PRESS RELEASE

NO.153/2023

SIAHA, 19 Di, 2023, Hriaheinoh - Atanoh zâlâ dawh 2:30 Pm kha ta Siaha District Volleyball Court New Siaha East - II, Siaha liata Siaha District Volleyball Association (SDVA) ta ama pachhuahpanohpa MADC Chairman Trophy (Volleyball) 2023 Closing Programme ahmâhpa châ ta, he liata Puhpa K. Chhuabei, EM i/c LAD etc. cha khichhailaipa châpa ta programme a hmâkhei ei.

Akhawna programme he Puhpa PC. Lalhmingthanga, Sr. Vice SDVA ta chhihtha ta, Puhpa Reuben Hlychho, Vice President,  SDVA ta Techical Report pie ta, Puhpa CZ. Hluna, President, SDVA ta vote of thanks a reih.

Puhpa K. Chhuabei, Hon’ble EM chata biereina daihti chyupa a hneina liata daihti phapa a pietuhpa Khazohpa hnoh ta alynabie reih ta, Chief Guest châta akhokheituhpa SDVA leader-zy hnoh ta alynabie a reih.

Chanô Team nata Chapaw Team, Semi final a siepahliepa Team 4 zy cha khokheina hlâ ta, Champion awpa deikua Team 1  ngâlâh a y awpa a châ vâta Runner-up team zy cha aheihpa liata tiama papua via rili awpa ta khokheina hlâ ei ta, he MADC Chairman Trophy pachâ peimawhpa ta avaw hlaopa Club zydua hnoh ta alynabie reih ta, a champion thei mâh leipa nata Final angia thei mâh leipa Team zy cha aheihpa liata tiama vaw papua chyu awpa ta a pasyu ei.

“Paritheipa ta eima râh thata pabua ta, atahmâ he TNT nata Home nano nanopa liata mohôh byuhpa thyutlia hluhpi ama y; âmo pachhapapuana rai hria awpa ta nâma nata keima eima peimawh hmeiseih.”

“Eima râh liata thina he, hluh via cha pari theipa vâta a châ. Paritheipa atao leipazy sport chyhsa eima chahneipazy eimâ châ paleikhei kaw; ataotuhpa châ leipa ta paritheipa sei liata atâhpazy pachhatuhpa châ   awpa ta ei châ haw ei.”

“Eima râh lita Cancer pasana a hluh kaw. Paôpazy vâta Cancer pasana a hluh tahpa Doctor zy ta miah ama chho. Eima sapa hnatlâna hleikhô ta eima Economy taihta aparao ngâhaipa paôpazypa kyh liata eimâ sohsi awpa a châ.

“Eima Mararâh liata byhnâ thata a vaw tlô ngâhai no ta rai hria hoh leina nata thatina ta miah a tlahnaoh ngâhai. Thathipa ta a sapapuapa cha parupazy nata hmo pha leipazy a châ. Viah nah he eima râh liata hluhpi ama y - a y chakhyhpa mo pakha dâhdei chhao y vei ei - ama zydua ta kheihawhpa rai chhâ ma ama hria chyu. Noh hro lâ liata âmo sei liata eimâ tâh lei nawpa ta atahmâ tawhta tiama papua ta rai hria lymâ hra ei suh u.”

“Nâmo hawhta sport chyhsa eima pahno kawpa Footballer Jeje Lalpekhlua ta Politician rônahpa Dr. R. Lalthangliana cha a tliata liata MLA Election a pahnie tahpa eima pahno. Chavâta nâmo chhao eima râh châta chyhsa hmâtlâh a châpa - Awnano & NGO Leader, VCP, MDC, MLA etc. zy nama châ thei khai tahpa apahno teh u. He chhâ asie ngâhaipa he Thyutlia râh a châ hapa vâta achhuahna hneipa ta palôh nama hnei awpa apeimawh hmeiseih. Nama thaina sona kao liata chhôhkha, vaih nata eima râh mohpaphatuhpa chyhsa châ achhuah chyu awpa ta khokheina ei cha hlâ ei” tahpa ta pasyuna bie pha kawpa a reih.

Atakô MADC Chairman Trophy - Volleyball he Volleyball Club nano nanopa tawhta chanô team 8 nata chapaw team 9 zy ta ahlao thei ei ta, chanô team liata Siasi Volleyball Club nata Siahatlâh Volleyball Club zy ta final akhai ei ta, Siahatlâh Volleyball Club zy ta 3-2 ta ama tlô. Chapaw team liata Southern Young Volleyball Club nata Southern Spikers Volleyball Club zy ta final akhaih ei ta, Southern Young Volleyball Club zy ta 3-0 ta ama tlô.  Best Spiker liata chapaw tawhta Lalvana (Southern Young) atlypa châ ta, chanô tawhta HC. Laldanglovi (Siahatlâh) atlypa a châ. Best setter liata chapaw tawhta Andrea (Southern Young) atlypa châ ta, chanô tawhta Benita Solo (Siahatlâh) atlypa a châ hra.

ISSUED BY:

Information & Publicity Department

Mara Autonomous District Council

Siaha.