PRESS RELEASE

NO.12/2025

SIAHA, 28 Nawh, 2025, Hriaheinoh - Atanoh zâlâ dawh 3:00 PM kha ta Mizoram Journalist Association (MJA), Siaha District, Siaha Annual Conference ei 41-na cha MADC E & F Department Nagar Van Site, Siaha Tlâhpi liata 2nd Session ahmâpa châ ta, he daihti he Puhpa K. Chhuabei, EM i/c LAD etc. MADC ta a hmâkhei ei.

He daihti Puhpa K. Chhuabei, Hon’ble EM chata biereina chyupa hnei ta, ary liata palâsapazy he a bierei tlâhpi viapazy a châ:-

1. Programme eimâ hmâna su Nagar Van Site pha kawpa, Mizoram liata lymâ a daopa, eima MADC Forest Department ta eima hneipa he aly’pa a châ hmeiseih; Puhpa Tiahlei Syuhlô, EM i/c Forest nata a hrialâhpazy hnoh ta alynabie ei reih. 

2. District uhtheipa eima châ tarawpa ta population eima chyh kaw vâta population based ta raihriapa a châ nahta cha eima District liata raihria awpazy he chynawh kaw tyh ta, rai hria awpa eima hnei tlakaihpazy he ryutlohpa ta eima hnei lymâ thei nawpa he ta NGO nata a râh leilô zawpizy ta eimâ dady chyu liata eima hrialâh pha awpa he a peimawh kaw.

3. Pathaihna kyh liata MADC LAD ta thata hmahla pi ta, kô 2023 liata Mizoram pôpalôhpa ataopasuana liata sâ 3-na châ pi ta, 2024 liata sâ 2-na eima châ thei heihpa he eimâ ly hmeiseihpa a châ. He lymâ he Siaha DC office liata hriapazy nata MADC LAD liata hriapasana nata tiamana hleikhô ta, VCs, NGOs nata a râh zawpi zy hriaparaoh pha vâta a châ - atanoh liata ama hriapasana zydua vâta alynabie ei reih. Pathaihna kyh liata hmah eima sie via lymâ thei nawpa ta Mararâh zawpizy chhao miah hrialâh pha via lymâ awpa ta eimâ haw hmeiseih.

4. Centre Schemes, eima râh hmahsie nawpa ta pachhuapanohpazy nata Infrastructure thiehpa sapa zy he a pha kawpa ta mohôhpa a châ thei nawpa ta MJA zy he peimawh ngâsâ ei chi ta, he hawhpa kyh liata atakô 2025 tawhta cha tiama papua via lymâ heih awpa ta eimâ hawpa a châ.

5. MJA zy he amôpa tawhta eima thyu awpa byuh ta, IT hmahsie lymâpa hawhta keimo chhao eimâ pathieh lymâ awpa apeimawhpa a châ. Law court eimâ hnia kawpa vâta pangiasapa roh chakhyh thlâh leipa ta News rairai he a su tlô laih tah, keimo ta eima lapa nothlahpa nata video chhao ta thâtih eima roh lymâ awpa he a peimawh kawpa a châ. Chavâta eima râh chyhsazy ta Editor nama châna ama cha pahnopasia via lymâ thei nawpa ta nama tiama via lymâ awpa a peimawh.

Puhpa K. Chhuabei, Hon’ble EM chata MJA Siaha zy ta atanoh Annual Conference baona châta sôh hlâ pâ ta, hmialâ ama sie lymâ nawpa liata khokheina sâh chaipa a hlâ ei.

Programme he Puhpa Jeffrey Khara, Vice President, MJA Siaha ta chhihtha ta, Puhpa Joshua Chozah, Under Secretary, LAD, MADC ta pavaosana a hnei.

Puhpa CZ. Hluna, President, MJA Siaha ta Presidential address daihti hmâh ta, Puhpa Beirôkhu Beitâ, I & PO, MADC nata Puhpa B. Dawpho, MDC & Prominent Journalist zy ta biereina chyupa daihti ama hmâh. Puhpa PT. Lalhnehzova, Secretary i/c Information, MJA Siaha ta vote of thanks reih ta, Puhpa Lalnunkima Pisa, MJA Siaha member ta thlahchhâna hneipa ta programme he pachhâsapa a châ.

Puhpa K. Chhuabei, Hon’ble EM he a lahpinô Pihnô Nakho Solo, Puhpa Joshua Chozah, Under Secretary, LAD, MADC, Puhpa Beirôkhu Beitâ, I & PO, MADC nata a hrialâhpazy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.