PRESS RELEASE

NO.132/2023

SIAHA, 13 Thlarâh, 2023, Pakhynoh - Atanoh dawh 12:00 Noon pa ta E & F Conference Hall, MADC Complex liata châbu palâhâhna programme taopa liata Puhpa Pachi Hlychho châbu ropa “Mara lâ nata Hlazy” cha zawpi rei thei awpa ta Puhpa M. Laikaw, Hon’ble CEM, MADC ta a palâhâh.

Puhpa FC. Chhuasa, President, Mara Writers’ Club ta Palâhâhna Programme he chhihtha ta, Rev. B. Beilua ta Hlazy 69:30 reipapuapa ta devotion a hmâh. MTP Branch: Meisavaih East ta pahyna hla sa ei ta, Puhpa KH. Beithie ta châbu thâtih reina (book preview) a hnei. Puhpa N. Zakhai, Adviser to CEM, MADC nata Prof. K. Zohra zy ta biereina chyupa daihti ama hmâh. Programme likah liata Laihsa Chhingpuii Azyu nata Puhpa John Beizachhi Phuto zy ta hlasapa ta zawpi ama palôpahawh. 

Puhpa M. Laikaw, Hon’ble CEM biereina daihti a hmâpa liata a bierei tlâhpi viapazy ary liata palâsapa a châ. 

“Atanoh liata noh ngiatlâh châpa, chhâ a vaw y lymâ awpa châta ryu tlohpa, Mara identity ngiana peimawh kawpa châbu palâhâh thei awpa ta daihti phapa nata hnatlâna phapa nâ pietuhpa eima Khazohpa hnoh ta alynabie ei reih.”

“Châbu palâhâh awpa ta nâ khokheituhpa Author Puhpa Pachi Hlychho hnoh ta alynabie ei reih; sawhkhâ rai hriana tawhta a pension tawh chhao ta he hawhta châbu a vaw patohpatia theipa he reithai tlâh a châ hmeiseihpa a châ. Ano mopakha ta Marapazy châta a contribution he chhâ a vaw y awpa taihta my khao aw vei ei.”

“Marapazy pi ta programme eima taona maih liata hlasapa hnei tyh pi ta, lâ (dance) deikua y tyh vei, châbu liata ‘Mara lâ nata hlazy’ â tahpa hawhta Mara lâ lâchhâh he programme liata y thei tyh hra sala tahpa khona ei hnei.”

“Marapazy pi ta eima chhichâna history zy English nata Mara reih ta ropa hnei thei sila tahpa pachâna eima hnei hai no ta Puhpa Pachi Hlychho ta he hawhta Marapazy chhichâna châbu apahniena tlâh châ kawpa a vaw rohpa he arônah tah na ta, ei ly hmeiseih.”

“Bible he hrona lâthlôh a châpa hawhta he Châbu he Mara chi nata pho châta a peimawh ngaitapa pahno na ta, Marasaw zydua ta reih khai thei si la tahpa ei khoh kaw.”

“Eima râh liata nôpaw a châpazy ta ama line nochâ liata Râh châta peimawhpa châbu miah raohpa chyu thei ei sa la tahpa ei vaw haw. Chahawhta officer nahzy chhao roh chyu ei sa la, kho â chhih kaw. Kei chhao, ei hrochhôh noh daihti liata ei kha chhâ cha châbu ro awpa he ei khoh kawpa a châ.”

“He châbu puapa he ta Mara châ thaipazy pahaona châta hmâh si la, thyutlia châthaipazy châbu roh hluh achhuah chyu awpa ta ei châ haw ei.”

“Puhpa Pachhi Hlychho he, ano â ngiana lâthlôh sawhkhâ rai liata post asâh chaipa patupa ta a pension theipa a châ, atanoh liata a contribution he Mara khizaw a y chhôh ta a moh lei khao aw vei, eimâ paleikhei hmeiseihpa a châ. Hmialâ a sie lymâ nawpa liata khokheina sâh chaipa ei hlâ.”

Programme chhâna liata Puhpa Pachi Hlychho, Author ta alynabie reina daihti hmâh ta, zawpi ta Zisu Thlahchhâ pachupa reiparaohpa ta châbu palâhâhna daihti he pachhâsapa a châ. 

“Mara lâ nata Hlazy” châbu he 1992 liata papua tuapa (1st Edition) châ ta, atahmâ 2nd Edition liata baichhipa ta tho 345, ISBN ahneipa châ ta; a mâ he copy 1 Rs.400/- a châ.

ISSUED BY:

Information & Publicity Department

Mara Autonomous District Council

Siaha.