TIPA, 1 Thlarâh, 2023, Chutynoh (MNN) - Zâhnia târi 31.8.2023, Pobienoh kha ta Tipa RD Block ry liata Village Council (VC) zy ta Joint VC Conference nata Chhihtuhpa atlyna Election daihti hmâh ei ta, he daihti liata Puhpa L. Prisila, Hon’ble EM (i/c PWD etc.) MADC cha khichhai laipa châta hruapa a châna hawhta Programme â hlaokhei.

 

Programme he MADC Sub HQ: Tipa DAO Conference Hall liata ahmâpa châ ta, Puhpa N. Lalrodinga, Tipa Town Joint VC Chairman ta chhihtha ta, Rev. Robert B. Lalnunsiama, Tipa UPC (NEI) biatuhpa ta devotion a hmâh.

 

He daihti liata khichhai laipa Puhpa L. Prisila, Hon’ble EM chata biereina hnei ta, VC zy cha khitlâh ryureina liata chyhsa peimawh chaipa, khitlâh nô nata paw Grassroot level liata Department Agency ama châ vâta peimawh ngâsâ ei ta, khitlâh he VC zy ku liata apahniehpa eima châ vâta ama peimawh hmeiseihpa a châ tah ta. VC zy cha MGNREGA (Job card) raipa ngâlâh he ama rai châ leipa ta,  eima râh leilô hmâpa ta zawpizy ativyna lâthlôh pachu awpa zy, khitlâh châta hmahsiena ryutlohpa a hria awpa zy ama châ vâta Khazohpa pahno lymâna chô ta âvyuhna kyh liata pathaih tah, khitlâh nata zawpizy hmahsiena rai hria awpa nata zawpizy thlapalôh thei via heihna taihta hmah ama la via lymâ awpa â daih haw tahpa a reih.

 

Khichhai laipa chata MADC ry liata VC zy he State sawhkhâ siepahliepa ta Finance Commission sôh chyh kawpa hmâpa ta MADC ta a mohôh thlâhpa ama châ vâta lymâ (hlao) chyhta hmâpa ta khitlâh mohôh nata chhihthana kyh liata chhithatuh peimawh kawpa ama châ vâta sawhkhâ/MADC chhao ta za kaw ta, â palaikhei hmeiseihpa a châ tah ta, atahmâ (12th Term) MADC, Puhpa M. Laikaw, CEM chhihthapa sawhkhâ ta New Maraland a padua ngâhaipa he ta VC zy cha Maraland hmahsie nawpa châta chhaichhi peimawh kawpa ama châ vâta ama rai liata ngâchhih awpa ta pasyu ta, apha kawpa ta rai hria lymâ awpa ta khokheina a hlâ ei.

 

Second session liata Puhpa N. Lalrodinga Tipa Joint VC ta chhihtha ta, ary liatahpa Resolutions he pass-pa a châ:-

 

1. Tipa RD Block ry liata Joint VC he ta, Palak A/c MLA ta MLA fund, kô kha châta a hneipa tawhta Rs.20.00 Lakhs he Joint VC he ta work proposal taopa ta mohôhna rai hria hra mawh sy. 

2. Tipa RD Block Joint VC liata member athipa ama y ti ta Rs.50,000/- ta taokheipa châsala, he sôh châta VC to ta Bank siepahliepa ta thyupakhy awpata chhituhpazy ta hmahlapazi awpa.

He programme liata Ls. Sophia, Zyhno nata Pu F. Lalrintluanga Tipa zy ta mopakha hlasana hnei ei ta, Puhpa S. Beiseia Secretary, Joint VC Tipa Town ta Secretary report pie ta, Puhpa K. Chhuahlu, VCP Tipa V-I ta Vote of Thanks a reih. 

 

RD Block Joint VC statistics:-

 

Village Councils - 45

Conference ahlaopa VC zie -  31

Conference ahlao theipa maluh - 119

Tipa RD Block Joint VC Election 2023-2028:

RO - Puhpa T. Lalrosiama, Editor, The Tipa Express (MJA) 

 

RESULT:

 

1. Chairman - Puhpa N. Lalrodinga, VCP Tipa V-III, 

2. Vice Chairman - Puhpa LC. Valaw, VCP Zyhno-I, 

3. Secretary - Puhpa S. Beiseia, VCM Tipa D-I, 

4. Asst.Secretary - Puhpa Beirathati, VCM Tipa D-II, 

5. Fin. Secretary - Puhpa K. Chhuahlu, VCP Tipa V-I leh 

6. Treasurer - Pihnô Z. Nunthangi, VCP Tipa D-I

He OB atly thiehpazy he ta, Vice President awpa manôh 5, Tipa khih khôtho lâtahpazy ama rao heih aw. 

 

Atakô RD Block Joint VC Conference he Tipa Town Joint VC ta apatlôpa châ ta, Puhpa KT. Rokhaw, biatuhpa MLA ta Rs.50,000/- a vaw thyupa nata VC zy sôh ama thyupakhy baichhipa hmâpa ta Conference a vaw hlaopazy châta kyhchhi pachhuapanohpa cha aly kawpa ta dôh chyupa a châ. 

(Source: T. Lalrosiama, Editor, The Tipa Express via The Tipa Express Newspaper dated 1.9.2023. Edited & Published by BeiRôkhu Beitâ, I & PO, MADC).