Mara Autonomous District Council (MADC), Siaha, Government of Mizoram, India

PRESS RELEASE

NO.196/2022

SIAHA, 19 Di, 2022, Hriatuanoh - Atanoh dawh 12:30 PM pa ta SDFA Playground, Meisatlâh liata Sport & Youth Services Department, MADC nata Siaha District Football Association (SDFA) hriaparaohpa ta pachhuahpanohpa MADC Golden Jubilee Celebration Football Tournament Closing Ceremony liata Puhpa K. Chhihrau, Executive Secretary, MADC cha khichhai laipa (chief guest) châpa ta â hmâkhei ei.

Programme he Puhpa Khusa Khaila, Joint Secretary, SDFA ta chhihtha ta, Puhpa J. Kholai, Ex-Member, SDFA ta Abeipa lâ pavaosana devotion daihti â hmâh. MTP Branch, Meisavaih East zy ta pahyna hla â ngia kawpa ta paryh ei ta, Puhpa A. Chhualai nata Jessica B. Khuhly zy ta pahnie kawpa ta hlasapa ta zawpi ama palôhpahawh. T. Cassidy, Treasurer, SDFA ta Match report a pie.

Puhpa Pakhaw Choza, President, MTP (HQ) chhaota pasyunabie pha kawpa reina a hnei hra.

Puhpa K. Chhihrau, Executive Secretary, MADC ta pasyunabie a reipa tlâhpi viapazy:

MADC Golden Jubilee tlô thei awpa ta eima Beipa, eima Khazohpa ta hnatlâna phapa miah pie ta, Âno ta Golden Jubilee cha miah vaw patlôsa ha ta, eima Khazohpa moh cha reithaipa ta y mawh sy.

Atanoh he su liata avypazy hnohta ei châ haw khoh kawpa ei cha "APÔHKHANA" he a châ. Hmasiehna, hlaotlohna hnei awpa heta a peimawh chaipa cha apôhkhana eima hnei tua chai awpa he a za peimawh ngaita kaw.

Eimâ pôhkha thei vei khiahta la hlaotlohna zy, hmahsienazy nata laiseihnazy y thei vei.

Eima râh Mararâh hmah pasiesa awpa heta MADC, NGOs, Sports liata chhihtuhpa zy, Awnanopa zy, Mara zawpi hriaparaohna phapa nata apôhkhana eima hnei tua chai awpa he a za peimawh ngaita kaw.

Eima Khazohpa ta MADC Golden Jubilee miah patlôsa ha ta, atanoh tawhta hmialâ eima kaw sie laih lymâ nawpa lia heta eima Khazohpa hmiapasah ta tiama papuapa ta nata ahneituhpa palôh phaohna chôta hmialâ tôh lymâ awpa ta ei châ haw ei.

Atanoh ta he MADC Golden Jubilee Celebration Football Tournament 2022 liata final akhaih awpa New Colony FC vrs FC College Vaih châ ei chi ta, a tlôpa ta a tlô dâh thai kawna chôta, a tlô leipa chhaota tlôlei dâh thai kawna chôta nama y awpa khoh na ta, hmialâ nama sie laih lymâ nawpa liata tiama papua via lymâ ta, Khazohpa pahnona chôta tiama nama papua via lyma awpa ta ei châ haw ei.

Ei châ ly kaw ei.

Puhpa KT. Neikha, Vice President, SDFA ta vote of thanks reina a hnei khai tawhta daihti pachhâsapa a châ.

He tournament chhôhta Football match akhaihpazie cha 27 matches a châ. Top scorer he C. Michael, Jersey No. 8, New Colony FC châ ta, goal 11 apa goal. Football team a puapa zydua he 26 teams ama châ. Match tota Man of the match taopa châ ta, lymâ he Mizoram State Rural Livelihoods Mission (MzSRLM) Rural Development Department, Government of Mizoram ta ama sponsor.

Puhpa K. Chhihrau, Executive Secretary, MADC he Official lâ tawhta Puhpa JH. Beihnai, Sports & Youth Officer, Puhpa K. Machhua, Under Secretary (GAD), Puhpa T. Pabua, Cameraman, Puhpa Michael Lalhmangaihthangzuala, Cameraman nata Sport & Youth Services Department, MADC staffs zy ta ama chakaochahlâh.

FC College Vaih ta 3-1 ta New Colony FC ama pahnie.

Champion

FC COLLEGE VAIH - Trophy + Certificate + 1 lakh.

Runner up

New Colony Fc - Trophy + Rs.50,000 + Certificate.

Fairplay Award

FC COLLEGE VAIH - Trophy + Rs.10,000 + Certificate.

Best Player & Man of The Match : John Litas

Fc College Vaih - Trophy + Certificate + Rs.2,000

Best Goal Keeper : K. Tochhua

N. Colony Fc - Trophy + Certificate + Rs.2,000

Top Scorer : C. Michael