PRESS RELEASE

NO.107/2024

SIAHA, 12 Phiapi, 2024, Hriaheinoh - Târi 12.11.2024 my dawh 10:00 AM khata Puhpa K. Chhuabei, Executive Member i/c LAD, MADC ta Miepu Tlylia liata Phura Zone Football Tournament a pahy.

Puhpa Vabeidonarapha, President, PZFA ta tournament pahyna programme chhihtha ta, Machâ K. Hrama, ECM Awnano Hyutuhpa ta Abeipa lâta pavaosana devotion daihti â hmâh.

Puhpa C. Vabeibiehnei, President, Miepu Football Club (MFC) ta welcome speech reina hnei ta, MSO Branch, Miepu zy ta special item hnei ei ta, Puhpa A. Chhualai nata C. Estheri, Miepu zy ta hlasapa ta zawpi ama palôhpahawh.

Phura Zone Football Association (PZFT Running Cup 2024) liata akhaih awpa ta khih hro lâ tawhta âhlao theipazy cha Palâ, Tôkalô, Bymari, Lôpu, Leisai (Lôpu III), Khaikhy, Phura nata Kiasie châ ei ta, Miepu khih tawhta football team 3 pua ei ta, Phura tawhta team 2 ama pua. Khih hropa tawhta la team kha sai ama pua.

Puhpa K. Chhuabei, EM, LAD, MADC chata, "Khazohpa ta tlâhna phapa na pie ta, Phura Zone Football Association Running Cup 2024 pahyna pogramme liata khichhai laipa (chief guest) ta ei vaw hlao theipa he ei ly hmeiseih," tahpa ta a reih.

EM chata, "Thyutliapazy châta football tournament pachhuahpanoh theipa a vaw châpa he aly â chhih hmeiseih," tahpa ta a reih.

"Thyudyupazy ei chi he Mara zawpi ta eima cha mokhâhpa châ ei chi ta, kuvâ , khaini, sâdâ, etc liata sôh hluhpi pahryuh ei chi ta, hnatlâna parao theipa a châpa, cancer taih vei theina châpa ta, atanoh ta he football tournament akhaih awpa ta ahlao theipazy a taopa nama y pathlei khiah, nama pathleih para awpa a byuh," tahpa ta khichhai laipa ta zawpi lâta ahawna a tao.

"Paritheipa a taopa nama y pathlei khiahta la, nama pathleih para awpa a byuh. Achuna a patlô hapa zydua he, nama zydua ta sawhkhâ raihria khai thai’pa châ leipa ei chi ta, sawhkhâ rai a hria leipa chhaota, nama thaina sona hmâpa ta ku raihria a nawhtawna palôhru hnei leipa ta, palôh hnei kawpa nata tiama kawpa ta rai nama hria lymâ awpa a byuh," tahpa ta EM ta thyutliapazy a pasyu ei.

"Notlâ lâ he eima vâhnei kaw ta, leilôzy pha kaw ta, a tiamapa châta la, ku raihriapa ta nietlua a rairu vei. Raihriana kyh liata tiamana he eimâ pachu hluh via lymâ awpa a byuh," tahpa ta khichhai laipa ta a reih.

"Football tournament liata football akhaih awpa ta avaw hlaopa zydua, nama viasazy paritheipa sei liata atâhpazy pachha papuana rai nama hria chyu awpa ta ei châ haw ei," tahpa ta EM ta football players zy hnohta ahawna a tao.

Puhpa K. Chhuabei, EM, LAD, MADC chata, "Miepu khih liata PZFT pahyna a hnei khai tawhta Supha khih tlypa ta, Supha khih zawpizy hnohta Supha leilô he pha kaw ta, palôh hnei kawpa nata tiama kawpa ta rai nama hria khiahta la nie khi hmô ru vei, chavâta, tiama kawpa ta rai nama hria lymâ awpa a byuh," tahpa ta a pasyu ei.

Pihnô Nakho Solo, Puhpa Pawsa Lava, AITO, MADC, Puhpa A. Chhualai, Cultural Instructor, MADC nata Puhpa K. Nehemia, Cameraman zy ta Puhpa K. Chhuabei, EM, LAD, MADC he ama chakaochahlâh.

ISSUED BY:

Information & Publicity Department

Mara Autonomous District Council

Siaha.