PRESS RELEASE

NO.183/2022

SIAHA, 19 Phiapi, 2022, Pachynoh - Târi 18 & 19 Phiapi, 2022, Chutynoh nata Pachynoh, noh 2 chhôh ta, Puhpa HC. Lalmalsawma Zasai, Hon’ble Dy. CEM, MADC ta Theiva, Mawhrei nata Chapi zy tlypa ta he khih zy liata Schoolzy a tly.

Atahmâ liata Tour Programme he Mawhrei nata Chapi khihzy anua viapa ta siepapuapa châ ta, a siena lâ liata Theiva liata Schoolzy tlypa ta ama duahmo nata School O zy hleikhô ta midday meal chhona O zy mopasiana hnei pâ ta, he a tlyna liata ama peimawhpa nata angiahpa ama vaw tlôkheipazy cha mokhei pazi lymâ â chhuah tahpa a reih.

Mawhrei nata Chapi khihzy liata khihsaw zawpi ta Welcome Gate taopa ta arônah kawpa ta vaw dy ei ta, he dyna liata achuhaipazy hleikhô ta khitlâh nôpaw, NGOs nata VC nahzy chhao ama khih liata MADC nôpawpa avaw ngiapa cha Pawpi pachhih ri chhao ta aly kawpa ta ama vaw dy chyu.

He khihzy liata khitlâh nôpawzy ta Public meeting taopa ta Programme pha kawpa vaw taopa ei ta,  sahroh hluhpi chhao ta niedo achhuanohpa ei ta, School châta peimawhpazy chhao School Teachers, SMC nata VC zy ta châ rohpa ta tlôkhei chyu hra ei ta, Dy. CEM chata MADC liata a hrialâh nôpawpazy nata biatuh nôpawpazy asaohiahna chôta a theina hawhta mokhei lymâ â chhuah zie a reih.

Puhpa HC. Lalmasawma Zasai Hon’ble CEM chata, khito liata Public meeting hneipa liata a siepapuana chhâpazy reih ta, he hawhta sôhthih hluhpi pahryuhpa ta a siepapuana chhâpa he mo pakha aparônah sa nawpa châ leipa ta, Mararâh châta a theina hawhta raihria awpa â chhuah vâna a châ tahpa reih ta, a mohôhpa School Education Department ry liata schoolzy cha asu tlai tlypa ta ama duahmo pahno khai a khoh tahpa reih ta; Mararâh liata Middle & Primary School 161 y ta, 12th Term MADC â vaw thao tawhta thla 6 chhôh liata, atahmâ liatahpa chhao ta 127 Schools a tly ha tahpa reih ta, Khazohpa ta â ryh a tah khiah ahropa, a tly mâh leipa zydua he atakô 2022 chhôh liata tlypapua khai â chhuah tahpa a reih.

A biereina liata Teacher zy cha party colour hnei lei awpa ta pasyu ta, Khazohpa tawhta byhnâ ama topa liata palôh tlâh kawna chôta pachuna rai hriapha awpa ta ahaw ta, azipa palôh hneipa ta ama khih liata School nata Achuhaipazy cha tiama kawpa ta mohôh awpa ta pasyuna nata ahawna a tao.

“Eima khih chyu tawhta châthaipa papua awpa he keimo a khih hnei tuhpazy maophaohna a châ; atliata liata Chhaolô satlia KC. Zalena, MCS nata Chakhei/College Vaih laihsa K. Ngosai, MIS zy ta ama khih moh papha ei ta, ama khihsawzy ta arônah kawpa ta alypa ei ta; Mararâh moh ama papha tahpa eima pahno; âmo hawhta eima khih nochâ tawhta châthaipa papua achhuah chyu ei suh u. Eima râh hmahsie nawpa nata ativy nawpa liata Education he peimawh tu ha ta, chavâta asu cheingei moh laih ta, school duahmo nata infrastructure duahmo pahno awpa he ei khoh chaipa a châ.” tah ta “keima padisaihpa ta Mararâh Education mohôh awpa ei châpa he arônah tah na ta, sâkha lâ vâ pasuasa, sâkha lâ noh pasasa tahpa he pha tah leipa na ta, chavâta ei theina hawhta zôpha kawpa ta Mararâh châta rai hria ei chhuah aw” tahpa a reih.

