PRESS RELEASE

NO.139/2022

SIAHA,  6 Phiata, 2022, Pobienoh - Zahnia (târi 05.10.2022) zâ dawh 7:00 Pm khata NSV Studio, New Colony, Siaha liata MSO, Gen. HQ, Siaha pachhuahpanohpa MSO Vyhphao Sports Meet 2022 Kick Off Programme cha Khichhai laipa (Chief Guest) Puhpa J. Vabeikiasa, EM, Social Welfare, Mara Autonomous District Council (MADC) ta a hmâkhei ei ta, MSO Vyhphao Sports Meet 2022 Theme Song (Music video) chhao a release pâ.

Programme he first session liata laihsa H. Beihrosô, Treasurer, Vyhphao Sports Organising Board, MSO Gen. HQ, Siaha ta chhihtha ta, second session liata laihsa J. Christina, Member, Vyhphao Sports Organising Board, MSO Gen. HQ, Siaha ta a chhihtha. Puhpa TA. Beihnia, Senior Adviser, MSO Gen. HQ, Siaha ta devotion daihti â hmâh. Puhpa T. JB. Rôna, President, MSO Gen. HQ, Siaha ta welcome speech reina hnei ta, Puhpa NT. Beichhisa, Assistant Secretary, Vyhphao Sports Organising Board, MSO Gen. HQ, Siaha ta Music video (MSO Vyhphao Sports Meet 2022 theme song) saichhieliena a hnei. Pihnô Hepaw Hlychho, Circle Officer, ICDS, Siaha, Matron member, MSO Gen. HQ, Siaha ta pasyunabie pha kawpa reina a hnei.

Puhpa S. Beikhochhua, Secretary, Vyhphao Sports Organising Board, MSO Gen. HQ, Siaha ta Football nata Volleyball tie draw taona daihti hmâh ta, Minikin Christangia Hlychho, Pihnô Ngôvaw, laihsa Lalchansangi nata FC. Suna Chano zy ta  pahnie kawpa ta hlasapa ta zawpi ama palôhpahawh. Puhpa C. John Dennis, Match Commissioner, Vyhphao Sports Organising Board ta dâh nata phôh (rules and regulations) zyh awpa peimawhpazy reina daihti â hmâh.

Puhpa J. Vabeikiasa, EM, Social Welfare, MADC ta biereina chyupa hnei ta, a ry liata palâsapa he a bierei tlâhpi viapazy a châ:-

1. Pangiasa lei pi ta atazâ MSO Vyhphao Sports Meet 2022 Kick off programme liata khichhai laipa ta eina rao vâ ei chi ta aly kaw na ta, alynabie ei châ hlâ ei. MSO Gen. HQ, Siaha ta a vaw tao tyhpa Sports Meet cha COVID-19 vâta hmâh pazao thei khao leipa ta vaw y ta, atakô hmâh thei heih awpa a vaw châpa he aly â chhih hmeiseih.

2. Namâ chuna liata tiama papuapa ta nama daihti hmâh hra u la, Sports cha students châta peimawh kawpa nata education ta â chakaihpa châ ta, MSO Gen. HQ, Siaha ta vaw pachhuahpanohpa thei ta, achuhaipa Delhi tawhta zy, Bangalore tawhta zy, su nano sunanopa tawhta a vaw hlao (participate) thei awpa ta Siaha khihpi liata namâ vaw pahmaohpakhy theipazy he a rônah tah na ta, ei ly hmeiseih.

3. Achuhaipa châ heta paritheipa (drugs), sahma, etc tawh heta namâ sohsi kaw awpa he peimawh ngaita ta, namâ chuna lia heta Khazohpa pahnona chôta palôh hnei kawpa nata tiama kawpa ta namâ chu awpa he peimawh ta, hlaotloh cheingei namâ chhuah awpa ta khokheina ei châ hlâ ei.

4. Achuhaipa châta peimawh kawpa cha DISCIPLINE he a châ. Nama discipline a pha vei khiah, achuna liata hlaotlohna y thei vei. Chavâta, discipline pha kawpa ta nama ypa a byuh. Discipline papeimawhsa ta discipline pha kawpa hneina chôta châ achupazy cha hlaotlohna ama hnei tyh. Chavâta, discipline hnei pha kawna chôta châ namâ chu awpa ta ei châ haw ei. Discipline a hnei leipa cha ataopasuana (Sports) liata chhao ama hlaotloh beih vei.

5. Ataopasuana (Sports) he peimawh ngaita ta, exercise lazy eima sapa heta a peimawh ngaita kaw. Hnatlâna phapa hnei awpazy ta nata lathli (brain) papha hnei awpa chhao heta, sports, exercise lazy he a vaw peimawh ngaita kaw.

6. Sports cha mo pakha deita ta akhaih thaipa châ leipa ta, chavâta, team work he peimawh kaw ta, team work eima papeimawhsa khiahta la hlaotlohnazy a kaw y lymâ aw. Patuapalua hohna nama hnei awpa he a peimawh ngaita kaw, eima hmotaona lia heta hmeiseihna, palôh pie khaipa ta hmotao namâ chhuah lymâ awpa ta khokheina ei châ hlâ ei

Ei châ ly kaw ei.

Puhpa J. Vabeikiasa, EM, Social Welfare, MADC he Official lâ tawhta Puhpa Pawsa Lava, AITO nata Puhpa K. Nehemia, Cameraman ta ama chakaochahlâh.

Puhpa Clinton Hlychho ta vote of thanks reina a hnei khai tawhta Bei Zisu thlahchhâna miah pachuhpa reihparaohpa ta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.