PRESS RELEASE No.51/2021

Siaha, 03 Phiapi, 2021 - Atanoh dawh 10:30:00Am khata Laila Hall, College Vaih, Siaha liata 1st Maraland Fitness Championship 2021 cha Puhpa K.Siakhai, Adviser to CEM MADC ta a pahy.

Pahyna Programme he Puhpa Zatinchunglura, Vice President of Maraland Bodybuilding & Fitness Association (MB&FA) Siaha ta chhihtha ta,  Penticost Rosangliana ta thlahchhâna ta daihti pathao ta, Wushu Association Siaha ta Presentation hnei ei ta, Lincy Solo ta mo pakha hlasapa ta zawpi avypazy a palôhpahawh ei.

Chief Guest Puhpa K.Siakhai, Adviser to CEM MADC biereina chyupa daihti âhmâhpa liata a bierei tlâhpi viapazy:-

A hmiatua ta daihti nata tlâhna phapa maniah pietuhpa eima Khazohpa hnohta alynabie ei reih.

Atanoh he 1st Maraland Fitness Championship 2021 eikhana hnei awpa châ pita, Mara History akhy laih awpa liata cha record a tlohpa châ ta. Atanoh November 3, 2021 he Marasaw châta cha noh ngiatlâh châpa a vaw châ. Atanoh MB&FA ta he hmo a vaw pachhuahpanohpa ei vaw pachâ nah ta Mararâh taopathi awpa ta eima zydua ta maophaohna nata peimawhna eima hnei khai tahpa ei palôh liata a vaw lâ ta. Mararâh taopathi awpa ta maophaohna eima hnei chyuna tahpa eima pahno awpa a peimawh kaw. Mararâh taopathi n'awpa ta Awnanopa a daih khao vei, MTP, MSO a daih khao hra vei, râh taopathi awpa heta eima zydua ta râh ta miah peimawh ha bâ. MTP, MSO, MCHP ta ataotheina liata tao ta, hmah ala ngâ kaw hra, Council chhao a châ hra, nâmo MB&FA he chhaichhi peimawh kawpa miakha vaw châ ei chi ta, râh taopathi n'awpa kyh liata, cha liata atanoh he programme liata ei vaw hlao theipa he palôhru hmeiseih ta ei ly tahpa ei vaw reih chanei. 

Eima râh moh pita, tlâh vei. Zawpi tlâh vei, tlâh awpa peimawh pita - patlâhtuhpa Khazohpa y ta, cha nota peimawh chaipa cha kei mo pakha hena peimawh chai tahpa he reih khoh na ta. Zisu Krista moto châta â vy ta, angiahpa maih pachha ama châ. Ei vaw reih khohpa cha râh taopathi awpa heta keimo hena peimaw pi e, tahpa he  reih khoh na ta. Eima taotheina kao chyu liata tôhpiphia pita, cha eima taotheina kao chyu liata tôhpi eima phia vâ cha râh tlâh n'awpa nata râh hmahsie n'awpa chhaichhi a vaw châ.  Ahy ku lia hmahta eima soh khao'pa châ vei. 

Râh thâtih eima reih  nahta keimo a soh pita, Pastor maochhie ngâ bâ, Awnanopa maochhie ngâ bâ, Politician nah maochhie ngâ bâ, Pachutuhpa maochhie ngâ bâ, sawhkhâ raihriapa maochhie ngâ bâ. A peimawh chaipa cha keimo mo pakha a châ. Keimo mo pakha eimâ taopathi khiahta cha, keimo châ pha, chhôhkha châ pha, khitlâh châ pha, râh châta pha, Awnano châ chhaota pha, râh hmahsiena chhao a châ hra. Keimo mo pakha chyu eimâ taopathi khiahta cha Khazohpa chhaota Byhnâ miah pie aw. Maraland Bodybuilding & Fitness Association (MB&FA) vaw padua ei chi ta, Nâmo MB&FA chhao he  Khazohpa ta râh hmahsie n'awpa ta chhaichhi ta a cha hmâh khoh ei tahpa he ei reih khoh. Bieso sâkha ta cha hmophapa na khoh khiahta la nâ tawhta athao mah y tahpa he a châ, â do hmeiseih. Keimo deikua cha chyhsa hropa bai tyh pita, chyhsa hropa maophaohna pie tyh pita he he a do vei. Mararâh pha n'awpa ta nata Siaha khihpi pha n'awpa ta hmo sâkha ngâlâh peimawh ta, cha cha keimo mo pakha ataopathi awpa he a châ.

Ei châ ly kaw ei.

ISSUED BY:-

Information & Publicity Department

Mara Autonomous District Council

Siaha.