PRESS RELEASE

NO.57/2025

SIAHA, 14 Patô, 2025, Pakhynoh - Atanoh dawh 11:30 AM khata Puhpa M. Chiadung, Hon’ble Executive Member (EM) i/c. AH & Vety, Soil, etc. MADC ta Golden Jubilee Building Ground Floor, New Siaha liata United Pentecostal Church, NEI Ladies Auxiliary Department, Chhimtuipui District Tailoring Training Centre pahyna programme liata khichhai laipa châpa ta â hmâkhei ei.

Programme he Pihnô L. Nitei, B/W District LAD President ta chhihtha ta, Pihnô H. Zoramthangi, B/W ta Abeipa lâta pavaosana thlahchhâna a hnei.

Puhpa M. Chiadung, EM, MADC zachhihpa chata, "Chairperson nata District Headquarters Pastors nata LAD chhihthatuhpazy nata eima District Council Officers na vaw zituhpazy chô liata alynabie ei reih.  Zâhnia Siata khih liata noh 3 chhôh ô awpa “Sports Meet cum Cultural Meet”, Mara Thyutlia Py (MTP) Sub Headquarters (HQ): Chhaolô pachhuahpanohpa a pahyna programme a kaw hmâkhei ei na ta, atanoh he programme chhâ patawh nahta, Châkhei lâ Circle Administrative Office pahyna programme ahmâh awpa ta sie’pa châ na ta, bie chhao a rei reih hmâ’pa châ leipa na ta, nama pachâthaina ei châ haw ei," a tah.

"Eima President, B/W District LAD ta Tailoring Training Centre he nâ ta miah na pahypa aw, tahpa ta eina chho nota, he hawhpa he cha Pastor zy nama pahysa awpa pha via vei ma, tahpa ta achhy na ta, ano ta nâma ta na pahy awpa a châ na tah ta, Siata liata arie awpa chhao arie khao leipa ta programme a chhâpataw nahta ei za palâh hapa a châ, Eina khokheinapa he a chô lâ liata chhao alynabie ei reih hmeiseih" khichhai laipa ta a tah.

Khichhai laipa chata, "He hawhpa daihti phapa he ei hrochhôh ta ei tyh nahta ei pangiasa pha leipa a châ. Nama zydua ta eina khokheina nata nama thlahchhâkheina zydua liata alynabie ei reih hmeiseih. Bie a reipi reina daihti chhao châ leipa ta, nama pahnothaina ei châ haw ei. Atanoh he Tailoring Training Centre pahyna liata khichhai laipa ta raopa ei châpa he ei ly hmeiseih. Na khokheituhpa zydua chôlâ liata alynabie ei reih hmeiseih. Eima District LAD chhihthatuhpa zydua chô liata alynabie ei reih hmeiseih. Kô 2025 he Chhimtuipui District LAD Golden Jubilee kô châ ta, Golden Jubilee kô ta Tailoring Training Centre pahy thei awpa a vaw châpa he Khazoh byhnâ rônah kawpa a châ hmeiseih. Chhimtuipui District LAD châta la ngiatlâh kawpa kô nata daihti a vaw châ. He Tailoring training centre he Khazohpa ta byhnâ pie lymâ sala, pachutuhpa nata a kaw chu laih lymâ awpazy châta nietluana phapa châta nama hmâh chyu thei n’awpa ta khokheina sâh chaipa ei cha hlâ chyu ei. Abeipa ta byhnâ pie mawh sy," tahpa ta khokheina bie pha kawpa a hlâ chyu ei.

Rev. Kholy Hlychho, District Superintendent nata Rev. Joseph L. Thlauhthang, District Secretary ta pasyuna bie pha kawpa reina ama hnei hra.

Judy Hat Vanlalmalsawmkimi nata Helen Lalkrossparmawii zy ta pahnie kawpa ta hlasapa ta zawpi ama palôhpahawh.

Pihnô TT. Duhtinthluaii, Secretary, District LAD ta report piena a hnei. He Tailoring Training Centre lia he ta asaipa (free) ta ama chu aw.

Puhpa M. Chiadung, EM, MADC he Official lâ tawhta Dr. Beizakaw Vyhtu, Sr. VO, MADC, Puhpa Pawsa Lava, AITO, MADC nata Puhpa Ngoko Chozah, MADC zy ta ama chakaochahlâh.

Pihnô N. Lalmuani ta vote of thanks reina a hnei khai tawhta Rev. K. Kawngkharmawia, District Treasurer ta thlahchhâna ta daihti a pachhâsa.

ISSUED BY:

Information & Publicity Department

Mara Autonomous District Council

Siaha.