PRESS RELEASE

NO.21/2023

SIAHA, 31 Nawh, 2023, Hriaheinoh - Atanoh dawh 1:00 PM pata Puhpa M. Laikaw, Chief Executive Member, MADC cha khichhai laipa (chief guest) châpa ta Kaochao East liata Israel Market (Rural Haat) a pahy.

Programme he Puhpa Eric Zomuanpuia, Deputy Chairman & Director, AWF ta chhihtha ta, Machâ K. Lalhruaia, BCM Silo, Kaochao ta Abeipa lâ pavaosana thlahchhâna daihti â hmâh. Puhpa Joseph H. Thanzuala, Chairman & Director AMFU Welfare Foundation ta introductory speech reina hnei ta, guest of honour Mr. Evan T. Munsong, DDM, NABARD, Lunglei chhaota pasyunabie pha kawpa reina a hnei.

Israel Market he National Bank for Agriculture and Rural Development (NABARD) sôh hmâpa ta sapa a châ. AMFU Welfare Foundation nata NABARD hriaparaohpa ta sapa a châ. Israel Market he sôh 30 lakhs hmâpa ta sapa a châ.

Puhpa M. Laikaw, CEM, MADC ta pasyunabie a reipa tlâhpi viapazy:

MADC liata sawhkhâna thiehpa a vaw duah ta, "New Maraland" tahpa he eima biepipa a châ. He sawhkhâna thiehpa lia heta âthaona liata eima theina rakha ta eima "mindset" thla (change) eimâ chhuah aw. New mindset, new system hmâpa ta tiama kawpa ta raihria eimâ chhuah lymâ aw.

Atanoh he Kaochao East (VC-1) area liata NABARD, AMFU Welfare foundation nata Kaochao zawpi hriaparaohpa ta Israel Market pha kawpa vaw padua ei chi ta a pahytuhpa khichhai laipa châpa ta eina vaw hrua vâ ei chi ta ei ly hmeiseih. Hriaparaohna phapa nama hneipa he a vaw ly kaw na ta, MADC chhaota nama kaw mohôh lymâ nawpa liata taotheipazy eima hnei khiah eima theina rakha ta cha baokhâ lymâ eimâ chhuah aw.

New Maraland liata la management thai kawna chôta raihria pi ta, Khazoh pahnona chôta, tiama kawpa nata ngâchhihna chôta rai eima hria lymâ aw.

Tiama kawpa ta nama hriana sôh nama paso nawpa Bank nama hnei thei nawpa nata Bank saving account nama hnei thei nawpa ta hmah eima vaw la pazao lymâ aw. Nama daily earning tawhta saving papeimawhsa ta sôh hmâh dâh thai kawpa ta managenent thai kawna chôta tiama nama papua via lymâ awpa ta ei châ haw ei.

Ei châ ly kaw ei.

Puhpa M. Laikaw, CEM, MADC he Pihnô Napy Hlychho (Laipha Nô), Puhpa John M. Beilaisei, P.S to CEM, MADC, Puhpa Pawsa Lava, AITO, MADC, Puhpa Lalnunfela NK, PSO, Party lâ tawhta Puhpa B. Luaha, Treasurer, BJP, Siaha nata Evelyn Chozah, DDK Correspondent, Siaha zy ta ama chakaochahlâh.

Lalthantluangi, AWF Project Coordinator ta vote of thanks reina a hnei khai tawhta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.