Târi 6th Khihpa (July) 2023 @ 8:30 Am liata Board of Mara Literature, MADC hmahlana ta Noh-aotlâh - II, VC Court House liata Mara reih achuna Centre pahypa a châ. 

Puhpa MH. Tiabi, Chairman, BML ta pahnie kawpa ta chhihtha ta, he hawhta Noh-aotlâh liata Mara reih achuna Centre pahypa a vaw châpa he Noh-aotlâh khihsaw châta byhnâ a vaw tlôkheituhpa a châ cheingei nahta khâchâ ei hnabeiseih tahpa reih ta, eima pihna râh official language nata majority reih thai a byuhzie thata reih ta, MADC he a hneituhpa nama châ thlâh hana chôta reih nama thai leipa vâta nâmo ta namâ vaw kari heih tyh, he Centre he  pasô thai ta, Mara reih achu chyu awpa ta ahawna a tao pâ hra.

 Ano nata Puhpa NT. Thatlua zy ta hmiapahnosana daihti amâ hmâh.

Daihti pathaona thlahchhâna Pro. Pastor Marvin B. Amiel, ECM Noh-aotlâh Biatuhpa ta â hmâh ta, he hawhta râh nôpawpazy ta a saipa tlai ta Mara reih achu thei awpa ta khokheina miah patosapa ta miah ama paduapa he pasô thai chyu awpa ta a pasyu ei.

Khichhai Laipa Puhpa M. Laikaw, CEM, MADC ta aly kawpa ta Mara reih achuna Centre cha pahy ta, he liata CEM bierei tlâhpi viapazy:-

1. He hawhta zawpi ta miah ama pasôkhei awpa chhao eima pangiasa lei no nata miah nama palyupalih awpa eimâ pangiasa lei nota he hawhta miah nama deichhypa he eimâ ly hmeiseih.

2. Eima hyutuhpazy nata official zy khokheina nata hmahlana zawhzi ta he hawhpa daihti eimâ hmâh theipa he aly'pa a châ ngâsâ.

3. Atanoh he Noh-aotlâh khihsaw châta noh ngiatlâhpa a châpa ta pahno na ta, Biatuhpa nata BML liata a hriapazy hnohta alynabie ei reih hmeiseih.

4. Atahmâ ta sawhkhâ heta New Maraland padua awpa achhuah pi ta, MADC ta kô 52 a tloh awpa lia heta Maraland padua achhuah pi ta, reih vâta apathluana hnei awpa achhuah leipa pi ta, MADC he apahneisatuhpa maih eih châ ta, Noh-aotlâh he nama reih he a vaw nano via ta, kô hluhpi chhôh lia heta nama duahmo he vaw pha thei tu tyh leipa ta, khokheina hluhpi patosa tyh hra ei sih la, MDC tlyma Officer post tlyma vaw rua ta, anodeikua Mara reih eima thai lei nahta cha MADC liata cha rairuna a vaw y ha tyh. Chavâta atahmâ tawh heta taopathina raihriapa ta, Mara reih he achu lymâ sih la, atahmâ ta Mara reih achuna Centre eima pahypa heta eimâ pôhkha n'awpa châ thei sala tahpa kho âchhih kaw.

5. Khazia ma eima râh official language he foreign language hawhta eima pachâ tly. Reih eima thai lei Khiah cha khichhaipa hawh eima vaw châ tyh. Mara râh leilô saw châ pi ta, a hneituhpa châ pi ta, reih eima thai Khiah la a hneituhpa dopa vaw châ aw pi ta, eima sawnahzy vaw thai lymâ hr'aw ei ta, cha tita cha Mara râh liata apôhkhana vaw y ta, New Maraland eima padua thei aw.

6. Mara râh liata apathluanazy y leipa ta, lôraoh kawpa ta eima thei n'awpa ta Mara reih achuna Centre he vaw paduapa châ pi ta, he he eima hrialâhna pha via lymâ n'awpa vaw châ sala tahpa ei khoh ngaita.

7. He Mara reih achuna Centre he eima hmialâ daihti, eima future châta a châ tahpa pahnopa ta hlaotlohkhei cheingei awpa ta khokheina sâh chaipa ei cha hlâ ei. Ei châ ly ngâsâ ei.

Puhpa N. Viakhu, Chairman, MADC chhaota bie pha kawpa reina hnei ta, Noh-aotlâh lia heta Lai reih hmâh ei chi ta, Lai reih vaw hmâh khao khuh vy, tahna tlyma, Lai châ khao khuh vy, tahna châ hra vei. LADC he nama eih châ leipa ta, MADC he nâmo eih a châ. Mara reih nama thai lei Khiah cha Mara reih a cheih haipazy hry liata nama y tita eima kyh khiahma miah ama reih nama tah awpazy pha leipa ta, eima likah liata kyhpachânazy a pih via lymâ thei n'awpa tahna a châ. Chavâta vaw pasô thai u la, thata achu chyu awpa ta a pasyu ei.

