â vaw chhy ei.

DC&MA Secretary thiehpa Dr. H. Lalthlangliana chhao ahmôpa châ ta, MADC ta project a taopazy pangia ei ta, Planning Department lâ forward awpa ta amâ haw. He khai tawhta DC&MA Department ry liata Additional Secretary Puhpa R. Lalchhanhima nata Staff zy chhao tly khaipa ama châ hra.

Puhpa Lalnghinglova Hmar, Sports minister chhao a hmôpa châ ta, Siaha liata Sports complex châta MADC ta project a taopa cha ano kô tlô ha ta, Centre lâ thlai a forward aw tahpa vaw chho ei ta, Delhi Tribal Girls’ Hostel raohpa ta hiapa Multi-Disciplinary Sports Complex, Meisavaih liata Sanction y chiehpa cha MADC lâ hlâ (handover) awpa ta pachhuapanohpa a châ tahpa a vaw chho hra ei.

Dr. Renu Sharma, IAS, Chief Secretary, Mizoram chhao ahmôpa châ ta, MADC châta hmo peimawh nano nanopazy reikheipa châ ta, aeihpachaipa ta Cooperation Department kyh chhao asianô viapa ta MADC liata siekheipa a châ thei nawpa ta tlôkheipa a châ.

Puhpa M. Laikaw, Hon’ble CEM he Mararâh châta Delhi adaoh awpa ta mylâ târi 31.1.2024 he ta Aizawl puasai aw ta, a hrialâhpa Puhpa K. Chhuabei, EM i/c LAD etc., Puhpa T. Seido, EM i/c Sports & Youth Department etc. zy deikua Aizawl liata office amâ daoh pazao chy aw.

ISSUED BY:

Information & Publicity Department

Mara Autonomous District Council

Siaha.