PRESS RELEASE

NO.8/2025

SIAHA, 24 Nawh, 2025, Chutynoh – Atanoh dawh 11:30 AM kha ta Jessica Ngody Hlychho, Mara Idol Season-6 ta Music Video Album a taopa “Lôh-rie chai” cha MADC Golden Jubilee Hall liata Puhpa K. Chhuabei, Hon’ble EM i/c LAD, MADC ta palâhâhna a hnei.

Album a palâhâh khai tawhta Puhpa K. Chhuabei, Hon’ble EM chata biereina chyupa daihti hmâh ta, atanoh liata daihi phapa a pietuhpa Khazohpa hnoh ta alynabie reih ta, tovyuh pha kawpa a pietuhpa Jessica chhôhkhazy nata MHP leaders zy hnoh ta alynabie a reih.

“Jessica Nô nata Paw zy he Awnano chyhsazy apasô kawpa nata Khazohpa a chi kawpa chyhsa châ ei ta, chavâta sawchanô pa 2 tlai Mara Idol vaw châ ei ta, byhnâ ama to hmeiseih. MHP ta Idol a taopa liata tahmâ pa 7 Idol vaw pua ha ei ta, pa 4 he Siaha khichhôh chyhsa châ ei ta, pa 3 he Siaha khôtho lâ chyhsa ama châ no ta Vahia chyhsa sai ama vaw châ – he he Vahia sawzy byhnâ tona a châ tah lei theipa châ vei. Atanoh liata Album eima release-pa he ta sapa nata thlahpa liata byhnâ vaw tlôkhei sala tahpa eimâ khokheina a châ.”

“Tahmâ cha Social media thatlôna zawhzi ta Achhyna O tawh dei châ leipa ta Internet tawhta sermon zy eima moh thei lymâ – anodeikua ngiapâna liata eima thachhâ laih ta, hla sapa hawhta Sermon he nahthlie hoh lei pi ta, eima palôh chhao miah hria thai khao vei; eima hlasathaipazy ta hla ama sapa he chyhsa palôh miah pahnie ta, chyhsa hluhpi ta cha eima ngiapâna liata eimâ mopakiana châta eima hmâ tyh. Chavâta eima Soloist nata Hlapy nahzy ta palôh hmeiseihpa ta hla sa lymâ ei sa la, eima hmiata liata, New Laty liata ECM KTP Pakhypi a vaw y awpa liata chhao hla a sa awpazy ta palôh hmeiseihpa ta sa ei sala, eimâ ngiapâna miah pa-ituhpa nata tha miah patlôtuhpa a châ thei nawpa ta ama chakaona Abeipa ta byhnâ pie sala tahpa he eima khokhei kawpa a châ hra.”

“Pari theipazy he chi nata pho miah parao-pakeituhpa a châ; pari theipa a dyuh awpa he ta MTP nahzy ngâlâh liata pahnieh thlâh leipa ta NGO hropazy, râh-luhpa nata Awnanopazy chhao ta tha eima patlô lymâ awpa he a peimawh hmeiseihpa a châ.”

“Ku raihria nietluana liata thapi phia via tah, eima tiama hmeiseih awpa he a peimawh – ku raihriapa eima chyh tu khiatala chi-pho hawhta aduapapua awpa a rairu kaw aw. Siaha liata nohto ahmie - âhnalasi ama zuapazy he District hro lâ tawh viarô sai châ ta, keimo ta eima hriapapuapa a chyh kaw. Daoh tao hoh hmeiseih leipa ta Trade Licence chyhsa hropa a pahmâsapa eima pâ tyh – Siaha tawhta khichha lâ hmo supply awpa chhao Marasaw y hluh thei ma pi – eimâ mo pakia via awpa peimawh ta, eima hriapasa via awpa a peimawh kaw. Chavâta kô 2025 pa he Marasawzy châta Tiamana nata Hriapasana kô vaw châ mawh sy” tahpa bie pha kawpa reih ta, atanoh liata album release-pa he Chi nata Pho châta phahnaina lai kawpa hnei cheingei awpa ta khokheina bie a reih.

He daihti he Puhpa John Beizachhi Phuto, President, Mara Hlasa Py (MHP) General Headquarters, Siaha ta pahnie kawpa ta chhihtha ta, Rev. AZ. Beirakaw, Executive Secretary i/c Social Mission, ECM Assembly ta devotion hmâh ta, Puhpa Beirôkhu Beita, Adviser, MHP General Headquarters ta biereina chyupa hnei ta, Puhpa L. Khuly, Vice President, MHP General Headquarters ta album preview daihti a hmâh. MHP Artiste tawhta Joseph Zawtha nata Merina Hlychho zy ta hla sa ei ta, Jessica Ngody Hlychho ta Gospel hla sâkha a sa hra. Chhôhkha lâ tawhta Puhpa HC. Rochunsanga ta alynabie reina hnei ta, Zisu Thlahchhâ pachupa reiparaohpa ta programme he pachhâsapa a châ.

“Lôh-rie chai” Music video album liata hla 8 y ta, Pendrive 16 GB chhôh liata khôpa a châ. A mâ he Rs.800/- ta zuapa a châ aw. Pasaina y leipa ta Youtube nata social media liata post tlâ mâh lei awpa ta MHP General Headquarters tawhta ahawna chhao taopa a châ hra.

Atanoh liata palâhâhna programme he MHP General Headquarters pachhuapanopa a châ.

ISSUED BY:

Information & Publicity Department

Mara Autonomous District Council

Siaha.