Puhpa S. Lalremthanga, EM (P/S), MADC chhaota biereina hnei hra ta, khizaw liata hmo pei chaipa cha kyhpachâtuhpa pahno leipa he a châ. MADC heta Noh-aotlâh he kyhpachâ ngaita ta, atanoh liata chhao Mara reih achuna Centre cha vaw pahypa heih ei ta, he he kyhpachâna vâta a châ tahpa pahnopa ta, phahnaingiah kawpa ta achu ta  pasô thai kaw awpa ta â haw ei. 

Puhpa N. Beikhai, Vice President, BJP Siaha District chhaota biereina hnei ta, Mara râh liana heta Noh-aotlâh he khih palôhâh chaipa nama châpa ta pahno na ta, reih hropa thai hluhpa he chyhsa vâtlâhpa châna a châ tahpa pahnopa ta, nôpawzy châta cha reih Mara reih thai awpa a vaw ru kaw bâ thei aw. Anodeikua eima tusaw nah châta hawh leipa ta, pasô thaipa ta nama vaw pachusa chyu awpa ta châ haw ei na ta, Mara reih a thai tuapa maih ama vâhnei thlyu nahta khâchâ ei hnabeiseih, tahpa ta a reih.

Puhpa Laicho Nôtlia, Vice Chairman, Board of Mara Literature, MADC ta alynabie reina daihti â hmâh.

Puhpa Laicho Nôtlia chata reih ta, MADC â duah tawhta kô 50 chhôhta he hawhpa daihti he eikha hmahta ahmâh mâh leipa pi ta, atanoh eimâ hmâpa he ai achhih lei kaw ta, eima zydua ta eima ai lei kaw saipa ei pahno. CEM zachhih kawpa nata, EM (Edn) nah pano hmahlana nata official lâzy hmahlana châ ta aly'pa a châ hmeiseih.

Reih he peimawh ngaita ta, India ta independent a hmô tawhta official language 22 hnei ta, Mara râh, MADC chhaota official language hnei hra ta, he he eima pasô awpa nata eima thai awpa a peimawh ngaita.

Mizoram State rai lana kyh liata Mizo subject, Middle school taihta thai awpa a byuh tyh.

Cha hawhta MADC liata chhao Mara reih thai awpa a vaw byuh ha tyh hra.

Nâmo chhao he Mara reih achuna Centre he vaw pasô u la, nama tu nata sawzy vaw pachusa hôlô u la, byhnâ hluhpi vaw to awpa ta khokheina ei cha hlâ ei, tahpa ta phahnaingiah kawpa ta a reih.

Pihnô Thluakho Solo chhaota pasyunabie reih hra ta,  Noh-aotlâh he kô 100 khô ha ta, atanoh liata Mara reih achuna Centre pahypa a châpa ta he aly'pa a châ ngâsâ.

Noh-aotlâh khihsaw he home work cha pie awpa ei khoh na ta, cha cha Mara reih vaw thai muh vy tahpa he a châ.

Noh-aotlâh Biatuhpa MDC, Puhpa N. Lalrosanga chhaota biereina hnei hra ta, Election nota campaign nota ei reipa, ei tloh khiahta la Mara reih achuna padua awpa ta hmah ei la aw tah na ta, atanoh liata hlaotlohna a vaw ypa he ei ly ngâsâ.

Mara reih peimawhna he MADC liata a hria chiehpa châta cha pahno kaw pi ta, Mara reih eima thai khiahta la Noh-aotlâh khihsaw tawhta rai laipa hria thei awpa eima hluh tahpa pahno na ta, eima theina zydua papua pi ta, hlaotlohna eima to cheingei aw tahpa ei ngiapâ. Eima hyutuhpazy hnohta alynabie ei reih hmeiseih, tahpa ta a reih.

Hlasa thaipa sahlao,

Pachho Nôtlia, Hmingmawiberi Noh-aotlâh), Jessica B. Khuhly, Annesi Nôhro, Chhingpui Azyu zy ta zawpi hlasapa ta ama palôhpahawh.

Pihnô Hmingmawiberi, Noh-aotlâh ta Mara hla cheingei, Kei la my va na tahpa a vaw sapa chata MADC nôpawzy nata BML nôpaw a sie theipazy a palysa ngaita ei.

Noh-aotlâh khihsaw ta CEM nata azituhpazy châta pati amâ chhuanohpa cha aly kawpa dôhpahmaohpa a châ.