PRESS RELEASE

NO.16/2024

SAIKAO, 17 Hmypi 2024, Pachynoh - Atanoh dawh 12:30Pm pa ta Lakher Pioneer Mission Bungalow Construction Board(LPMBCB) pachhuahpanohpa Lakher Pioneer Mission Bungalow (Violet House) hlâna Programme cha Mission Compound, Saikao (Lorrain Ville) liata âhmâhpa châ ta, Marasaw zydua ta sôh thyupakhypa ta sapa LPM Bungalow (Violet House) he eima Missionary zy ama chô liata eimâ lyzie palâsana châta Mara zawpi vyuhpa ta Puhpa M. Laikaw, Hon'ble Chief Executive Member, Mara Autonomous District Council (MADC) ta Rev. L. Mark hnohta a hlâ.

Lakher Pioneer Mission Bungalow (Violet House) he Tourist Lodge, Siaha kiapâh liata sapa a châ. He LPM Bungalow (Violet House) he Mara zawpi ta sôh thyupakhypa ta Rs. 82,39,910.00 hryuhpa ta sapa a châ. Rev. C. Thalai ta kô 2014 pa ta alô a bô.

Programme he Puhpa MH. Tiabi, Chairman, LPMBCB ta chhihtha ta, Rev. T. Salaw, SES, ECM HQ, Siaha ta Abeipa lâta pavaosana devotion daihti â hmâh.

Puhpa P. Tluasa, Er. in-charge (LPMBCB) ta technical report piena hnei ta, Puhpa JH. Beihnai, Secretary, LPMBCB ta introduction piena a hnei.

Puhpa M. Laikaw, CEM chata, "He hawhpa programme he a y beih leipa, a y khao nahta chhao pangiasa a chhih vei. Atanoh Lakher Pioneer Mission Bungalow (Violet House) hlâna programme nata eima Missionary zy ama chô liata eimâ  lyzie palâsana châta Mara zawpi ta sôh athyupakhypa ta sapa Mara zawpi vyuhpa ta LPMBCB khokheina topa ta Pihnô Vaili ta kyh a pachâ kawpa a vahpa Rev. L. Mark hnohta hlâ thei awpa ta ei vaw châpa he ei ly hmeiseih," tahpa ta a reih.

"Eima Missionaryzy y khao vei hra ei  sala, he eima hmotaopa he Abeipa chhao â ly kaw hra nahta ei pangiasa. LPMBCB ta he Violet House he kô 7 chhôh vaw sa ei ta, atanoh he eima râh chapter thiehpa eima thaona noh vaw châ sala, he O he Khazohpa ta byhnâ pie sala, he hmo tawh heta Khazohpa tawhta byhnâ eima tona vaw châ sala tahpa he khochhih chaipa a châ," tahpa ta CEM ta a reih.

CEM chata, "He Violet House hlâna eima hnei tawh heta chyhsa hropa châta byhnâ châ achhuah ta, chyhsa châta hmopha tao achhuah via lymâ sih la, Missionary moh hmâpa ta chyhsa hropa châta hmopha tao via lymâ achhuah chyu suh vy. Pihnô Vaili y khao vei hra sala, kyh a pachâ  kawpa a vahpa miah hro lâh ta, a vahpa hnohta hlâ thei awpa ta miah hrolâhpa he eima vâhnei hmeiseih," tahpa ta a reih.

"Khitlâh liata reithai tlâh a châpa chyhsazy cha ama hroh thlâh nota reithai sih la, eima palôh liata khâchâ lai sala, ataopathina châta hmâh sih la, he noh ngiatlâh châ kawpa he Khazohpa ta byhnâ pie sala, mo hropa châta byhnâ châ achhuah via lymâ suh vy," tahpa ta CEM ta a reih.

Rev. L. Mark chata, "Kei ta alynabie ei reipa he ei lahpinô nata reipa hawhta miah pachâpa u la, Khazohpa ta nôpi nôvâh cha pôhkha nama châ a tahpa hawhta. LPMBCB nata Mara zawpi su to râh to liata ypa zydua ta Lakher Pioneer Mission Bungalow (Violet House) miah sapa ei chi ta, ei châ ly hmeiseih ei. Kei, ei lahpinô nata eima chhôhkha zydua vyuhpa ta alynabie ei cha hlâ chyu ei. Ei châ ly hmeiseih ei," tahpa ta a reih.

Puhpa MH. Tiabi, Chairman, LPMBCB chata, "Lakher Pioneer Mission Bungalow he Kô 2014  tawhta vaw sa pathaopa châ ta, Rev Violet Louise Anne Mark khonazie hawhta Violet House tahpa ta bipa a châ. Eima Missionary nahzy cha maniah siesai khai hr’ei sala Marasawzy ta eima palôhrupa liahmarihpa tawhta âthei ngâthlâh pita Mararâh khihpi Siaha liata râh, Ohmo inches sâkha hmahta hnei v’ei tahpa pahno pita eima Missionaryzy eima hnohta maniah pahrâlâh khao leipa ta eimâ lynabie eima reipazy pahno khao hra vei ei sala Marasawzy ta Thâtihpha khaihna maniah ama vaw tlôkheipa vâta sapa nata thlahpa byhnâ eima topa zydua vâta eimâ lynabie reina châta LSC/ R/NS/341/0f 14.12.2011  cha dated 7th Jan 2012 liata  Rev.   Violet Louise Anne Mark hnohta Marasaw zydua vyuhpa ta a ku liata keima  cheingei ta ei office chamber liata ei hlâ. Eimâ ly ngaita kaw, tahpa ta a reih.

