RESS RELEASE

NO.05/2025

SIAHA, 16 Nawh, 2025, Pobienoh - Atanoh dawh 2:00 PM kha ta Puhpa K. Chhuabei, EM i/c LAD, MADC ta ano official chamber liata LAD ry liata Officers nata Inspecting Staff nahzy awpakhypa ta meeting hneikhei ta, Siaha town chhôh pathaihna kyh liata hmahlana nata hmahla pazi awpazy kyh reina nata report nahthliena hneipa a châ.

Siaha Town chhôh liata Market sâcharu a ypa - Lorrain Market, New Colony Market, New Siaha Market, Siahatlâh Market, College Vaih Market, Meisatlâh Market - zy liata inspection hnei tyhpa kyh zy report nahthliepa châ hra ta, Siaha Town area chhôh liata Sweeper nahzy pathaina kyh liata ama hmahlana zy reina nata a pha viapa ta ama pathai lymâ thei nawpa kyh zy reina hneipa a châ hra.

Pihnô S. Lalmuanpuii, Sr. LAO ta report a piena liata Septic Tank a pazâ tyhpa kyh zy nata zawpi ta pathaihna kyh liata eimâ hra via thei nawpa kyh zy reina nata hmahla lymâ amâ chhuahna kyh zy report pie ta (he raohpa ta achievement report papua pâpa a châ), Officers hropa nata Inspecting Staff hropazy ta a pha viapa ta hmahla nawpa dâh zy reina nata pachâna ama thyu chyu hra.

MADC LAD ry liata Siaha khichhôh pathaituhpa (Sweeper) he 51 y ngâhai ei ta, motor (dump truck) sâ 3 hmâpa ta a puapazy thy tyhpa a châ hra.

Siaha Town he pathaihna kyh ataopasuana liata kô 2024 lia kha ta Mizoram pôpalôhpa liata sâ 3-na châ ha pi ta, 2025 tawhta eima kaw sie lymâ heih nawpa liata kô 2024 hlâta hmahsie via awpa ta zawpi lâ ahawna nata pathaihna kyh liata Department tawhta nopavâhna hnei via lymâ awpa zy, O hmo achhiah awpazy cha LAD liata pasaina la tua awpa byuhpa kyh zawpi lâ pahnosa via lymâ awma kyh zy, ahneituhpa compound khô lâ i (dog) papuapazy kyh liata order y chiehpazy hmahlapazi via lymâ awpa kyh zy nata zawlâ liata pasaina y leipa ta O sana chhaichhi nata hmobaoh hropa a sohpazy dâh hawhta hmahla lymâ awpa zy hleikhô ta maophaohna rai chyu liata tiama tah, ngâchhih kawpa ta hria lymâ awpa ta Puhpa K. Chhuabei, Hon’ble EM he ta atanoh meeting ahlaopazy hnoh ta chhosiena nata ahawna a tao.

He meeting liata Puhpa Beirôkhu Beitâ, Information & Publicity Officer, MADC nata Puhpa K. Nehemia, Cameraman, Information & Publicity Department, MADC zy amâ hlao hra.

ISSUED BY:

Information & Publicity Department

Mara Autonomous District Council

Siaha.