PRESS RELEASE

NO.10/2024

SIAHA, 2 Hmypi, 2024, Chutynoh – Mararâh châta Mizoram sawhkhâ adaoh awpa ta Aizawl su liata a châh ngâhaipa Puhpa K. Chhuabei, Hon’ble EM i/c LAD etc., Puhpa T. Seido, Hon’ble EM i/c Sports & Youth Services etc., MADC zy ta ama châ chhôh ta Puhpa K. Sapdanga, Home Minister, Dr. Vanlalthlana, School Education Minister, Pihno Lalrinpuii, Health & Family Welfare Minister, Puhpa B. Lalchhanzova Food, Civil Supplies & Consumer Affairs Minister zy ahmô ei ta, Mararâh châta peimawhpazy ama tlôkhei.

He amâ hmôna daihti liata Siaha Jail Building nata Fencing kyh tlôkhei ta, UD & PA ry liata sôh ypa tawhta Siaha Town chhôh liata Footpath tao awpazy, Chakhei, Chhaolo nata Phura khih liata Thohna O ypazy liata Doctor pitlohpa miah sopa awpazy, nurse adaih leina kyh liata rairuna eimâ tyh vâta miah so baichhi awpazy tlôkhei ei ta, MADC ta Samagra ry liata Elementary School taihta â vao khao lei tawhta Mararâh School mohôhna kyh liata rairuna eimâ tyhpazy tlôkheipa châ ta, amâ daohna lia maih ta hmahlakhei awpa ta amâ vaw chhy laih vâta amâ lyzie ama reih.

New Siaha liata Nursing School pahy mâh leipa cha thlai ta pahypa a châ thei nawpa ta Health Minister ahmô ei ta, Pihno Lalrinpuii, Health Minister ta hmahlakhei awpa hleikhô ta, ano pôhpa chhao a su kaw tly â chhuah tahpa a vaw chho ei.

He nahzy hleikhô ta Tipi Ferry lâpi liata Solid Waste Management Centre tao awpa cha a hlaotloh ha tahpa ama vaw chho vâta Mararâh zawpi vyuhpa ta Mizoram sawhkhâ liata alynabie ama reih.

Ministers nahzy hleikhô ta Puhpa Vanlal Chhuanga, IA&AS, Finance Commissioner ahmô ei ta, New Pension Scheme chôchâh ama reikhei. Puhpa KT. Beicho, IRAS, Principle Secretary to the Government of Mizoram chhao, eima râh châta peimawhpa kyh reikheipa ta amâ hmô hra.

ISSUED BY:

Information & Publicity Department

Mara Autonomous District Council

Siaha.