PRESS RELEASE 

NO.34/2026

Siaha, târi 22 Pachawh, 2026 (Pakhynoh) - Atamy dawh 6 : 00 AM liana khata Puhpa K. Chhuabei, Executive Member i/c., LAD, MADC ta Siaha Bazar Traffic Point kiapâh (Siaha Bazar VC area) liata mâ cheipa ta hmâthei awpa Ie O nata Pazôsâna O ( Pay & Use Toilet) cha Zawpi hmâthei awpa ta a pahy.

He pahypa programme he Pihnô S. Lalmuanpuii, Sr. LAO, Local Administrative Department, MADC ta daihti chhihtha ta, Rev. Z. Beihrohmo, Siaha Pastor Bia, Biatuhpa ta Abeipa hnohta daihti pavaosana a hnei.

Puhpa K. Chhuabei, EM, LAD ta Ie O nata Pazôsâna O (Pay & Use Toilet) pahyna a hnei khai tawhta biereina hnei pazipa ta," atamy liata Ie 0 nata Pazôsâna O pahyna daihti miah âvaw hlao theipazy; Rev.Z.Beihrohmo, Puhpa A  Riatha, MDC, Siaha Vaihpi Biatuhpa, Puhpa K. Vanlalliana , Executive Secretary, MADC, Puhpa Viasai Solo, EE, PHE, Siaha, Puhpa NT Sanga, Chairman, Joint VCs , Siaha Town, Puhpa H. Pawkhu, VCP Siaha Bazar nata Ahrialâhpazy nata MADC liata Officers thokha nata LAD Staffs zy nama zydua hnohta alynabie ei rei".

"Atamy he thokhazy ta cha pahno pita, he su liata heta Pazôsâna O kha a y tyhpa a châ. Kha Pazôsâna O kha Pazôsâna châ hleikho ta hmohropa châta hmâ tyhpa a châpa vâta a pualei kaw tyh, Pazôsâna awpa châ chhhaota hmâkhoh awpa chhao châ tyh vei. He hawhta a châ nota, atamy liata he su cheingei liata Ie O nata Pazôsâna O; mâ cheipa ta Zawpi hmâ thei awpa ta pahy theipa a vaw châna liata sôh nata angiahpa liata thapi aphiatuhpazy; Pihnô S. Lalmuanpuii, Sr.LAO nata rai amohôhtuhpa Puhpa C. Rahre, AE zy hnohta alynabie ei rei ".

"Ie nata Pazôsâna kyh liata khiliah liata eima Pazôsâna O zy he repair pata pathai tyh hr'ei sihla eima hmâzie liata eimâ sohsi leipa vâta su pualei chaipa tlâ a vaw châ tyh. He vâna heta eima Officers nata VCs nah zy chhaota pachâ khoh pita, Ie O nata Pazôsâna O chhao he mâ cheipa ta Zawpi hmâthei awpa ta nata amôhôhtuh awpa sopa ta eima Khihpi lialôh chaina su liana heta tao sihla, he heta pathaina liata hmasiehna eima hnei awpa hnabeina hneipa ta atamy liata eima pahy hapa Ie O nata Pazôsâna O (Pay & Use Toilet) he taopa a vaw châ".

"Mara Râh, Marasawzy pi he Khazohpa ta Eima Missionary nahzy hmâpa ta tlua papuapa eima châpa vâta Byhnâ he State nata MADC siepahliepa ta India Sawhkhâ tawhta thata dao pita, cha hry liata Pathaina kyh liata eima hmahsiena chhao he Byhnâ eima daopa hry liata miakha a châ hra. UD&PA, Siaha District, LAD, MADC ry liata Sanitation, NGOs, Awnanopa, VCs nata eima zydua hriaparaoh phana zawhzi ta District pathai chaipa lymâ sâthôhna, sânona nata sâkhana chhao eima vaw la theipa a châ."

"Atamy he thokha pachâna liata cha hmo chyhnawh kawpa pahy ei ta, tahpa ta pachâna chhao a y thei aw, he a châ nota, he su he eima Khihpi liata su peimawhpa; Banks yna su, Sôhpaliena su nata Zawpi eimâ hmaohpakhy tyhna su achâpa vâta apathai pahâna awpa su taopa he Zawpi ta pahno ei sala, he su he eima pangai chyu theina awpa ta pahyna programme he pachhuahpanohpa a châ. He su liana heta Complain Box sohpa cha aw ta, mohôhpazina liata eima khokhi leina chhao he complain Box liata soh tyh awpa a châ".

"Puhpa M. Laikaw, CEM, MADC chhihthana ry liata Sawhkhâ asie ngâpa heta pathaina pachâ peimawh ngaita ta, pathaina liata hmia eima tôh lymâ theina awpa ta 2026 - 2027 MADC Budget liata Town chhôh ataopasuana (Siaha khichhôh liata Vaih a ypazy),  Division nata Circle ataopasuana (Division -Tipa V, Circle administrative offices -Vahia nata Chakhei) nata Siaha khih khôtholâ Khih a ypazy pathaina ataopasuana liata ama lyma awpa Rs, 100,000/- ( Tlaw Lokha) sai sopa a châ (Total Rs, 300,000/-) . Sakhana ta Rs,50,000/- , sânanona ta Rs, 30,000/- nata sâthôhna ta Rs, 20,000/- saita lymâ piepa ama châ aw".

" Mara Râh Zawpi zy ei châ haw khohpa ei châ, He Ie O nata Pazôsâna O eima hmâ daihti liata apuapaleituhpa châ leipa ta a pathai pahâtuhpa châ chyu awpa ta ei haw ei.

Atamy programme miah a vaw hmâkhei tuhpa zydua pathaina hmahlana liata baokhâ ta tiama papua lymâ awpa ta châ haw ei na ta, nama zydua hnohta alynabie ei hlâ chyu ei " tahpa ta Puhpa, K. Chhuabei EM ta a biereipa a pachhâsa.

Pihnô S. Lalmuanpuii, Sr.LAO ta alynabie reipa ta, " Atamy liata Ie O , Pazôsâna O nata Amôhôhtuhpa yna awpa 0 pahy theipa a vaw châpa liata Joint VCs, nata LAD Department ta sôh athyupakhy pa ta, Puhpa Viasai Solo EE, PHE nata a Staffs zy ta Ti (Water) connection miah taopa ei ta, EE, PWD ta Road Cutting mâ miah free hrata, ama chô liata eimâ ly ngaita. He rai miah Amôhôhtuhpa Puhpa C. Rahre chôlia chhaota alynabie ei rei hra. Atamy programme miah âvawhlaopa zydua nama hnohta LAD, MADC mohta alynabie ei cha rei chyu ei", tahpa ta a biereipa a pachhâsa.

Ie O nata Pazôsâna O (Pay & Use Toilet ) sana liata sôh hryuhpa zydua cha - Rs, 174,380/- châta. Amohôhtuhpa Yna awpa O sana liata sôh hryuhpa zydua cha - Rs,49,410/- a châ.

ISSUED BY:

Information & Publicity Department,

Mara Autonomous District Council,

Saiha.