PRESS RELEASE

NO.176/2022

SIAHA, 15 Phiapi, 2022, Hriaheinoh - Zâhnia zâ dawh 08:00 PM pa ta Forest Hall, MADC, Siaha liata Inter District Senior Women Football Championship 2022 Kick Off Programme cha Puhpa J. Vabeikiasa, EM i/c SWD, Soil & Seri, MADC cha CEM, MADC vyuhpa ta khichhai laipa (chief guest) châpa ta â hmâkhei ei.

Puhpa J. Vabeikiasa, EM, MADC ta pasyunabie a reipa tlâhpi viapazy:

Ahmiatua ta atakô Mizoram Football Association pachhuahpanohpa Inter District Senior Women Football Championship 2022 avaw hlao awpa ta Mizoram District hro lâ tawhta avaw siepa zydua Siaha District vyuhpa ta alynabie ei cha hlâ ei.

Siaha khichhô liata nama châh chhôh zydua aly kawpa ta nama daihti namâ hmâh chyu awpa ta ei châ haw ei. Mizoram Football Association pachhuahpanohpa Siaha District Football Association liata a vaw chahâ (patlôpa) he a rônah tah na ta, eima thyutliapazy châta pahaona pha kawpa a vaw tlô cheingei nahta pangiasa na ta, ei ly hmeiseih.

Eima pahno chyupa hawhta kô 1976 liana khata Mizoram sawhkhâ chata Mizoram Sports Council cha Sport lâta hmah eima sie via lymâ thei nawpa ta vaw padua ta, he Council heta Vision pha kawpa hneipa ta Sport Infrastructure, Coach, Sport lâta a pahâhpazy, Sport discipline nano nanopa pachhuahpanohpa ta, ataopasuanazy a pachhuahpanohpa tyh.

Khazoh ngiachhiena vâta Mawrâh he Sports lâchhâh ta hmahsie chatlie kaw pi ta, Women Football lia chhao heta thata hmahsiena y ta, Mizoram Women's Football team zy ta a eikha nawpa ta Senior Women's National Football Championship kô 2021-2022 liata akhaihpa lia khata Champion ngâhaipa Railways cha Semi Final liata hmiachhy ei ta, ama hlaotloh khao vei.

Kô 2006 National Sports Festival for women, Jammu & Kashmir liata Mizoram Women team zy ta Silver Medal vaw la ha ei ta, Kô 2007 khata All India Rural Sports Tournament - Aizawl liata hneipa lia khata Gold Medal ama la ha heih. Eima chanôzy he vaw dua lei kaw ei ta, Indian Women's Senior National Team liata puah thei hra awpa ta theina hnei ei chi ta, ahlao thei cheingei awpa ta khokheina ei cha hlâ ei. 

Châhrasala, a kheihawhpa ataopasuana lia rai heta, tiamana hleikhô ta, daotheina zy mao-ohtheinazy he a vaw peimawh ngaita kaw. Eima zydua ta sâkhana eima châ thei leipa vâta, tlô dâh thai, tlôlei dâh chhao nama thai awpa he a peimawh ngaita kaw.

Sports lâta hmahsie via lymâ nama khoh khiahta cha, Discipline phapa he peimawh kaw ta, paôpazy, paritheipazy namâ râsai khai awpa a byuh. Nama hyutuhpazy dâh na phôh zyh awpa ama cha tahpa ei nama zyh lymâ awpa a byuh.

Aly kawpa ta Inter-District Senior Women's Football Championship akhaih chyu awpa ta khokheina ei châ hlâ ei.

Ei châ ly kaw ei.

ISSUED BY:

Information & Publicity Department

Mara Autonomous District Council

Siaha.