PRESS RELEASE

NO.127/2024

SIATA, 30 Phiapi, 2024, Pachynoh - Siata khih kô 125 a tlohpa alyna Quasquicentennial Celebartion cha Siata khihchhôh liata ‘Thamang Tlyliah’ liata alyna programme ahmâpa châ ta, atanoh kha Puhpa M. Chiadung, Hon’ble Executive Member (EM), i/c Soil & AH & Vety. Mara Autonomous District Council (MADC) cha Lôbô pahyna nata Biereina hneipa ta programme he a hmâkhei ei.

Puhpa M. Chiadung, Hon’ble EM bierei peimawh viapazy : -

1. “Siata khih kô 125 a tlohna eima tlô theipa he aly’pa a châ hmeiseih; eimâ lynazy cha Khazohpa liata tlao châ hri mawh sy.”

2. “Atanoh daihti liata khih a paduatuhpazy a thei pi ta, ama byhnâ topa cha thyutlia sawzy liata eima hmô pathao haw - hmialâ daihti liata cha kudaopa hawh tlupo ta khih za sa laih tyh pi ta, tahmâ deikua cha châthaipa officer, dawhty, nurse, teachers etc. hluhpi zy hleikhô ta Pastor, Misionary, MDC etc. zy eima y haw.”

3. “Atanoh liata EM châpa ta he liata ei dua thei vâta alynabie reih na ta, ei theina hawhta eima râh châta hmah ei la lymâ aw.”

4. “Eima reihchâ (Vyhtu reih) miah a taopatuhpa Rev. Dr. J. Ralbuaia (L) he khizaw a y chhôh ta my aw ma pi, atanoh liata zana eima hlâ hmeiseih. Eima reih Vyhtu reih he eima zakhei khiah reih miah pietuhpa Khazohpa eima zakhei tahna a châ. Chavâta zakhei leipa ta cheih lymâ ei suh u.”

5. “Atanoh liata eima nôpaw hmiatuapazy eimâ thei - a eihpachaipa ta Puhpa Hunawng nata Puhpa Buiring zy eimâ thei. Âmozy hmahlana nata pathaopatôna zawhzi ta School, Godown nata Health Sub Centre zy eima hnei theipa a châ. Nôpaw hmiatuapazy eima khih kyh ama pachâna, amâ daodona nata kyh amâ pachâna kha thyutliapazy ta my khah ei suh u.”

6. “Eima khih he ziza hiahza a pha, thoko nata râhmâhpazy he eima mahnô mahpaw zy kuzô a châ, Siata râh chhôh liata hmo ypazy daodo ei si la, pabohsa lymâ ei sila, khih nata râh hmahsie nawpa ta Thlahchhâ hluh ei suh u.”

7. “Atanoh liata â raohla ta eima hmâpa Langnechhe he MADC ta miah pahnokhei via lymâ sa la, budget lia taihta miah pahlaopa thei ei sala tahpa he eima khona nata eimâ hawna a châ.”

8. “A chhânchaina liata eima chheipâh chyhsa nata chiphozy eimâ khô theina nata â mo hlâta eimâ sâh thei viana chhaichhi pha chaipa cha Education he a châ; achuna kyh pachâ pwimawh ei si la, achuna kyh liata Khazohpa hmia pasah lymâ ei suh u.”

9. “Siata khih kô 125 alyna programme avaw hmâhpa zydua Khazohpa ta byhnâ chapie chyu ei sa la, aly kawpa ta hmâh chyu awpa khokheina ei cha hlâ ei.”

Puhpa M. Chiadung, Hon’ble EM heta Siata nata Iana khih liata kô 70 chô lâ uhtheipa zydua hnoh ta Siata khih kô 125 a tlohpa alyna châta sahmi poh lalôhpa (Blanket) a rai chyu ei.

Atanoh programme he Puhpa John VT Hniehu, Chairman, Siata Quasquicentennial Celebration (SQCC) ta chhihta ta, Rev. C. Josia, ECM Chakhei biatuhla ta Maluhreina 14:9 reina nata reipakawhna hneipa ta pavaosana daihti a hmâh. Puhpa M. Mesaka, VCP Siata - II ta alypangiana bie reih ta, Puhpa T. Laisui, Zyphe Idol-2011 ta hlasana a hnei. Puhpa CH. Hmuhei, Adviser SQCC nata Mc. C. Zuatha, Ex-VCP, Iana zy ta biereina daihti hmâh ei ta, Puhpa M. Manasia, MDC ta SQCC Souvenir palâhâhna nata biereina chyupa daihti a hmâh.

He daihti liata MTP Branch : Siata zy ta Hlapy ta SQCC hla ama paryh. Kô 80 chô lâ uhtheipa manôh 13 hnoh ta MTP Branch: Siata ta palyupalihna Ryuchâ ama hlâ.

Revd. Dr. M. Zakonia ta Vyhtu reih Khazohpa reithaina hlabu a palâhâh ta, Puhpa C. Lalchhanhima, Secretary, SQCC ta kô 70 a khô hapazy palyupalihna lymâ raina a chhihtha. Daihti chhâna liata Mc. K. Chhuasa, Secretary, UPC Siata Local Church ta thlahchhâna hnei ta, atanoh nohchhô programme he pachhâsapa châ ta, he khai tawhta zawpi ta alyna kyhchhi dôhpa a châ.

Myrâh liata Puhpa M. Chiadung, Hon’ble EM heta Siata kô 125 Lôbô pahy ta, he su liata uhthei nôpaw viapazy ta viadawh ei 3 chyu tô ei ta, Mc. LC. Chiakhung, Chairman, UPC Bethlehem Local Church ta thlahchhâna a hnei. Pihnô Ngunsui, Ex- MDC ta 125 Jubilee Road pahy ta, he liata Rev. Hwnry C. Lalenkawla ta thlahchhâna a hnei.

Siata kô 125 tlohna alyna programme he kôchareihta a khih ta amâ hmâpa Langnechhe (Festival) nahta pachhaipata alyna taopa châ ta, khitlâh nôpawzy ta ama thyupa Seitôhpa (nawh 6 atlapa) sâ 1 nata Awnano local sâ 4 tawhta Vao sâ 3 nata Mie sâ 1 ama vaw thyupa chhao ta atanoh târi 30.11.2024, Pachynoh he sapa lâ alyna kyhchhi taopa châ ta, mylâ târi 01.12.2024, Abeipanoh he Awnanopa lâ aheipa ta programme taopa a châ hra.

Siata khih he kô 1899 kha ta paduapa châ ta, kô 1999 kha ta kô 100 a tlohna Centenary alyna hnei hapa châ ta, atakô 2024 he kô 125 a tlohpa ngiana châta alyna programme taopa a châ.

Puhpa M. Chiadung, Hon’ble EM he MADC officials Puhpa Beirokhu Beita, I & PO, Puhpa Pawsa Lava, AITO, Puhpa K. Nehemia, Cameraman nata Puhpa Martin L. Hlychho, Cameraman zy ta ama zi.

ISSUED BY:-

Information & Publicity Department

Mara Autonomous District Council

Siaha.