PRESS RELEASE

NO.61/2021

SIAHA, 10 Di, 2021, Chutyhnoh – Mara Hlasa Py (MHP) General Headquarters : Siaha ta a pachhuahpanohpa Mara Hla ta ataopasuana pi chaipa MARA IDOL cha Phiata (October) 25, 2021 zâ tawhta NSV Studio liata pathaopa châ ta, zâhnia târi 9.12.021 zâ dawh 7:00:00PM khata khichhai laipa Puhpa K. Chhuabei, EM i/c PWD, MADC ta Mara Idol Season 6 (2021) closing programme (result phuahna & entertainment nite programme) he Khaihra Hall, New Colony, Siaha liata a hmâkhei ei. He Mara Idol Season 6 sponsored-tuhpazy cha PWD (MADC), LAD (MADC) nata BDO (Siaha RD Block) zy ama châ. 

Programme he Miss T. Cassidy (Cindy) nata MC. Beichônôchai ta pahnie kawpa ta ama host. Puhpa John Beizachhi Phuto, President, MHP Gen. HQ ta MHP Gen. HQ vyuhpa ta biereina chyupa a hnei. Puhpa L. Khuly, Judge nata Satlia Vabeimozachhi Chozah, Vice Chairman, Mara Idol zy ta 2021 Organising Board ta biereina chyupa ama hnei hra. Rev. B. Beilua, Moderator ECM Assembly, Hqrs, Siaha ta Programme apavaosana thlahchhâna a hnei.

Mara Idol Season 6 (2021) liata lymâ alatuhpazy nata ama lymâzy:

Mara Idol Season 6 (2021) chata âtlyhpatlohpa cha Jessica Ngôdy Hlychho, Vahia châta, phusâ Rs. 1 Lakh hleikhôta Trophy nata Ryuchâ a dao. 1st Runner up châta Clara K. Melita, New Colony-IV âtlyhpatlohpa a châ. Phusâ Rs. 70,000/- Trophy nata Ryuchâ a dao. 2nd Runner up châta âtlyhpatlohpa cha A. Beilaipha, Meisavaih West a châ. Phusâ Rs. 50,000/- hleikhô ta Trophy nata Ryuchâ a dao.

Consolation Prize he manôh 6 châta piepa ama châ hra.

Khichhai laipa Puhpa K. Chhuabei bierei tlâhpipazy:-

Mara Idol season 6 liata khichhai laipa châ awpa ta eina khokhei vâ ei chita Mara Idol Organising Board chô liata alynabe ei reih. Ei thâtih a pahnopazy ta la atazâ he kheihtazie ma Puhpa K.Chhuabei he Mara Idol liata â vaw hlao thei tahpa ta nama no âh kaw thei aw. September 13 tawhta cancer pasana vâta treatment la na ta, October 20-na liata treatment patlô na ta, nama thlahchhâkheina vâta November 12, 2021 khata Siaha khih kaw tlô na ta, nama thlahchhâkheina  vâ nata Khazohpa ngiachhiena vâ deita ta atazâ he su liata avaw duah theipa ei châ. Eima Khazohpa khokheina nata phana ei to patlua, tah lei thei va na. Chavâta eima Beipa Zisu Krista moh cha tlyzaw ta reitheipa ta y mawh sy. 

Maraland Idol Season 1 tawhta 5 nata Mara Idol 6 liata Top 10, Top 5 taih a kaw tlohphapazy ei chi kha, hlasa thai kaw sai ei chita, hnabeidy leipa ta vaw tiama via lymâ u la, Mara Idol season a kaw y heih awpa liata nama tloh cheingei nahta pangiasa na ta, khokheina ei cha hlâ hra ei. Marapa sawzy pi he lôhliena hnei kawpa sai châ pi ta, kei cha Mongyuh hla ta ei palôh na palie thei leipa ta, Maw hla chhao ta ei palôh na palie thei hra leipa ta, Mara hla ngâlâh ta ei palôh na hria thei ta, ei palôh eina palie thei. 

Eima chi aboh n'awpa nata eima reih aboh n'awpa ta MHP a vaw duah ta, Mara Idol season 6 taih vaw pachhuahpanoh ei ta, season hropa chhao ama pachhuahpanoh via lymâ nahta pangiasa na ta, nâmo MHP-nahzy chi he eima chipho nata eima reih a pabohsatuhpa nama châ. A chhâ chaina liata ei reih khoh kawpa la, Khazohpa ta chi nata pho ta miah padua ha tlôh ta, East Maraland nata West Maraland ta y pi ta, East Maraland (Nochhi Maraland) liata pheisaih ryureina liata y ei ta, riethei ama tao ngaita, eima thlahchhâna liata eimâ thei via lymâ awpa a byuh ngaita. 

Mara sawzy he hmahsie eima khoh khiahta cha Khazohpa rei angiah sih la, tiama papua sih la, rairunazy Khazohpa a ngiapâna chôta hmialâ eima tôh via lymâ awpa he a peimawh ngaita. Keimo mara sawzy pi maluh lakh kha hmah atloh leipa pi he Abeipa ta chi na pho ta miah padua ta, Khazohpa pahno lymâna chôta tiama eima papua via lymâ awpa a peimawh kaw, tahpa he ei cha share khoh kawpa ei vâta ei vaw reihpa a châ.

Ei châ ly kaw ei.

Satlia N.Beichhotha, General Secretary, MHP Gen. Hqrs, Siaha  ta report & alynabie reina hnei ta, daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.