“Samagra Teacher zy he Regularised awpa eima khoh kaw; mo pakha ahaona vâ tly ma, Party hropa tlyma pahrua leipa ta araohâh kawpa ta tao awpa eima khoh; Samagra Teacherzy eima vaw pa-i thei hapa ta a châ khiah pa-i hapazy su ruapa liata eima thyutlia châ thai thiehpa, rai ahmô mâh leipazy châta su eima taopa laih heih awpa a châ.

Marasawzy byhnâ to nawpa nata Khazohpa tawhta khokhei patluana eima to theina awpa ta Vaili mahnô & mahpawzy ta kô 1905 liata Vârâh pahno awpa ta London liata “Lakher Pioneer Mission” miah ama vaw register haw. Chavâta eima byhnâ topa zydua he Khazohpa hnohta aly ei si la, chatanachata rai liata ngâ achhih ei si la, ‘Suhrawh sukha’ he thlachareih hlao tawhta pie my lei awpa châ ta, eima pie ti ta âki kawpa ta eima pie lymâ awpa a châ”

“Khitlâh kyh apachâtuh awpa cha a khih hneituhpazy eima châ - School Education Department tawhta sôh eima hmôpazy he achyh kaw; chavâta khihtlâh ta Job card tawhta school châta nohkha thazy thyu si la, School hyutuhpazy ta eima school châta tlaw khazie chhâ ma eimâ pasaih hra awpa he apeimawh ha bâ. Job card phusâ khitlâh ta eima thyupakhypazy cha eima thyutlia ku zôzâh thaipa MTP zy ta school chhaichhi tlâhrai hria aw pi ta, MCHP ta midday meal sâhzy chanei aw pi ta, tho ti awpa eima thyu thei - he hawhta eima sawnahzy kyhpachâ hmeiseihna chô ta eima mohôh khiatala ato tao thei tuhpa Khazohpa ta byhnâ miah pie aw ta, Mararâh Education he hmah a sie via lymâ aw tahpa ei ngiapâ.” tahpa ta khito liata ahawna nata pasyunabie pha kawpa a reih.

Dy. CEM zachhihpa he ta amâ hawna hawhta Chapi liata High School hleikhô ta Mawhrei liata Achuhaipa 110 (KG - Class-X) yna Refugee School chhao tly pâ ta, school ta ama peimawhpazy ama tlôkheina kyh liata a theina hawhta hmahlakhei â chhuah aw tahpa a reih vâta Chapi khihsaw nata Mawhrei Refugee School mohôhtuhpa nata teacherzy ta a chô liata alynabie ama reih.  

Puhpa HC. Lalmasawma Zasai Hon’ble CEM chata khito liata ama daihti sôh kawpazy paruapa ta arônah kawpa ta ama vaw dy vâta nata sôhthih hluhpi pahryuhpa ta nata sahrohzy tihâhsapa ta niebawzy ama vaw taopa laih vâta alynabie reih ta, ano azituhpa officials nata party nôpawpazy hnohta chhao alynabie a reih.

Dy. CEM zachhihpa he officials lâ tawhta Puhpa FC. Rehmô Ex-MDC & Member, Co-ordination Committee, MADC, Puhpa HC. Malsawmkima, Member, Planning & Dev. Board, MADC, Puhpa Beirôkhu Beitâ, I & PO, MADC, Puhpa L. Lalduhkima Addl. DPC, Samagra Shiksha, Siaha District, Puhpa R. Beilôchai Khithie, Inspector of Statistics, School Education Deptt., MADC, Puhpa ST. Lalzarliana, CEO(Tipa), MADC, Puhpa K. Lalnuntluanga, BRCC, Samagra Shiksha, Tipa, Puhpa L. Vabeimolai, PSO to Dy. CEM, Puhpa K. Nehemia Cameraman, I&PRD, MADC zy ta zi ei ta, MNF District Headquarter, Siaha tawhta Puhpa, Mahu Chozah Adviser, Puhpa CL. Hranga, Chairman, Media & Publicity Deptt., Puhpa ST. Lalzarmawia, Vice Chairman, Media & Publicity Deptt., Puhpa HT. Lalnunzauva, President, Tipa Block, Puhpa HC. Byhna, Laty zy ta ama zi.

ISSUED BY:

Information & Publicity Department

Mara Autonomous District Council

Siaha.