PRESS RELEASE

NO.51/2024

 

SIAHA, 5 Thlazoh, 2024, Hriatuanoh – Atanoh my dawh 11:00 AM kha ta Mara Autonomous District Council (MADC) National Institute of Electronics and Information Technology (NIELIT) Study Centre liata achu awpa Batch 3-nazy cha MADC Golden Jubilee Hall, MADC Complex, Siaha liata briefing hneikheipa châ ei ta, he daihti liata Puhpa K. Vanlalliana, Executive Secretary (ES), MADC ta Student-zy hnohta pasyupalina bie reipa ta daihti a hmâkhei ei.

 

Programme he Puhpa Beirôkhu Beitâ, I & PO, MADC ta chhihtha ta, Puhpa Pawsa Lava, AITO ta pavaosana thlahchhâna a hnei. Puhpa Colin C. Ngohai, Course Coordinator & Information Technology Officer ta amâ chu awpa Course on Computer Concept (CCC) thâtih reipasiana nata MADC NIELIT Study   Centre liata course siekheina dâh tlâhpipa student-zy hnohta pahnosana a hnei.

 

Puhpa K. Vanlalliana, Executive Secretary chata pasyunabie reina a hneina liata Student-zy cha athôhkhei tah, thlaochhi kawpa ta hlaotlohna byhnâ tlôkhei cheingei awpa ta achu awpa ta pasyu ta, atahmâ daihti ‘computer age’ liata cha hmoto he computer ahniahnipa viarô sai vaw châ bâ ta, sawhkhâ rai ahria awpazy châ chhochhi cha chhaichhi peimawh ngaitapa a châ ha bâ; he hawhta achuna daihti phapa nama hneipa he nama vâhnei ngâsâ tah ta, “keimo daihti liata cha Siaha liata chuna chhao y lei ta, achu khoh kaw hra ei sila rypaohna y thai vei; he hawhta eima duahmo a châ vâta sawhkhâ rai eimâ ngia tawh chhao ta training hluhpi eima kiah laihna chô chhao ta thai hmeiseih thai khao ma pi; thyutlia via daihti liata pachâna hneina chô ta namâ chu awpa he apeimawh ngâsa; atahmâ achuna daihti phapa liata nama tao thlâhthlipa ta a châ khiatala hmialâ daihti liata thai hmeiseih thai khao aw vei ei chi” tah ta, phahnai ngiah kawpa ta achu tah, thai hmeiseih awpa nata pasyu ei ta; apha kawpa ta achupa course patlôpa ta hlaotlohna khochhih kawpa hnei chyu awpa ta student-zy hnohta khokheina a hlâ ei.

 

MADC National Institute of Electronics and Information Technology (NIELIT) Study Centre liata CCC he thla 3 chhôh achu awpa châ ta, asaipa (Free) ta pachupa a châ. Atahmâ batch liata achu awpazy cha student 80 ama châ. 

 

ISSUED BY:

Information & Publicity Department

Mara Autonomous District Council

Siaha.