PRESS RELEASE

NO.03/2023

SIAHA, 12 Nawh, 2023, Pobienoh – Atanoh my dawh 10:30 Am pa ta MADC Session Hall liata 12th Term MADC CEM thiehpa Puhpa M. Laikaw sawhkhâna pasiana “Vote of Confidence” hneipa châ ta, Puhpa M. Laikaw cha pahniena a to.

Daihti pathaona liata Chairman ta Biehrai Pathaipa Hlazy 33:11-12 reina a hnei khai tawhta Chairman ta a raopa Puhpa Beirahmo Syhly, MDC ta pavaosana thlahchhâna a hnei.

He CEM, MADC pasiana he Puhpa N. Viakhu, Chairman, MADC ta chhihtha ta, Puhpa M. Laikaw chhihthapa sawhkhâna pasia awpa a châ vâta Chairman ta opposition lâ tawhta ruling zy ta sawhkhâna ama tao thei lei awpa lâ ta bie reina hnei awpa daihti a pahypa liata Puhpa H. Malvina nata Puhpa Nahlô Solo zy ta biereina hnei ei ta, ruling lâ tawhta Puhpa S. Lalremthanga nata Puhpa K. Hrahmo zy ta sawhkhâna thapatlônazie ta bie ama reih hra.

Sawhkhâ support lâ ta member 15 ta vote pie ei ta, support leina lâ ta vote 8 ama pie.

Chairman Puhpa N. Viakhu chata Casting vote hmâpa ta Puhpa M. Laikaw sawhkhâna a support-pa zie nata pahniena a to tahpa phuah pazi ta, he khai tawhta Chairman pasaina ta Puhpa M. Laikaw chata alynabie reina daihti hmâh ta, New Maraland padua â chhuah zie na ta ano sawhkhâna siekhei awpa he Good Governance lâ aheihpa ta hmah a la aw tahpa reih ta, atliata liata a lapihnô apahâpa nata ama hrialâhpa Puhpa H. Hrangchuanga nata a chhôhkhazy a tao khei zie reih ta, atlâh leipa Puhpa H. Hrangchuanga chhao sapa nata thlahpa liata deichhy lymâ â chhuah tahpa reina a hnei hra. 

Puhpa N. Viakhu, Chairman chata Deputy Chairman a châ ngâhaipa remove awpa motion, châropa â vaw ngia vâta reihpapua awpa ta a raopa Puhpa K. Vanlalliana, Secretary to District Council ta a rei papua khai tawhta he motion a vaw ngiapa he apypa a châ tahpa Chairman ta phuah ta, mylâ târi 13.1.2023, dawh 10:30 Am pa ta MADC Session Hall liata pasiana hnei awpa ta pahnosana tao ta, dawh 11:30 Am liata atanoh atyupahmaohna he pachhâsapa a châ.

ISSUED BY:-

Information & Publicity Department

Mara Autonomous District Council

Siaha.