PRESS RELEASE

NO.13/2025

SIAHA, 29 Nawh, 2025, Pakhynoh - Atanoh dawh 11:00 AM khata MADC LAD office tlyhmia liata Mizoram Cleanliness Competition 2024 alyna programme taopa châ ta, he daihti he Puhpa K. Chhuabei, Hon’ble Executive Member, MADC ta a hmâkhei ei.

Puhpa K. Chhuabei, Hon’ble EM chata biereina chyuhpa daihti hmâh ta, “Nama hry liata nâ paduatuhpa he Khazohpa a châ” tah ta, Khazohpa lâ alynabie reih ta, MADC LAD ry liata officer nata staff zydua hnoh ta kôthiehpa 2025 anaohna phapa a hlâ chyu ei.

Biereina hnei pazao ta, “Kô 2024 liata palôh kho akhi leina nata taochheipa hluhpi y hrasala kô 2025 liata cha Abeipa khozie hawhta eima rai chyu hria awpa ta eimâ pasyu. He Department ei vaw mohôh tawhta eima theina hawhta taopathi byuhpazy achhosie laih pi ta, officers & staff zy, he hawhpa kyh liata nama sia kawpa ta pahno na ta, ataopathi byuhpazy ataopathi laih ei chi ta, hmahsiena thata eima hmô vâta aly’pa a châ hmeiseih.”

“Mizoram pôpalôhpa ataopasuana 2023 liata sâ 3-na châ pi ta, 2024 liata sâ 2-na eima vaw châ theipa he eimâ ly hmeiseih; eimâ lyna he Abeipa liata y sala. Sweepers, inspecting staff nata sanitation officers nata LAD ry liata officres nata staff nahzy - nama hriapasana zawhzi vâta a châ. Eima hriapasana Abeipa ta miah a thei ta, byhnâ miah a pie tahpa pahno suh u.”

“District Administration lâ tawhta hriaparaohna phapa hnei pi ta, Siaha DC nata a hrialâhpazy hnohta alynabie reih na ta, pathaihna kyh liata  ahriapasatuhpa Awnanopa, NGO, VC etc. nah zydua hnoh ta alynabie ei reih. Pathaina kyh liata zawpi lâ pahnosana nata thâtih miah papuapatuhpa MJA Siaha nahzy chô liata alynabie ei reih hra.”

“Khizaw hmahsiena ta miah a tlôkheipa liata peimawh kawpa cha Pathaihna he a châ. Râh hmahsie viapazy mopa ta pathaihna he papeimawhsa ei ta, râh hmahsiepa apathaih leipa y hra vei ei. Keimo chhao hmahsiena eimâ chadaina kyh liata pathaihna kyh he arâsai thai awpa châ vei; tiama eima papua via lymâ awpa a châ.”

“Atahmâ liata sâ 1-na eima châ awpa miah pakhâtuhpa ta, mohpadotuhpazy ta ama reipa eima theipa cha apuapa thy chakhyh vâ zy, pazôsâna O a châ leipa liata pazôsâpazy hleikhô ta pa-ôpazyna nata pachih pachhao chakhyhpazy vâta zy, O nata O likah liata apuapa a hluh tu vâ zy a châ tahpa pahnopa a châ. Chavâta, MADC LAD ta nohchareih pathaina rai hria ngâkaw hra ei sila, a râh zawpi ta eima tao tyhpa eima bâsai vei khiatala hmahsiena y aw vei. Chavâta, eima khitlâh  nata hri-iah a vaw pathaih via lymâ thei nawpa ta a râh zawpi chhao ta pathaihna kyh liata eima hria paraoh via lymâ awpa he a peimawh hmeiseihpa a châ.”

“Ataopasuana liata sâ 2-na la ha tawhta sâ 3 sâ 4-na lâ kua heih awpa he kho a chhih vei, chavâta hriapasa via ei si la, sâ 1-na eimâ châ thei lei nawpa y vei - tiama papua via lymâ awpa ta atanoh eimâ lyna noh liata eimâ pasyu khohpa a châ” tahpa ta pasyuna bie nata tha patlôna bie pha kawpa a reih.

Puhpa Joshua Chozah, Under Secretary ta programme he chhihtha ta, Puhpa S. Siko, UDC, LAD ta pavaosana a hnei. He daihti liata ahlao hrapa Puhpa B. Dawpho, MDC nata Pihnô S. Lalmuanpuii, Sr. LAO zy ta biereina chyupa daihti hmâh ei ta, Puhpa Henry PL. Hnaihly, Sanitation Officer ta Department hmahlana report pie ta, Puhpa John Beizachhi Phuto, Asst. Bio-digester, LAD ta mopakha hlasana a hnei. Puhpa C. Mochono, Asst. LAO ta vote of thanks reih ta,  Puhpa Joshua Chozah, Chairman ta thlahchhâna a hnei khai tawhta alyna programme he pachhâsapa a châ.

Puhpa K. Chhuabei, Hon’ble EM he Puhpa Beirôkhu Beitâ, I & PO nata Puhpa Martin L. Hlychho, Cameraman zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.