PRESS RELEASE

NO.43/2021


Puhpa K. Hrahmô, EM, MADC ta Puhpa LB. Thatlô châbu ‘Loleipaw’ palâhâh

SIAHA, 31 Thlazoh, 2021, Hriaheinoh – Atanoh dawh 1:00 PM liata Puhpa LB. Thatlô châbu ropa “Loleipaw” cha Puhpa K. Hrahmô, EM(i/c Edu.) MADC ta zawpi rei thei awpa ta MTP General Headquarters Opi, Siaha liata a palâhâh.

 

Palâhâhna Programme he Puhpa J. Ngôchyu, Secretary i/c Art & Culture, MTP Gen. HQ ta chhihtha ta, Rev. Stephen Behrosia, ECM Saikao biatuhpa ta pavaosana (devotion) daihti hmâh ta, Puhpa Aron Chhachhai ta châbu thâtih reina (preview) a hnei. Puhpa PP. Zalena, President, MTP Gen. HQ ta biereina chyupa hnei ta, daihti chhâna lâ liata Puhpa LB. Thatlo, Author ta alynabie reina daihti a hmâh.

 

He châbu he Mararâh liata Miss châna (title) a vaw la hapazy thâtih rona (biography) châ ta, ary liata palâsapazy he châbu chhôh liata ypazy ama châ:-

 

1. Lawmzuali Khithie - Miss Mara 1992

2. TT. Hraisi - Miss Mara 1994

3. Jineli Nohro - Miss Mara 1996

4. Jeno Hlychho - Miss Mara 1998

5. L. Byhnadaorili (Dingi) - Miss Mara 2001

6. Wendy Laltlansangi Khaimeichho - Miss Mara 2004

7. Irisha Thlyutha - Miss Mara 2014

8. KT. Gospel - Miss Mara 2016

9. Ephesi Hlychho - Miss Mara 2019

10. Esther - Cultura Miss 1985

11. J. Lynapawti - Maraland Gospel Centenary Miss 2007

 

Châbu palâhâhtuhpa Puhpa K. Hrahmô biereipa thokhazy:-

 

1. Mararâh liata Miss Mara Pageant (beauty contest) he eima râh liata NGO laichaipa MTP ta vaw pachhuahpanoh ta, Miss avaw châhapazy thâtih rona châbu, MTP Gen. HQ Opi lia cheingei ta palâhâpa a vaw châpa he ei ly hmeiseih. Author Puhpa LB. Thatlô ryrao thaina a châ tah leithei leipa na ta, châbu pha kawpa miah a pachhuahpanohpa heih thei vâ chhao ta a chô liata alynabie ei reih.

 

2. MADC chhao ta a theina rakha ta Art & Culture Department siepahliepa ta châbu vaw buakhei hra ta, atahmâ 11th Term liata châbu 32 tlai papuapa vaw châ ha ta, he hawhta eima thyutlia nahzy ta Mara reih châbu ama vaw roh theipa he a rônah tah na ta, Mara reih laiseihna nata abohna chhaichhi a châ vâta eimâ ly kaw.

 

3. Marapazy pi he chi chynawh kawpa nata râh buah kawpa liata a ypa eima châpa chhao ta, Khazohpa ta eima Missionary RA. Lorrain siepahliepa ta chi nata pho ta miah padua ta, eima reih zy â boh thei nawpa ta ryureina eihrâhpazy eima hnei theipa he eima vâhnei hmeiseih. Atanoh liata eima Missionary nahzy athei pi ta, zana eima hlâ hmeiseihpa a châ; ano hmâpa ta Khazohpa ta Mararâh he miah a pabohsa tah leitheipa châ vei.

 

4. Marapazy pi he Hlâno eima mahnô mahpaw daihti tawhta hla nata bie ahnei hluh kawpa na eima châ tahpa ta eima uhta via nahzy ta reih ei ta, ropa a y hluh lei vâta hla nata bie liata eima hneirônazy alâ tu vei hra sala, thyutlia sawzy tiamana nata hriapasana vâta chi nata pho eima châna zy nata eima Missionary Rev. RA. Lorrain ta Phopi Râh (country) na ama châ miah a tahpa kha eima reihchâ nata châbu eima hneipa zy lia he ta â vaw lâ via lymâ aw.

 

5. MADC â vaw dao thaoh no ta eima nôpaw hmiatuapazy ta School liata Mara reih a chu awpa châbu liata ama nôpo kaw ta, a chu awpa châbu eima vaw hnei hluh lei kaw. Atahmâ deikua cha Class-X taih chhao ta achu thei awpa Mara reih châbu eima hnei haw.

 

6. Loleipaw chhao he Marapa châta Ryusôh miakha châ ta, Marapa chhâ a vaw y laih lyma awpa liata a pahnai ngaita kaw awpa a châ.

 

7. Mara reih ta châ arohpazy ta tiama papua via lymâpa ta eima reih he Khazohpa ta miah a piepa a châna hawhta zakhei leipa ta cheih lymâ ta, roh hluh via ly mâ awpa ta a hrua pi ta, Puhpa LB. Thatlô chhao, atahmâ tahpa he a chhâna châ leipa ta tiama vaw papua via lymâ awpa ta khokheina sâh chaipa ei hlâ.

 

Atanoh Programme liata ama pôhpa ta a vaw hlao theipa miss nahzy:-

 

1. Lawmzuali Khithie - Miss Mara 1992

2. Irisha Thlyutha - Miss Mara 2014

3. J. Lynapawti - Maraland Gospel Centenary Miss 2007

 

He palâhâna progarmme he COVID-19 hriiah a charei daihti a châ vâta chyhsa hluhpi hrua thai’pa a châleina kyh liata Author Puhpa LB. Thatlô ta zawpi lâ pachâthaina ahawta, sawhkhâ SOP zyna chô ta programme he siekheipa a châ.

 

ISSUED BY:-

Information & Publicity Department

Mara Autonomous District Council

Siaha.