PRESS RELEASE

NO.10/2022

TIPA, 26 Nawh, 2022 – Atanoh my dawh 11:00 AM kha ta Puhpa K. Hrahmô, EM i/c Edu., MADC ta Tipa DAO Office tlymia liata Indian Republic Day ei 73-na alyna châta Indian National Flag a pakai (unfurled).

Vâ suapa aparu kawpa vâta Flag pakai khaipa a châ tawhta DAO’s Conference Hall lâta apasiepa ta programme hmâ pazipa a châ.

Programme he chhaih 2 lâta taopa châ ta, chhaihkhana liata Ls. Gospel Beireizingia nata Ls. Gospel T. Nango zy ta thai kawpa ta Field Announcer châpa ta pahnie kawpa ta siekhei ei ta, chhaihnona liata Puhpa T. Seido, Dy. Chief   Whip, MADC ta Chairman châpa ta a chhihtha hra.

Chhaihkhana lia he ta Republic Day lâ aheipa ta programme ahmâpa châ ta, Chief Guest Puhpa K. Hrahmô ta biereina a hnei.

Chhaihnona liata Rev. Jimmy F. Sachai, ECM Tipa biatuhpa ta thlahchhâna hnei ta, Puhpa K. Hrahmô, Chief Guest tawhta biereina chyupa nahthlie heih tuapa châ ta, he khai tawhta Puhpa F. Lawmkima, EM i/c E & F Deptt., Puhpa K. Siakhai, Adviser to CEM zy ta biereina chyupa ama hnei chyu hra.

Chhaihnona lia he ta Ls. Vadawthie nata Ls. ST. Catherene zy ta biereina likhaw liata mopakha hlasana hneipata zawpi avypazy ama palôhpahawh. Programme chhâ tawhta Puhpa K. Thlalo, DAO, Tipa ta a pachhuahpanohpa zâpati dôlâhna hnei pâpa a châ.

Atanoh liata Chief Guest Puhpa K. Hrahmô ta MADC Sub-Headquarters hawhta pachâ tyhpa Tipa su liata Indian Republic Day hmâ thei awpa ta tlâhna nata daihti phapa a pie tuhpa Khazohpa hnoh ta alynabie reih ta, tovyuh pha kawpa a pie tuhpa MADC liata a hrialâhpazy hnoh ta alynabie a reih. Atanoh liata zawpi avypazy hnoh ta anaohna nata zana hlâ ta, alynabie a reih. A ry liata palâsapazy he a bierei tlâhpi viapazy a châ:-

1. Atanoh liata he hawhta MADC ta anoeihta Republic Day eima hmâna chhâpa he Mizoram sawhkhâ ta ADC liata Elected zy duahmo ahnai kawpa ta sopa pasâh via awpa ta eima hiapa atanoh taihta hlaotlohna a y lei vâta a châ.

2. India ta January 26, 1950 tawhta India râh châta taopa dâh hmâpathaopa vaw châ ta, he noh ngiana châta atanoh taihta Republic Day he hmâ lymâpa a châ.

3. India râh liata chi to pho to a ypazy pi he sahdô miakha liata pawpi chi nano nanopa, adisaona y leipa ta âmo paw nochâ ta â ngia kawpa pawh ei sala tahpa hawhna he ta India dâh he miah ama taopa. He zawhzi ta keimo hawhta India râh liata chi chynawh viapazy châ taihta ryureina eihrâhpa eima hnei nawpa ta Article 224 & 275 lia zy ta dâh sianô kawpazy ama vaw pachosa hapa a châ. He hawhta palôh a vaw hnei paphapa India râh nôpaw hmiatuapa Pandit Jawaharlal Nehru, Mahatma Gandhi zy, Dr. Ambedkar zy he, keimo châta cha alei Khazohpa tah lei thai’pa châ vei ei; ama hmotaopa he a rônah tu haw. Chavâta atanoh he liata avypa zydua hmiakô liata he India râ nôpaw hmiatuapazy hnoh ta alynabie ei reih hmeiseih.

4. He India râh nôpaw hmiatuapazy thâtih eima reih raohpa he ta eima Missionary RA. Lorrain nôvah nah he my thai’pa châ vei ei; âmo ta thâtihpha ta miah pakhaih ei ta, chadei châ leipa ta, vision hnei ei ta, he thâtihpha chhopa ta Krizyhpa châ awpa ta eima pakhaihpazy he chhâ a vaw y awpa liata cha Mara chi nata pho he a lei thei awpa a châ pyly tahpa ama pahno vâta Mara bei nah zydua awpa ta Puhpa Chôhmô chhihthana ry liata Conference hneipata ama tlôpakhyna daihti liata English ta Memorandum zy rohpa ta 1946 liata India sawhkhâ liata tlôkheipa ta biehneina sâh viapa hia awpa ta apasopakâ tuhpa cha RA. Lorrain nah nôvah ama châ. He daihti liata Marapazy ta English ta châ aroh thei awpa eima y lei vâta English lâta Memorandum a rohtuhpazy chhao he eima Missionary pyly ama châ.

