PRESS RELEASE

NO.37/2023

SIAHA, 17 Hmypi, 2023, Chutynoh - Vahia biatuhpa MDC Puhpa K. Chhuabei, EM i/c LAD, MADC ta târi 15-17 Hmypi, 2023, noh 3 chhôh official tour programme taopa ta a bia liata khih ypa Vahia, Miepu, Supha, Lôpu nata Khaikhy khihzy tlypa ta atakô 2023 liata ei kha a tly nawpa a châna hawhta bia zawpizy hnohta Kôthiehpa anaohna nata khokheinazy hlâ ta, alynabie reina a hnei laih.

A bia zawpizy ta a vaw lypa ta welcome gate nata pawpiri zy chhao ta vaw dy laih ei ta, EM i/c LAD thiehpa a châna alykheina Ryuchâ zy hlâ ei ta, alykheina patizy chhao amâ vaw chhuanohpa laih hra.

Puhpa K. Chhuabei chata khito liata biereina a hneina liata hnatlâna nata daihti phapa apietuhpa Khazohpa hnoh ta alynabie reih ta, khito liata apakyhna Programme pha kawpa patohpatia tuhpazy hnoh ta alynabie reih ta, O-lyu rai siesai tah, ama daihti sôh kawpa paruapa ta ano avaw hâ tuhpazy hnoh ta alynabie a reih.

Vahia bia zawpizy khokheina nata ngiachhiena vâta a ei 4 nawpa ta MDC châta atlypatlohpa a châpa liata alynabie reih ta, EM Portfolio pha kawpa areichhyh tuhpa Puhpa M. Laikaw, CEM zachhihpa nata a hrialâhpazy hnohta alynabie a reih.

MDC Election hnei daihti liata khotlyna palôh anano tyh hra sala atahmâ cha palôh miakha phaopa ta ti nata râh châta keih chakâkhoh lymâ awpa ta a bia zawpi zydua ahawna nata hruana a tao.

He sawhkhâna thiehpa, Puhpa M. Laikaw chhihthana ry liata New Maraland padua achhuah ei ta, Good governance - corruption y leipa sawhkhâna nata dâh abei chaina sawhkhâna padua amâ chhuah tahpa reih ta, he sawkhâna châta Awnanopazy thlahchhâna liata athei lymâ awpa ta ahawna a tao.

Puhpa K. Chhuabei chata 12th Term MADC sawhkhâna thiehpa liata ama pachâ papeimawh kawpa hry liata sâkha cha Mararâh liata paritheipa a hluh kawpa he a châ tah ta, Marasawzy, Khazohpa ta byhnâ miah pie ta, a byhnâ pahno thai leipa ta pari theipa eima taopa kyh liata pei a tah hmeiseih tahpa a reih.

Paritheipa he Sawhkhâ, Awnano, NGOs nata eima chhôh to ta eimâ dyuh awpa a châ tah ta, Marasawzy ta MADC liata Biehneina lai viapa to ha ei si la, Mara chi pathla awpa chhao y leipa ta eima chi a lei lymâ khiah biehneina laipa cha chi hropazy liata a y pathlei aw; paritheipa adyuhna kyh liata kô 2023 he athiehpa ta hmah heih ei si la tahpa ahawna nata pahruana tao ta, paritheipa adyuhna kyh liata tiama kawpa ta ahria lymâtuhpa a bia liata MTP Branch zy hnoh ta Paritheipa adyuhna châta baona sôh a hlâ.

Puhpa K. Chhuabei, EM zachhihpa chata kô 2023 he a bia liata hriiah pathaih kô, sapa nata thlahpa liata byhnâ to kô nata ku raihriapazy ta kôvei kô châ awpa ta khokheina byhnâ aw ta, adona nata ngâchhihna zy, corruption zy chhao he Politician nata sawhkhâ rai hriapazy ngâlâh liata châ leipa ta ku raihriapazy ku liata â pahnieh hra na tahpa ta kôthiehpa liata achhuahna ru kawpa hnei awpa ta pasyu ta, râh chhihthana kyh liata ano châta Thlahchhâkhei pazao lymâ awpa ta a bia zawpizy hnoh ta ahawna a tao.

Puhpa K. Chhuabei raohpa ta asie hrapa Puhpa K. Hrahmô, EM i/c Revenue, Puhpa Tiahlei Syuhlô, EM i/c Forest zy ta biereina daihti piepa ama châ laih lymâ hrana hawhta ti nata râh chhihthana kyh liata ama saduthlienazy reih laih ei ta, eima Missionary nahzy ta thâtihpha miah ama chho vâta thlahpa liata pachha eima châpa dei châ leipa ta sapa liata chi hropazy tawhta ryureina eihrâhpa hnei awpa ta miah ama pachhapapua tahpa reih ei ta, he dei châ leipa ta pazu pavaw nata râhsa pabohsana kyh liata nata pathaihna kyh liata hmahla chyu awpa ta khito liata pasyuna bie pha kawpa ama reih.

Puhpa K. Chhuabei, EM zachhihpa khitlyna liata a lahpinô Pihnô Nakho Solo ta zi thei hra ta, officials tawhta Puhpa Henry PL. Hnaihly, SO (LAD), Puhpa Beirôkhu Beitâ, I&PO, Puhpa Herbertson Syuhlô, AEO (Edu.), Puhpa Beikypacha Syhly, PA to EM (Revenue), Vabeipathai Hlychho, Surveyor-III, Puhpa John Beizachhi Phuto, Asst. Bio-Digester Operator, Puhpa T. Pabua, Cameraman zy ta zi ei ta, BJP District Headquarters tawhta CH. Chhunga, Convener, IT & Media Cell nata Carolyn Chhaihlo, Vice President, Yuva Morcha zy ta ama zi thei hra.

ISSUED BY:

Information & Publicity Department

Mara Autonomous District Council

Siaha.