PRESS RELEASE

NO.33/2022

 

SIAHA, 1 Pachawh, 2022 – Zâhnia târi 31 Pamih, 2022, zâ dawh 7:30 Pm pa ta Council Vaih Hall, Siaha liata  Mara Students' Organisation General Headquarters : Siaha zy ta Special Conference cum General Election 2022 khawna programme hmâpa châ ta, he liata Puhpa K. Chhihrau, Executive Secretary (ES), Mara Autonomous District Council (MADC) cha  Chief Guest châpa ta Programme a hmâkhei ei.

 

He Programme he Puhpa Vatlualai Khithie, Treasurer MSO Gen. HQ ta chhihtha ta, Rev. S. Vabeikhokhei, Patron MSO Gen. HQ ta thlahchhâna daihti a hmâh. 

 

Puhpa Elson Eliasah Notlia, Secy MSO Conferance Board ta report piena hnei ta, CH. Beikhochhi, President MSO Gen. HQ ta Presidential speech reina hnei ta, Lai Students' Association, Gen. HQ tawhta biereina hnei ei ta, Laihsa Florence Hlychho, Satlia NT. Vabeido, Laihsa Masi B. Hrasai nata Puhpa A. Chhualai zy ta pahnie kawpa ta hlasapa ta zawpi ama palôhpahawh. 

 

Result declation he Puhpa FC. Khihnia ta hnei ta, result phuah khai tawhta Newly Elected President Puhpa T. JB. Rona ta alynabie reina nata pasyuna bie pha kawpa reina a hnei. 

 

Chief Guest Puhpa K. Chhihrau, ES, MADC ta MSO (H) Special Conference cum General Election 2022 ama hneina nata amâ pachhuahpanohna liata hmâh awpa achâkheina sôh a hlâ pâ hra ei.

 

MSO HQ General Election Result (2022 - 2024)

 

President : Puhpa T. JB. Rona

 

Vice President : Puhpa Elson Eliasah Notlia

 

Gen. Secretary : Puhpa Byhnâ Chozah

 

Asst. Gen. Secretary : St. Beirachhitha Bohia

 

Finance Secretary : Puhpa T. John Tennyson

 

Treasurer : Laihsa Daphney Lapi

 

He nahzy he MSO Election Commission ta tlohpa ta a phuahpa ama châ.

 

Chief Guest Puhpa K. Chhihrau, ES, MADC bierei tlâhpi viapazy:-

 

“MSO General Headquarters : Siaha chhihthatuhpazy nata member zydua ta na my leipa ei chi ta, atazâ Khichhai Laipa ta na rao ei chi ta, ei châ ly hmeiseih ei. Atazâ hnatlâna phapa miah pie ta he su miah patlôsatuhpa eima BEIPA hnohta alynabie ei reih.”

 

“Keimozy daihti kô 1992 - 1996 liata General Secretary post two consecutive terms vaw patu na ta, atahmâ eiza saipalie nahta kô vâropi a vaw sie haw. Palôhlie chhao â chhih kaw tyh.”

 

“Keimozy daihti nota MSO General Conference zy eimâ hmâh tyh no khata Oneton liata acha-ie kawpa ta kiah tyh pi ta, atazâ deikua cha he eimâ hmâna hall tlyhmia liata Motor pha kawpa nata Car pha kawpazy hmô awpa a vaw hluh kaw. Eima Motto parohpa cha Maraland is ours tahpa châ tyh ta, atahmâ deikua cha For God and Maraland tahpa a vaw châ ha bâ. Achuhaipa châ ei chi ta, palôh hnei kawpa ta namâ chu awpa he cha khokhei ei na ta, namâ chu ngâhai no heta achhuahna siahlia kawpa nama hnei awpa byuh ta, business lâchhâ sie achhuahpa ta cha business line liata hlaotloh  cheingei achhuah u la, Competitive tao achhuahpa nama châ khiahta cha tiama papuapa ta hlaotloh cheingei namâ chhuah awpa a peimawh ngaita. Sawhkhâ raihria awpa chhao heta tahmâ tawhta la thai patlua, tiama patlua châ awpa he a vaw peimawh ngaita.”

 

“Duty first pleasure after tahpa bie he achuhaipazy châta la athei ngâthlâh ha awpa a châ. Châ achu hai nota châ achuna ngâlâh he eima pachâ peimawh chai awpa a châ. Adâhtlâhpi ta eima râh liata eima nôpaw râh chhihthatuhpazy he MSO liata chhihthatuhpa vaw châ ha chiehpa viarô sai ama vaw châ. Cha hnaihta, atahmâ ta achu ngâhaipazy ei chi he mylâ hânoh ta eima râh chhihthatuh awpa châ ei chita, tiama papuapa ta namâ chuna lia heta thapi nama vaw phia via lymâ awpa a peimawh ngaita.”

 

“Tiamana eima rei no heta abyuh khiah ku raihria chhao anawhtaw leipa ta tiama kawpa ta eima hria lymâ awpa a châ. Eimâ chhuahna Goal setting pha kawpa eima hnei awpa a byuh. Mongy bieso ta cha competition is good but cooperation is better ama tahpa a châ. Hriaparaoh phapa hnei he a vaw peimawh hmeiseih. Hriaparao phapa (Co-operation) eima hnei vei khiahta cha eima hmotaopa a hlaotloh thei aw vei. Hlaotlohna hnei awpa ta la reiraohna, hriaparaohna phapa nata tiamana he eima papeimawhsa via lymâ awpa a byuh ngaita.”

  

Puhpa Judson KT Zephatha, Gen. Secy MSO Gen. HQ ta vote of thanks reina a hnei khai tawhta Puhpa Vabeikhaihmo Solo, Sr. Adviser, MSO HQ ta thlahchhâna ta programme pachhâsapa a châ.

 

Puhpa JH. Beihnai, S&YO, MADC, Puhpa K. Machhua, Under Secretary (GAD), MADC, Puhpa Pawsa Lava, AITO, MADC nata Puhpa K. Nehemia zy ta Puhpa K. Chhihrau, ES, MADC he ama chakaochahlâh.

 

ISSUED BY:-

Information & Publicity Department

Mara Autonomous District Council

Siaha.