"Daihti vaw sie laih lymâ ta eima Pihnô Freddy Nô nata Paw heta machâ lâ vaw pangai bâ ei ta, âmo kuta O sa awpa zy a rairu thei thlyuna tahpa pachâna vaw y ta, pahnai angiahpazy ta O sa awpa khona vaw y ta, Lakher Pioneer Missionary Bungalow Construction Board cha dt 22.7.2014   liata paduapa a châ. Eima Pihnô Freddy Nô hnohta o sa pasaina hiahpa châ ta, dated 7th August 2014 liata Affidavit ta o sa pasaina maniah pie ta, Deed of Agreement ropa a châ tawhta construction Board paduapa a châ. Eimâ ly ngaita kaw. He o sana chhâ chaipa cha eima Missionaryzy eima hnohta  maniah pahrâlâh khao hra vei sala, eimâ lynabie reinazy maniah thei khao hr’ei sala ama chô liata eimâ lyzie pamosa n’awpa ta Marasaw zydua ta Phusâ thyupakhypa ta sapa a châ," tahpa ta Chairman, LPMBCB ta a reih.

Chairman, LPMBCB chata, "Board ta O sa n’awpa ta sôh tlaw 1 hmah   hnei leipa ta, MADC, ECM, MIEC MADC liata ahriapa zydua, Marasaw Officer nata sawhkhâ rai a hriapa nata mo pakha pahnai angiahpa zydua, Local Churchzy, Marasaw Mararâh khôtho lâ a ypa USA, Australia, Malaysia, Marasaw su to râh to liata ypa zydua tawhta he o patlô thei n’awpa ta a vaw thyutuhpa zydua hnohta alynabie ei reih hmeiseih. Ama pahnai angiahna vâta he o he patlô theipa vaw châ ta, eima Missionary pathla nahzy pahrâ n’awpa ta atanoh dated 17th February 2024 liata Rev L Mark ku liata hlâ thei awpa a vaw châpa he Marasawzy ta eimâ ly ngaita kaw. A pasaih kawpa ta a thyutuhpa zydua Khazohpa ta byhnâ pie chyu ei sala tahpa he eima thlahchhâna a châ. Eima Pihnô ku liata hlâ hmâ leipa pita pei eima tah ngâsâ. A chhâpa cha Phusâ rairu vâta nata Origin plan tawhta Third Floor baichhi heihpa vâta daihti vaw rei ta, eima patlô tawhta chhaota eima Pihnô kha Rakhô tawhta a thyu thei khao leipa vâta a châ hra. Pei eima tahzie a rei n’awpazie chhao pahno khao mapi," tahpa ta a reih.

Puhpa MH. Tiabi chata, "Vâhnei achhih kawpa ta Rev L Mark eima hnohta maniah pahrâlâh ta, eima Missionaryzy ta eimâ lynabie reina a vahpa Rev L Mark ku liata hlâ theipa a châpa he vâhnei â tah pita eimâ ly ngaita kaw," tahpa ta a reih.

Puhpa Pachi Hlychho, Vice Chairman, LPMBCB ta welcome speech reina hnei ta, Rev. B. Beilua ta short speech pha kawpa reina a hnei.

Puhpa T. Seido, EM i/c Sports, etc, MADC, Puhpa C. Chehnei, Deputy Chairman, MADC nata Puhpa M. Chiadung, Chairman, Town Committee, MADC zy chhao LPM Bungalow (Violet House) hlâna programme he amâ hlao hra. Pihnô HC. Napy (Puhpa M. Laikaw, CEM lahpinô) chhao azâ hlao hra.

Puhpa John Beizachhi Phuto, laihsa Dinai C. Lalruatdiki nata laihsa Ngôpathai Syuhlô zy ta pahnie kawpa ta hlasapa ta zawpi palôhpahawh ei ta, LPM Band, Siaha Bazar zy ta pahnie kawpa ta hla ama paryh.

Official lâ tawhta Puhpa Pawsa Lava, AITO, MADC, Puhpa T. Pabua, I&P Dept., MADC nata Puhpa FC. Minela, Art & Culture, Dept., MADC zy ta Puhpa M. Laikaw, CEM, MADC ama chakaochahlâh.

Puhpa CZ. Hluna, President, MJA, chhao azâ hlao thei hra.

Puhpa V. Zacho, Treasurer, LPMBCB ta vote of thanks reina a hnei khai tawhta Abeipa thlahchhâna (The Lord's Prayer) reihparaohpa ta daihti pachhâsapa a châ.

ISSUED BY:

Information & Publicity Department 

Mara Autonomous District Council 

Siaha.