11th term MADC sawhkhâna he ta rairuna hluhpi chatôh lymâna chô ta Mararâh châta a theina hawhta rai a hria hrapa thokhazy cha:

1. Land Revenue & Settlement Administrative building cha hlaotloh kawpa sapa châ ta, MADC Complex liata Land Revenue & Settlement Dept. building chhao he Extend pa a châ. 

2. Farmers Training Hall or building hlaotloh kawpa sa patlôpa a châ.

3. Chhaolo-II nata Amotlah Village Gravity Water Supply Scheme   chhao hlaopatlohpa a châ.

4. MADC Area liata Road side plantation a pha kawpa ta hriapazao lymâpa a châ.

5. Mara sawzy tlôkiana phapa eima hnei thei nawpa ta Delhi liata Mara House sa nawpa ta Râh chaleipa a châ. Fencing chhao tao khaipa a châ.

6. Zoram Medical College kiapâh Falkawn liata Râh chalei pâ hrapa a châ.

7. Siaha liata Lorrain Market hlaotloh kawpa ta sa patlôpa châ ta, Aizawl liata Mara Students’ Hostel - Chanô nata Chapaw châta anoeih ta sa patlôpa a châ.

8. Siahatlâh liata MDC Hostel sa patlôpa a châ.

9. Vahia nata Miepu, Amôtlâh nata Tisôpi lâthlôh chhao hlaotloh kawpa ta taopa a châ.

10. Industry Department Building, MADC chhao hlaotloh kawpa ta sa patlôpa a châ.

11. MADC main complex liata Motor parking sa patlôpa châ ta, a chô lâta MADC Golden Jubilee Hall chhao thlaita pahy thei awpa ta patohpatia haipa a châ hra. 

12. MADC Vety Department liata Solar khaihna sopa châ ta, Viachao sâhpiti chhao Siaha khih chhôh liata rai tyhpa a châ.

13. Kô kha hlei khô hapa 2015 tawh khata achuhaipa Central nata State liata UPSC nata MPSC Preliminary Exam pass pazy cha Incentive Cash Award – UPSC Rs.1,00,000/- (Rupees One Lakh) nata MPSC Rs.20,000/- (Rupees Twenty thousand) pie lymâpa a châ.

14. Union Minister i/c Sports, a tliata liata miah a kaw tly no khata Sport Complex pitlohpa miah taopa awpa a khona maniah chho ta, he châta râh kawh ngâsâpa Chhâtlâh, Siaha liata chaleipa a châ. He he a pitloh thei khiata la eima thyutliapazy ta ataopasuana khizaw liata a tlô ngâsâpa ta nie amâ tlua thei hra aw tahpa hnabeiseihna lai ngâsâpa eima hnei.  

15. Chhâtlâh su lia pyly heta Solid Waste Management châta râh piepa châ ta, Solid Waste Management project he hlaotloh awpa ta hnabeiseihpa a châ hra. 

16. MADC eima hneina chhâpa peimawh kawpa Mara chi nata pho pabohsa ta palaiseihsa awpa hleikhô ta eima mahnô mahpaw daihti tawhta eima hneipa chei-ozy pabohsa nata palaiseihna awpa he eima nôpawnazy ta ama pahno vâta kôchareih ta Tipa nata Siaha liata Lyuva Khutla ahmâ tyhpa a châ.

17. MADC Building eima tlô ngâhaipa he aparoh kaw bâ vâta a thiehpa miah sapa awpa ta Central sawhkhâ lâ Rs.5,000/- Lakhs hiapa châ ta, thlai a hlaotlôh nahta hnabeiseihpa a châ.

18. MADC Model Students Scholarship pachhuahpanoh ta, MDC Constituency 25 zy liata Class-V, VI, VII & VIII – sâpalih zy tawhta athai chaipa student papalihzy hnoh ta kô chhâna lâ liata Rs.6,000/- chyu raipa a châ.(COVID-19 Pandemic chhôh deikua SOP vata tao thei mâh leipa a châ.)

19. MADC ta dâ nata phôh tao lymâ pi ta, atahmâ he Mizoram Governor approve pa ta Mizoram Gazette liata apua chiehpa 34 eima hnei haw. (He dâhzy eima hnei hlâta cha Executive biehneina ta siekhei tyhpa châ ta, atahmâ deikua he dâhzy he abei chai ta, Executive ta dâh chô lâ rai hria thei khao vei.)

A chhâ chaina liata eima râh liata Nochhi lâ eima unawh Refugee nahzy duahmo ngiachhie amâ chhih kawna tahpa apahno tuhpazy châ pi ta, notlâ lâ ta unawh eima hnei tahpa pahnopa ta azâ râpazy he eima theina hawhta baopa ta eima deichhy lymâ awpa ta

Atanoh Indian Republic Day ei 73-na avaw hmâh tuhpa zydua hnoh ta alyna bie cha hlâ chanei ei na ta, khokheina sâh chaipa ei cha hlâ chanei ei.

ISSUED BY:-

Information & Publicity Department

Mara Autonomous District Council

Siaha.