PRESS RELEASE

NO.80/2023

SIAHA, 10 Chhiepa, 2023, Pachynoh - Atanoh dawh 11:00 AM khata CEM, MADC Bungalow, Siaha liata Sports & Youth Services Department, MADC pachhuahpanohpa ta "Kolkata Premier Division League liata Football akhaih awpa Players zy pathliena 2023" programme liata Puhpa M. Laikaw, Chief Executive Member, Mara Autonomous District Council cha khichhai laipa (chief guest) châpa ta pathliena programme â hmâkhei ei.

Pathliena programme he Puhpa JH. Beihnai, Sports & Youth Officer, MADC ta a chhihtha.

Puhpa M. Laikaw, Hon'ble CEM, MADC chata football players pachakizy hnohta pasyunabie pha kawpa reina a hneina liata Khazohpa ta talent a chapiepa ei papôhsa thai ta, Khazohpa china chô nata, Khazohpa athei ngâthlâhna chôta tiama papua ta, hnabeidy leipa ta hmialâ tôh lymâ awpa ta a pasyu ei.

CEM chata Football Player nama châpa my leipa ta "Rome khihpi lia na y nota Rome taodâh hawhta nata Rome ydâh hawhta y la" ama tahpa hawhta Mararâh puasai ta Kolkata khihpi liata nama yna lia chhaota a adjust thai kawpa ta nama y awpa a byuh tahpa ta a pasyu ei.

"Sport chyhsa nama châpa my leipa ta paritheipa tawhta namâ sohsi kaw awpa byuh ta, self control nama hnei kaw awpa a byuh," tahpa ta CEM ta Players zy hnohta a reih.

CEM chata châ ei chu nota Martial Art liata Master châ awpa achhuah na ta, Khazohpa ngiachhiena vâta ei chuna pabua leipa ta Martial Art liata Master ei châ thlâh haw. Achhuahna hneina chôta Football namâ khaih khiahta cha, hlaotlohna â hnei thei rairiena tahpa he ei cha chho khoh ei, tahpa ta CEM ta a reih.

"Mararâh thâ paphatuhpa nata Mararâh châta chyhsa ngâchhihpa châ namâ chhuah lymâ awpa a byuh," tahpa ta CEM ta a reih.

"Riethei tao ta, areisi ta, Khazohpa chi ta, hmotaona maih liata Khazohpa hmiapasah lymâpa  he hlaotlohna a châ," tahpa CEM ta a reih.

CEM chata, "Martial Art ei chu nota ei Master ta eina chhopa cha, "Paritheipa nata Chanô" liata nâ sohsi kaw awpa a byuh tahpa ta eina chho e, a ta.

A tliata lia khata Siaha District tawhta Football Players 23 Teams zy ta Tamluk District Football Association, Kolkata zy ta Football Tournament ama pachhuahpanohpa liata azâ khaih ei ta, cha tawhta he Siaha District tawhta pachaki (9) zy he Kolkata Premier Division League liata akhaih awpa ta atlyhpazy ama châ.

Kolkata Premier Division League liata akhaih awpa Football Players moh list:-

1. C. Beihneithlalochhi, Tisi (Current Club: New Colony FC).

2. Beipachharôna Miehlo, College Vaih, Siaha (Current Club: Football Club, College Vaih)

3. Royal Moses, College Vaih, Siaha (Current Club: Football Club College Vaih).

4. Lalrintluanga, Tipa (Current Club: Football Club College Vaih)

5. A. Felix Vabeisochai, Siaha Vaihpi (Current Club: Siaha United (Vaihpi).

6. Falton NT. Beirachâkhei, Saikao (Current Club: Football Club College Vaih).

7. Metha, New Colony, Siaha (Mizoram Police).

8. Keneth Beihropakhai, Tipa (Current Club: FC College Vaih)

9. Feredick Beilykhei, Tipa (Current Club: FC College Vaih) zy ama châ.

Târi 12.06.2023 hriatuanoh ta Puhpa N. Ferdinand, President, FC College Vaih, Siaha ta he Football Players pachaki (9) nahzy he Kolkata lâ a za pathlie aw ei.

He Players pachaki nahzy he United Sports Club nata Pathachakra FC tawhta amâ khaih aw. Kolkata liata ama y n'awpa accomodation nata food zy provide pa khai ei ta, thla hlao ama hnei pâ aw. Chahleikhôta, he players zy hry tawhta Royal Moses, College vaih, Siaha nata Beipachharôna Miehlo, College vaih, Siaha zy he BA achu ngâhaipa ama châpa vâta amâ chuna expense chhao amâ tôhpa khai aw.

Sports & Youth Services Department, MADC ta he football players pachaki (9) penawh Kolkata lâ ama sie nota lâthlôh liata thopi ama do n'awpa sôh thyno (twenty thousand) a pie pâ ei. 

Puhpa N. Ferdinand, President, FC College Vaih, Siaha ta report piena, pasyunabie nata alynabie reina a hnei.

Puhpa T. Seido, EM i/c Sports & Youth Services, MADC chhaota pasyunabie pha kawpa reina a hnei hra.

Puhpa F. Vanlalmuanpuia, Honorary Secretary, SDFA chhaota pasyunabie pha kawpa reina a hnei hra.

ISSUED BY:

Information & Publicity Department

Mara Autonomous District Council

Siaha.