PRESS RELEASE

NO.22/2023

SIAHA, 1 Hmypi, 2023, Pakhynoh – Chakhei biatuhpa MDC Puhpa K. Hrahmo, EM i/c Revenue etc. MADC ta a bia liata khih ypa – Chheihlu, Chakhei nata Siasi zy cha atakô 2023 liata a ei kha nawpa ta tly ta, bia zawpizy Kôthiehpa anaohna nata khokheina bie zy a reih laih.

Puhpa K. Hrahmô, EM zachhihpa ta târi 27.1.2023, Chutynoh ta Siaha tawhta athaopa ta Chheihlu arie ta, târi 28.1.2023, Pachynoh ta Chakhei angiapa ta 29.1.2023, Abeipanoh Chakhei lia hmâh ta, ECM Local Church: Narazeth, 6:00 Pm Service liata daihti tleipa a châ. Târi 30.1.2023, Hriatuanoh ta Siasi pangaipa ta, târi 31.1.2023, Hriaheinoh chhao châh pâpa ta zâ 2 a rie ta, târi 1.2.2023, Pakhynoh liata Siasi tawhta Siaha pangaipa ta za sie ta, apalâ kawpa ta Siaha a tlô.

Khito liata Public meeting daihti pha kawpa vaw pachhuahpanohpa ei ta, aly kawpa ta daihti hmâpa a châ. Khito liata biereina hnei ta, kôthiehpa anaohna nata khokheina bie reih ta, achuhaipazy cha ama tiama kô nata hlaotlohna kô vaw châ sala, zawpi vâtlâh châta hnatlâ hri-iah pathaihna nata sawtei nawhtei pha kô nata ku raihria nata lyutaopazy châta kôvei kô vaw châ sala tahpa ta Bia zawpi châta byhnâ a awpa ei. 

“Mararâh Missionary Vaili mahpaw zawhzi ta Mararâh he â boh tah leitheipa châ vei; ano nata Vaili Paw zy pasopakâna ta Marasawzy ta District Council vaw hnei pi ta, atahmâ cha eima Missionary nahzy vâta Marasawzy ta lyuri bâkhâh yzie hnei kawpa vaw hnei ha pi ta, chahleikhô ta Missionary nahzy vâta Mara reih he hnei pi ta, Mara chi nata pho aduapapuana kyh liata Mara reih - reihchâ eima hneipa he chhaichhi peimawh ngaita pa a châ. Mara chi nata pho â boh nawpa ta chi hropazy ta hmah la aw vei ei; keimo Marasaw maophaohna a châ; Mara reih pabohsa tah, hmahpasiesa awpa ta hmah la chyu suh u.”

“Eima râh hnei chhôhpa Mararâh mohôh ta pabohsa awpa he keimo Marasawzy maohphaohna a châ; eima sahdô, leipalie nata ohmo lyuhmo eima hneipazy he chi hropazy hnoh ta zuah lei awpa a châ.”

“Eima Missionary nahzy ta Thâtihpha ama vaw tlôkheipa dei châ leipa ta Mara reih miah taopa ei ta, he Mara reih he Marasawzy eimâ bohna thokhy a châpa ta ei pahno tyh. Gospel he cha, nochhi nata notla lâ tawhta miah chho aw ei ta, eima Missionary nahzy Mararâh ama kaw tlô thei leipa chhao ta eima khaih pyly nahta ei pangiasa; anodeikua Vaili mahpaw hawhta Mara reih Châ ropa A AW B CH he miah ama taopa nahta pangiasa va na; chavâta eima Missionary nahzy he Krista Chatlaina Thâtihpha ngâlâh ama kaw tlôkheipa châ leipa ta Mara reihchâ Biehrai nata Hlabu zy miah taopa ei ta, Biehrai chhochhi cha Mizo reih hlâta Mara reih he vaw tao tuapa a châ; eima vâhnei hmeiseih. Chi nata pho ta miah tao tuhpa eima Khazohpa hnoh ta alynabie khâ reih ei suh u” tahpa ta pasyuna bie pha kawpa a reih. 

Puhpa K. Hrahmo, EM chata Chakhei liata a biereina liata a sawchanô K. Ngosai, atakô liata Mizoram Information Service (MIS) a vaw tlohna kyh liata Chakhei khih zawpi ta Dyna gate rônah kawpa zy, alykheina programme khochhih kawpa zy hleikhô ta Seitôhpa ta kyhchhipa ta ama lykheipa cha arônah tah ta, â lyzie reih ta, Delhi lâ khitlyna vâta he alykheina liata ano pôhpa â hlao thei leina kyh liata pachâthai ahawna bie a reih.

Atahmâ khitlyna liata Chakhei khih liata atakô Class-X Centre thiehpa Gov’t High School: Chakhei liata a exam awpazy hnoh ta Gov’t High School O, Chakhei liata pasyuna bie pha kawpa reih ta, Class-X liata hlaotlohna ama vaw hmô ti ta aheihpa achu pazao awpa liata Subject ama pahâpa nata ama thaipa atly thai kaw awpa apeimawh zie reih ta, uhthei viapa nata apahno viapa, pachutuhpa nata nô & paw zy asaohiahna chô ta amâ chu pazo awpa subject cha ama pahâkhei hmeiseihpa Subject cheingei atlyh awpa ta pasyuna nata Class-X exam awpazy hnoh khokheina a hlâ ei.

Siasi liata Refugee ta a y haipa (Sautie mo odyh 50 hlei, Ngiaphiapi mo odyh 60 hlei) nahzy, ama rairuna zy nata ama duahmo zy pahno hra awpa ta Refugee nahzy hry liata leader amâ tlypazy nata Siasi Refugee Board nahzy chhao ta apakyhna chhao hnei ta, hmosai piepa hlâ pâ ta, Refugee camp chhao a tly hra.

Siasi liata khitlâ nôpaw nahzy hruapâpa ta MTP General meeting pahruapa liata Puhpa K. Hrahmô, EM zachhihpa he ta biereina hnei ta, Siasi khih he Mararâh liata international border khih ypazy hry liata khih peimawh kawpa châ ta, MTP ta Paritheipa adyuhna kyh liata Mararâh hawka peimawh kawpa liata apahrâpa ama châna hawhta tiama papua via lymâ awpa ta ahawna tao ta, Refugee mohôhna kyh liata MTP nahzy ama tiamana nata hriapasana zy liata reithai tlâh ama châ tah ta, alynabie a reih.

Puhpa K. Hrahmo he 12th Term MADC liata sawhkhâna ataopa hry liata â hlao hleikhô ta Executive Member i/c Revenue etc. portfolio pha kawpa a topa vâta Chakhei khih liata VC nahzy ta alykheina châta Seitôhpa tihâh vaw sapa ei ta, Public meeting hnei khai tawhta aly kawpa ta alykheina zâpati dôh chyupa a châ. Chakhei, Siasi nata Chheihlu khih liazy ta VC nôpaw nahzy hleikhô ta mo pakha, chhôhkha nata Political Party unit zy tawhta Vao, Awh, Mie thiepa ta seiheina tihâh avaw sapapa ama y hrapa a châ.

Puhpa K. Hrahmo, EM zachhihpa he a lahpinô Pihnô B. Ngiasô ta zi ta, officials tawhta Puhpa BeiRôkhu Beitâ, I & PO nata Puhpa John K. Rema, VFA zy ta zi ei ta, BJP District Headquarters: Siaha leader tawhta Puhpa AZ. Sa-u, Vice President (Youth) ta a chakaochahlâ hra.

ISSUED BY:

Information & Publicity Department

Mara Autonomous District Council

Siaha.